MIKA 6 - Embimbiliya - Bíblia Sagrada em Umbundu

¹ Kaliye, yeveleli! Ca popia Yehova ceci, hati, Votoki, livondeli kolomunda, ovivulu vi yeve ondaka yene.

² Alomunda, yevi ondaka ya Yehova, lene, aviseveto ka vi pui viongongo, yeveleli! Momo Yehova o kuete ondaka lomanu vaye kuenda o tamãlãla la Isareli.

³ Amanu vange, ndo lingi nye? Ndo kavisi ndati? Ñumbululi.

⁴ Momo ame ndo vupi vofeka ye Egito, ndo yovoli vonjo yupika, kuenje nda tuma Mose la Arone kuenda Miriama ha vo pitili kovaso.

⁵ Amanu vange, ivaluki eci Balaka, Soma ya Moavi, a pangele, leci Balama omõla a Beore, o kumbulula. Ivalukivo eci ca pita vonjila yoku tunda ko Sitimi oku enda ko Giligali, oco vu limbuke ovilinga via Yehova vioku popela.

⁶ Ngambata nye eci njiya ku Yehova? Ngambata nye eci fendela Suku yovailu? Njiya kokuaye lovilumba vioku yoka, pamue lolonãle via tẽla ulima?

⁷ Yehova o sanjukila hẽ olohulukãi viovitupi violomeme, pamue olohuluwa violondui viulela? Ndumbila hẽ uveli wange akandu ange? Epako lietimba liange hẽ ndi li ecela ekandu liutima wange?

⁸ Amunu, Suku wa ku lekisa eci ciwa, Yehova o yongola nye kokuove, hateko oku linga esunga, loku sola ohenda kuenda oku endaenda la Suku yove lesuluviko?

⁹ Ondaka ya Yehova yi vilikiya imbo kuenje ukualondunge o sumba onduko yove. Ene amanu, lene akulu vimbo, yeveleli!

¹⁰ Anga, nẽla oku ivala ipako vievĩho vi kasi volonjo viavakuevĩho, pamue onjongo yesanda ya palamisua?

¹¹ Njovuisa u o kuete ombalãsa yesanda pamue onjeke yolopesu haviociliko?

¹² Olohuasi viove vie yuka oku punda; lolonungi viove vi popia ño uhembi. Alimi ovovimẽla viavo a kasi lelimbi.

¹³ Oco nda fetika oku ku yambula, loku ku kunduila akandu ove.

¹⁴ O lia, puãi ku kuta. Imo liove li kala ño-o lonjala. O solaika puãi ku ci popela. Eci o soleka ndi ceca kosipata.

¹⁵ Wimba ombuto puãi ku ungula. O kosa asetona puãi ku liwaveka lulela waco. O kosa ayuva puãi ku nyui ovinyu viaco.

¹⁶ Omo wa pokola kovihandeleko via Omiri, lomo wa sumbila ovilinga viosi vionjo ya Ahave, kuenje wa tava kalungulo avo, oco hu lingisa elunda, kuenda olonungi viaco vi pembuiwa. Oco o sawiwa la vakualofeka.