MIKA 5 - Embimbiliya - Bíblia Sagrada em Umbundu

¹ Amõla a Siono ukãi, ongolola olohoka. Va tu ñuala ocingonja; va veta ketama liombiali ya Isareli lombueti.

² Puãi ove, a-Beteleme Efarata, ove o sule pokati kapata a Yuda, kokuove ku nundila u o linga ombiali ya Isareli. Ocikoti caye ca tunda kosiãhũlu, koloneke viale.

³ Oco o va eca toke u o kasi lolongembia a cita; oco ocisupe cavo ci tiukila komãla va Isareli.

⁴ Kuenje o talama, o lisa ocunda caye lolõhõlo via Yehova, luwale wonduko ya Yehova Suku yaye. Kuenje va kala ño-o hũ, momo kaliye o linga unene toke kasulilo okilu lieve.

⁵ Haeye o tu nenẽla ombembua. Eci u Asuria iñila vofeka yetu, kuenje o liatela kongongo yetu, oco tu u katuila ovangombo epanduvali lolosoma ecelãlã.

⁶ Kuenje va viala ofeka ya Asuria losipata, lofeka ya Nimorote losipata ya poliwa. Va tu popela ku u Asuria eci iñila vofeka yetu kuenje o liatela volongave vietu.

⁷ Oco ocisupe ca Yakoba ci kala vokati kolofeka vialua ndowume wa Yehova, pamue ndombela kowangu ka yi talamẽla omanu pamue omãla vomanu.

⁸ Kuenda ocisupe ca Yakoba ci kala vokati kolofeka. Ci kala pokati komanu va lua ndohosi pokati kovinyama viovusenge, pamue ndeyove liohosi pokati koviunda violomeme; nda li pitamo li vi kosa, lisuvolola, kuenje ka kuli u o vi popela.

⁹ Eka liove li tumuiwĩlua ava va litamãlãla love. Ovanyãli vove vosi va tetiwako.

¹⁰ Kuenje Yehova hati, Keteke liaco nyõla otuvalu tuene vu kasi latuo, nyõlavo akãlu ene ovita,

¹¹ Ñundula ovaimbo ofeka yene, ñupula olombonge viene.

¹² Ndu wupi ovitãho viosi, kuenje ka pa kala vali ovimbanda pokati kene.

¹³ Nyõla oviñumañuma viene lotumbonya tuene, kuenje ka vu fendela vali eci ca tungiwa lovaka ene.

¹⁴ Nukũla olongunji vi kola vi kasi vokati kene, nyõla ovaimbo ene.

¹⁵ Kuenda fetuluinya lonyeño lekaka olofeka ka via pokuile.