MIKA 1 - Embimbiliya - Bíblia Sagrada em Umbundu

¹ Ondaka ya Yehova yeya ku Mika, u Morasiti, kovava a Yotama, la Ahasi kuenda Hesekiya, olosoma via Yuda, eyi a muĩla Samária kuenda Yerusalãi.

² Amanu vosi, yevi! Alofeka viosi, la vosi va kasimo, yeveleli! Ñala Yehova, una o kasi vonembele yaye yi kola a linge ombangi yoku vu pisa.

³ Momo tala, Yehova o tunda vocitumãlo caye, o loka, enda loku liata kolonumbuko viongongo.

⁴ Kuenje olomunda vi yengulukila vemẽhi liaye, vi pita vakungu ndesela konẽle yondalu, pamue ndovava a pesekela keñueñue.

⁵ Eci cosi ciyilila okulueya kua Yakoba lekandu liepata lia Isareli. Okulueya kuaco kua Yakoba kue? Ha Samãriako? Lekandu liaco liepata lia Yuda lie? Ha Yerusalãiko?

⁶ Oco ndingisa Samária elunda vofeka pamue ocumbo omo va tuika ayuva. Ovawe aye ndi a tiñuluĩla vekungu, ndi situlula oviseveto viaye.

⁷ Oviñumañuma viaye viosi vi sasuĩwa, olombanjaile viaye viosi vi yokiwa londalu, loviteka viaye viosi ndi vi inasi; omo wa vi kongela lofeto yocipuepue, kuenje koku feta ocipuepue haiko vi tiukila.

⁸ Oco ndi ci lilila loku liyuila; ndula uwalo si endi epõlõla; ndi lila ndolombulu; ndi sukoka ndolombo.

⁹ Omo apute aye ka a sakuiwa, a sambukila ale Yuda, a pitila kombundi yomanu vange, ta ko Yerusalãi.

¹⁰ Ku ka ci sapuile vo Gati, ku ka lile ndaño naito; tiñolõhãla voneketela ko Bete-le-afara.

¹¹ Alonungi via Safiri, piti vonjila yene, endi lepõlõla losõi. Va Sanana ka va tundi; oku lila kua Betecele ku u wupa ocitumãlo.

¹² Va Moroti va kasi lohele sanga ka va kala ciwa, momo ohali ya Yehova ya tunda kilu, ya lokila ta kombundi ya Yerusalãi.

¹³ A Lakisi, kutila otuvalu kakalu: ove wa linga efetikilo liekandu komõla a Siono ukãi, momo okulueya kua va Isareli kua sangiwa kokuove.

¹⁴ Oco weca olombanjaile vioku usika ku Moreseti-gati; apata a Akisiwi a linga onjanjo kolosoma via Isareli.

¹⁵ A Moresia, hu nenẽla vali u o ku yula: ulamba wa Isareli wiya ka Adulami.

¹⁶ Liputi asenya. Kulũhi kovitue ndongonga. Lipemuili omãla wa sanjukili, momo va litepa love ha va endi kumandekua.