MIKA 4 - Embimbiliya - Bíblia Sagrada em Umbundu

¹ Koloneke via sulako ci kala okuti omunda yonembele ya Yehova oyo yi lepa, olomunda viosi vikuavo vi sule. Koku lepa yi pitahãla oviwulu viosi, kuenje owiñi womanu wamẽla kokuayo.

² Kuenje olofeka via lua viya, vi popia, viti, Enjui, tu lamani komunda ya Yehova, konjo ya Suku ya Yakoba, oco a tu longise ovituwa viaye, ha tu endela volonjila viaye. Momo okulonga ku tunda ko Siono, kuenda ondaka ya Yakoba yi tunda ko Yerusalãi.

³ O tetuluila pokati komanu vakualofeka via lua, o tetuluila olofeka vinene vi kasi kupãla; kuenje va tela olosipata viavo ha vi lingi olosungu violosaluwa, lolonjelia viavo ha vi lingi otutana. Ofeka ka yi tikuila vali ofeka yikuavo osipata, ka va lilongisa vali ovita.

⁴ Puãi vosi va tumãla, omunu omunu vemi liuyuva waye, pamue vemi liukuyu waye, kuenje lomue o va lingisa usumba, momo omẽla wa Yehova Ukualohoka wa popia.

⁵ Omo olofeka viosi viendela, ofeka vonduko ya suku yayo, ofeka vonduko ya suku yayo, etu puãi tu endela ño-o hũ, oloneke ka vi pui, vonduko ya Yehova Suku yetu.

⁶ Yehova wa linga hati, Keteke liaco ñongela ava va teñela lava va sanduiwa kuenda ava nda talisa ohali.

⁷ Va teñela ndi va lingisa ocikoti cofeka, va tundisua ndi va lingisa ofeka ya pama. Kuenje Yehova o va vialela vomunda Siono, tunde cilo toke ka ku ci.

⁸ Ambonge yocunda! Amunda yomõla a Siono ukãi! Uviali wosimbu u tiuka, wiya kokuove, haiwo usoma womõla a Yerusalãi ukãi.

⁹ Kaliye o liyuila nye? Vokati kove hẽ ka mũli osoma? Ondunguli yove nga ya taka, okuti olongembia via ku kuata ndukãi o kasi loku cita?

¹⁰ Amola a Siono ukãi, Kenya kenya! Litetela ndukãi o kasi loku cita! Omo kaliye o tunda vimbo kuenje o ka tunga vusenge. O pitila toke ko Bavulono, oko o ka popelelua, haiko Yehova a ka ku yovuila peka liovanyãli vove.

¹¹ Cilo olofeka via lua via ku likongela viti, A vĩhĩsue, ovaso etu a mole Siono.

¹² Puãi ka va kulihile ovisimilo via Yehova, lehãla liahe ka lia va lombolokele liokuti wa va kongela ndovitungu viotiliku pocimbandi.

¹³ Amõla a Siono ukãi, votoka! Sasa! Momo ombinga yove ndi yi lingisa utale kuenda akonjo ove ndi a lingisa osipi. O sasõla olofeka via lua; onganyu yi tunda kokuavio o yeca ku Yehova, lovikuata viavio o vi eca ku Ñala yoluali luosi.