MATEO 8 - Embimbiliya - Bíblia Sagrada em Umbundu

¹ Eci a loka lomunda, owiñi wa lua wo kuama.

² Kuenje tala, ukuavilundu umue weya, wo kekamela kolongolo hati, A Ñala, nda o ci panga o tẽla oku ñayisa.

³ Oco, oku alula eka liaye, Yesu wo lamba hati, Nda ci panga, kaya, kuenje haico ovilundu viaye via kaya.

⁴ Oco Yesu wa popia laye hati, Tala, ku ka ci sapuile umue, puãi kuende, ka lilekise kocitunda, ka lumbe ocilumba Mose a handeleka oku lumba nduvangi woku yelisua.

⁵ Eci a iñila vo Kafarinau oco kesongo limue weya kokuaye, wo livondela, hati,

⁶ A Ñala, ukuneje wange o lila pula vonjo, wa fa ovolu, cu vala ca lua.

⁷ Kuenje Yesu wa popia laye hati, Njiya siu sakula.

⁸ Kesongo wa kumbulula hati, A Ñala, si sesamela okuti wiñila vemi liolusoka luange, puãi popia ño ondaka yaco kuenje ukuenje wange o kaya.

⁹ Momo ame ndimunu wa tiamela kuviali. Ñasi lasualali va pokola kokuange. Mopia lumue siti, Kuende, kuenje enda. Mopia lukuavo siti, Enju, kuenje iya. Mopia lukuenje wange siti, Linga eci, kuenje o ci linga.

¹⁰ Eci Yesu a ci yeva oco wa komoha, yu wa popia lava vo kuãi, hati, Ocili mopia lene siti, Ndaño ku va Isareli sia sangele ekolelo ndeli.

¹¹ Mopia lene siti, Va lua va tunda kutundilo kuenda kutakelo, veya kuenje va tumala kumue la Avirahama la Isake kuenda Yakoba vusoma wokilu,

¹² osimbu omãla vusoma va imbiwa vowelema wovosamua, haimo mu kala oku lila loku likeleketa ovayo.

¹³ Kuenje Yesu wa popia la kesongo hati, Ndeci wa kolela ci kale love. Oco, vola yaco haico, ukuenje wa sakuiwa.

¹⁴ Eci Yesu a iñila vonjo ya Petulu oco wa mola ndatembo yaye yukãi o langi lombambi.

¹⁵ Oco wo kuata peka kuenje ombambi yo weca yu wa pasuka, wa va poka.

¹⁶ Koñolosi vo nenela va lua va kuetiwe lovilũlu kuenje wa tundisa ovilũlu viaco londaka, yu wa sakula vosi va vela.

¹⁷ Ca lingiwila okuti eci ca popia uprofeto Isaya ci tẽlisua, cokuti, Wa likapela okuvela kuetu, haeye wa ambata ovoveyi etu.

¹⁸ Eci Yesu a mola owiñi wa lua wo ñuala wa handeleka oku enda kesinya.

¹⁹ Oco ukuavisonehua umue weya kokuaye, yu wa popia laye hati, Olongisi, hu kuama kuosi wenda.

²⁰ Kuenje Yesu wa popia laye hati, Akẽle a kuete alungi, lolonjila viovusenge vi kasi lovianju viavio, puãi Mõlomanu ka kuete apa a kunamisila utue waye.

²¹ Ondonge yimue yikuavo ya popia laye yiti, A Ñala, tava okuti tete ngenda ha kenda tate.

²² Puãi Yesu wa popia laye hati, Ñuame, ovivimbi vi kende ovivimbi viavio.

²³ Eci a wila vowato olondonge viaye vio kuama.

²⁴ Oco vokalunga mua katuka ehunguhungu okuti vowato mua samohaila akimba, puãi Yesu wa pekela.

²⁵ Oco veya kokuaye kuenje vo pasula vati, A Ñala, tu popele, tu kasi loku nyõleha.

²⁶ Kuenje wa popia lavo hati, A vakuekolelo litito, wa salukili nye? Yu wa votoka, wa lemela ofela lokalunga kuenje kueya etulumuho lia lua.

²⁷ Oco va komoha vati, Omunu u wa soka ndati, omo ndaño ofela kuenda okalunga viu pokola?

²⁸ Eci a pitila kesinya, kofeka ya va Gadara, vavali va kuetiwe lovilũlu va tunda volosonje. Va tema ca lua okuti lomue o tẽla oku pita vonjila yaco.

²⁹ Va vilikiya vati, A Mõla a Suku, o yongola oku linga nye letu? Weyilila nga oku tu yambula osimbu eteke liaco ka lieyile?

³⁰ Ocunda cinene colongulu ca kala loku lila kupãla lavo.

³¹ Ovilũlu viaco vio peya viti, Nda o tu upamo tu tume vocunda colongulu.

³² Eye wa popia lavio hati, Kuendi. Oco via tunda, via iñila volongulu, kuenje tala, ocunda caco condumũhĩla vocingunguma toke vokalunga kuenje ca taka vovava.

³³ Vakuaku vi lisa va tila, oku enda vimbo va sapula cosi, kuenda eci cava va kuatiwile lovilũlu.

³⁴ Oco imbo liosi lia tunda oku ñualehela la Yesu. Eci vo mola vo pinga oku tunda vofeka yavo.