MIKA 7 - Embimbiliya - Bíblia Sagrada em Umbundu

¹ Ngongo yange we! momo nda soka ndotembo va yunga ale epako liokuenye kuenda va nolula ale ayuva oku linga ovinyu. Ka kuli ocisakaita cokulia, pamue ekuyu lina lia pia tete li yongola utima wange.

² Ukuakufendela Suku wa taka vofeka. Pokati komanu ka pali u wa sunguluka. Vosi va lavekela oku pesela osonde. Omunu omunu o seteka oku kuata manjaye lowanda.

³ Ovaka avo a yayulako oku linga cĩvi. Ci kale osoma, ci kale onganji, vosi va yongola ovitukiko. Omunu unene o pangisa ndonjongole yĩvi yutima waye. Kuenje va likuta pamosi.

⁴ Ndaño u wa velapo pokati kavo wa linga ndolosanyanya; lu wa sunguluka ca velapo pokati kavo wa linga ndolumbo luokapamãla. Eteke liolondavululi viavo leyambulo liavo lieya. Okukunduka kuavo ku kasi ocipepi.

⁵ Ku ka kolele u o lisungue love, ndaño ekamba liove. Epito liomẽla wove li yilila u o pekaila vonete yove.

⁶ Momo omõla ulume o sepula isiaye, omõla ukãi o vayela inaye; ufeko o vayela ndatembo yaye ukãi. Ovanyãli vomunu vakuepata liaye.

⁷ Puãi ame, ame njimbila Yehova ovaso, nalamẽla Suku yeyovo liange. Suku yange o njeva.

⁸ Onyãli wange, ku ka fuanguile, nda ñupuka minduka vali. Eci numãla vowelema Yehova o ndingila ocinyi.

⁹ Omo ndo lingila ekandu oco mandikisa lokutema kua Yehova toke a netela ondaka yange kuenje o netuluila, O nundisila kocinyi. Mõla muẽle esunga liaye.

¹⁰ Oco unyãli wange o ci mõla, kuenje osõi yi wila u wa popia lame hati, Yehova, Suku yove, o kasi pi? Ovaso ange o vanja lepembe. O kosiwa ndonata yovoluwa,

¹¹ Ku kala eteke lioku tunga ovimbaka viove. Keteke liaco olongave vi aviwila kupãla.

¹² Keteke liaco ava va tunda ka Asuria, lava va tunda kovaimbo oke Egito, tunde ke Egito toke ko Olui, tunde kokalunga toke kokalunga, tunde komunda toke komunda, vosi veya kokuove.

¹³ Puãi ofeka yi linga ekalasoko mekonda liomanu va tungamo lovilinga viavo vĩvi.

¹⁴ Omanu vove, haivo ocunda cocipiñalo cove, va songuila lombueti yove. Cilo va litungila vesisi vokati kofeka yovaima; veye, va lile vo Basiane lovo Gileada ndeci cosiahũlu.

¹⁵ Ndi va lekisa ovikomo ndoloneke vina wa tundi kofeka ye Egito,

¹⁶ Olofeka vi ci mõla kuenje vi kutisiwila osõi unene wavio. Ovimẽla viavo vi munihĩsua, ovatũi avio a sitikiwa.

¹⁷ Vi lesa lesa oneketela ndonyõha, pamue ndovina vi yaila posi. Vi tunda kovikolo viavio loku luluma, viya ku Yehova Suku yetu lusumba, kuenje viu ku yokokela.

¹⁸ Helie Suku wa soka ndove, u ecela olohõle, haeye ivala okulueya kuocisupe cocipiñalo caye? Eye ka kala ño-o hũ lonyeño yaye momo o sanjukila ohenda locisola.

¹⁹ O tu kuatela vali ohenda, o kosa avĩho etu lolomãi viaye. Ove wimba ovakandu etu osi valondo okalunga.

²⁰ O tata Yakoba locili, o kuatela Avirahama ocisola ka ci pongoloka, ndeci wa lisilasila lolosekulu vietu tunde kosiãhũlu.