MIKA 3 - Embimbiliya - Bíblia Sagrada em Umbundu

¹ Oco nda linga siti, Ene, akulu va Yakoba, lene, alombiali viepata lia Isareli, yeveleli! Haceneko hẽ oku kũlĩha esunga?

² —ene, vu nyãle eci ciwa, haene vu sole eci cĩvi; vu yuva ekova liomanu vange, vu suvulula ositu yavo kakepa;

³ vu liavo ositu yomanu vange, vu va yuva ekova, vu teya akepa avo, vu va sasela ndovinumba volombia pamue ndombelela vociyo.

⁴ Oco va vilikiya Yehova, puãi eye ka va kumbulula; eteke liaco o va vundisila ocipala caye momo va linga ovilinga vĩvi.

⁵ Yehova wa pisa ovaprofeto ava va lueyisa omanu vaye, haivo, eci ve kuta, va kunda vati, Cosi ci kasi lombembua, puãi va wenguila ovita u ka kapi okulia vovimẽla viavo.

⁶ Wa va pisa hati, Oco, cu lingili uteke okuti ka ku kala ovitumasuku, cu lingili owelema okuti ka ku kala ovinjoinjoi. Ekumbi li iñilĩla ovaprofeto, kuenje eteke liaco li va tekãvẽla.

⁷ Ovaprofeto va kutisua osõi. Vakuakutãha va munihĩsua. Vosi yavo va sitika ovimẽla viavo, momo ku Suku ka kuli ekumbululo.

⁸ Puãi ame, ame nde yuka ongusu. Ñasi le Espiritu lia Yehova, ñasivo lesunga kuenda olohõlo vioku sapuila Yakoba okulueya kuaye, kuenda Isareli ekandu liaye.

⁹ Cosi eci ci yeveleli, ene, akulu vepata lia Yakoba, lene alombiali viepata lia Isareli, haene vu nyãle esunga kuenje vu pongolola cosi ca sunguluka.

¹⁰ Vu tunga Siono losonde kuenda Yerusalãi levĩho.

¹¹ Akulu vaco va tetuluila olondaka lovitukiko. Ovitunda viaco vi longisila ofeto. Ovaprofeto vaco va piluila olombongo, haimo va kunamẽla ku Yehova, kuenda vati, Yehova hẽ, ka kasi pokati ketu? Oco lacimue cĩvi ciya kokuetu.

¹² Oco, mekonda liene, Siono li limiwa ndepia. Yerusalãi li linga ekundu, kuenda omunda yonembele yi linga ndonumbuko yovesisi.