MATEO 9 - Embimbiliya - Bíblia Sagrada em Umbundu

¹ Oco wa wila vowato, kuenje oku yoka, weya kimbo liavo.

² Yu vo nenela omunu wa fa ovolu, wa pekela pula. Yesu, oku mola ekolelo liavo, wa popia lu wa fa ovolu hati, Amõlange, kolisako, akandu ove a ecelua.

³ Vamue vakuavisonehua va soka vati, O popia etonãi.

⁴ Oco Yesu, omo a limbuka ovisimilo viavo, wa popia hati, Nye wa simili cĩvi vitimi viene?

⁵ Ca lelukapo ci pi? oku popia hati, Akandu ove a ecelua, ale, ele oku popia hati, Votoka, enda?

⁶ Puãi, oco vu limbuke okuti Mõlomanu o kasi lomoko yoku ecela akandu kilu lieve,— oco a popia lu wa fa ovolu, hati,— Votoka. Tikula ula wove. Kuende konjo yove.

⁷ Yu wa votoka wa enda konjo yaye.

⁸ Puãi eci owiñi wa ci mola wa kala lusumba. Va sivaya Suku una eca komanu omoko ndeyi.

⁹ Eci Yesu a tundako wa mola omunu, onduko yaye Mateo, wa tumala powombo, kuenje wa popia laye hati, Ñuame, yu wa votoka wo kuama.

¹⁰ Eci Yesu a kala komesa vonjo, tala, vakuakutambula elisimu va lua la vakuakandu veya kuenje va tumalela kumuamue la Yesu lolondonge viaye.

¹¹ Oco, eci va Fariseo va ci mola, va popia lolondonge viaye vati, Nye ulongisi wene a lila kumue lavakuakutambula elisimu la vakuakandu?

¹² Puãi, eci Yesu a ci yeva, wa linga hati, Ava va ñuai ka va sukila ondotolo, te ava va vela.

¹³ Puãi kuendi ka lilongisi ndeci olondaka evi via lomboloka ndokuti, Njongola ohenda, ovilumba havioko, momo seyilile oku kovonga vakuesunga te vakuakandu.

¹⁴ Oco olondonge via Yoano vieya kokuaye, viti, Etu la va Fariseo nye tu likandangayaila okulia, puãi olondonge viove ka vi likandangiya okulia?

¹⁵ Yesu wa popia lavo hati, Vasandombua hẽ, va tẽla oku lila osimbu sandombua a kasi kumue lavo? Puãi oloneke viya okuti sandombua o vopiwa oco va likandangiya noke okulia.

¹⁶ Lomue o tongela ocitetele conanga ka ya likonyele kuwalo wa kuka, sanga ombandekua yi nala uwalo waco oco kuiya epangu linene.

¹⁷ Pamue ovinyu viokaliye ka va vi longela volonjeke viovipa via kuka sanga olonjeke vi tuika, kuenje ovinyu vi peseka lolonjeke vi nyõleha; puãi va longela ovinyu viokaliye volonjeke viovipa viokaliye oco kavali kavio vi tumala osimbu.

¹⁸ Osimbu a kala loku vangula lavo ovina evi oco ukulu umue weya, wo fendela, hati, Omõlange ukãi ndopo a fa. Enju puãi, o wimbe eka oco a kale lomuenyo.

¹⁹ Kuenje Yesu wa katuka, wo kuama kumue lolondonge viaye.

²⁰ Oco ukãi umue wa kala loku pita osonde ekui lianyamo kanyamo avali, weya konyima yaye yu wa lamba kolunjenje luwalo waye,

²¹ momo wa soka vutima waye hati, Nda ndamba ño kuwalo waye, ñaya.

²² Puãi Yesu wa ñualapo kuenje, oku u mola, wa popia laye hati, Amõlange, kolisako. Ekolelo liove lia ku kayisa. Kuenje ukãi, tunde kola yaco, wa kaya.

²³ Eci Yesu a iñila vonjo yukulu, oku mola vakuakusika olombendo, lowiñi wa yuela,

²⁴ oco wa popia lavo hati, tundi, momo okofeko ka ka file, puãi ka pekela, kuenje vo yola epembe.

²⁵ Eci owiñi wa tundisiwamo Yesu wa iñila, wa ka kuata peka kuenje okofeko ka pasuka.

²⁶ Oluhimo luaco lua sandokaila vofeka yaco yosi.

²⁷ Eci Yesu amako olomeke vivali vio kuama, via vilikiya viti, Tu linge ohenda, a Mõla a Daviti.

²⁸ Eci a iñila vonjo oco olomeke viaco vieya kokuaye. Yesu wa va pula hati, Wa koleli okuti ndi tẽla oku ci linga? Vio kumbulula, viti, Oco, a Ñala.

²⁹ Oco wa lamba vovaso avo, hati, Ci lingiwe kokuene ndekolelo liene.

³⁰ Kuenje ovaso avo a patuluka. Yesu wa va lungula hati, Cuhili. Lomue ka ka ci kũlĩhe.

³¹ Puãi oku tunda va sanduila oluhimo luaye vofeka yaco yosi.

³² Eci va tundamo oco vo nenela ocitende ci kuetiwe locilũlu.

³³ Eci ocilũlu ca tundisiwa oco ocitende ca vangula kuenje omanu va komoha, vati, Ka ca la muiwa ndoco vu Isareli.

³⁴ Puãi va Fariseo vati, O tundisa ovilũlu lunene wosoma yovilũlu.

³⁵ Kuenje Yesu wa ñuala ñuala kovaimbo osi anene la-a atito oku longisa volosunangonga viavo loku kunda ondaka yiwa yusoma. Wa sakula ovoveyi osi lokuvela kuosi.

³⁶ Puãi, eci a mola owiñi womanu, wa va kuatela ohenda momo va pekengua kuenda va sakalaisua ndolomeme ka vi kuete ungombo.

³⁷ Oco a popia lolondonge viaye hati, Okungula kua lua puãi olondingupange viñamiñami.

³⁸ Puãi ku Cime cokungula oco a tume olondingupange kokungula kuaye.