MIKA 2 - Embimbiliya - Bíblia Sagrada em Umbundu

¹ Ava va sokoluila evĩho povola avo ha va lingi cĩvi, ngongo yavo! Eci ku ca omẽle va ci linga momo va ci tẽla.

² Va livela ovapia kuenje va a kuata. Va livela olonjo kuenje va vi tambula. Va talisa ohali omunu lonjo yaye. Va nyõla omunu lovipako viaye.

³ Oco, ca popia Yehova ceci, hati, Tala! nda angiliyila epata eli eci cĩvi, lolomi ka vi tundi kolosingo viene. Ka wendi vali loku ngangavala, momo oloneke viaco vi kala cĩvi.

⁴ Eteke liaco va vu tela olusapo ha va lu imbi ndocisungo coku lila, vati, Tua nyolẽha we! Wa pongolola onepa yomanu vange. Wa yi njupa we! Wa tepela ovapia etu ava va tu kuata.

⁵ Oco ka vu kala lumue o wimbili ocela vongongela ya Yehova.

⁶ Va lungula vati, Ko ka popi ovilañele. Ka ca sungulukile oku popia ovina ndevi. Osõi ka yi tu sangi. Apata lia Yakoba, eci he, ci tava oku ci popia?

⁷ Espiritu lia Yehova li konyõha hẽ? Evi hẽ, ovio ovilinga via Yehova? Olondaka viange hẽ ka vi kuatisa u endaenda loku sunguluka?

⁸ Ene puãi wa lingi ndovanyãli va katukila omanu vange. Vu lula olonanga viomanu va pita ño lombembua, haivo va enda ño lonjila yavo, ohele mbu, ka va la sima ovita.

⁹ Akãi vomanu vange vu va tundisa volonjo viavo via talala; omãla vavo vu vopa olumue ulamba wange.

¹⁰ Votoki! Kuendi! momo palo hapocitumãlo ceneko. Momo vu kasi levĩho li nyõla kuenda okunyõla kuaco kua piãla.

¹¹ Nda umue wa ñuala ñuala oku kunda olondaka viesanda luhembi hati, Ndu kundili olondaka viovinyu levi vi koluisa,— eye nda wa sesamela oku linga uprofeto womanu ava!

¹² A Yakoba, ocili ndu kongeli ene vosi, ñongela ocisupe ca Isareli; ndi va kapa pamuamue ndolomeme vocunda, ndocunda colomeme vocililo cavio; va yuela ca lua omo owiñi wavo walua.

¹³ U o va tuiyila o pita kovaso. Va tila, va pitila kombundi, va pita, kuenje va tundila posamua. Soma yavo o va pitila kovaso. Yehova o linga usongui wavo.