MATEO 7 - Embimbiliya - Bíblia Sagrada em Umbundu

¹ Ko ka veli oco ko ka veliwe.

² Momo evelo vu vela lalio hailio vo veli lalio. Oseteko vu setaeka layo haiyo vo setekelivo.

³ Ci kasi ndati okuti o lete okacinene ka kasi viso liukuẽle puãi ku lete ohangalo yi kasi viso liove?

⁴ O popia ndati lukuẽle huti, Linga hu fẽle okacinene ka kasi viso liove, osimbu viso liove muẽle ohangalo haimo yi li?

⁵ Okuambambe! tete upa ohangalo viso liove, noke o mola ciwa oku upa okacinene viso liukuẽle.

⁶ Ko ka eci eci ci kola kolombua, ndaño olomota viondongo ko ka vi imbi kolongulu sanga vi vi kosa kuenje vi ñualapo oku vu kanya.

⁷ Pingi, kuenje cu wihiwa, vanji, kuenje vu sanga; totoli, kuenje liu yikuluilua.

⁸ Momo u o pinga o tambula, u o vanja o sanga, u o totola liu yikuluilua.

⁹ Helie pokati kene nda omõlaye u pinga ombolo eye u wiha ewe?

¹⁰ Pamue nda u pinga olusi eye u wiha onyoha?

¹¹ Oco, nda ene vulondingaĩvi wa kũlĩhi oku eca oviali viwa komãla vene, Isiene o kasi kilu hẽ, ka velipo oku avela ava vo pinga ovina viwa?

¹² Oco ovina viosi vu yongola okuti omanu vo linga haivio vu va linga. Momo eci oco esĩla liovihandeleko kuenda elongiso liovaprofeto.

¹³ Iñilili vombundi ya sukatela, momo ombundi yoku iñila koku nyõleha ya tanda, kuenda onjila yendako ya sanjavala, kuenje va lua va iñililamo.

¹⁴ Puãi ombundi yoku iñila komuenyo ya sukatela, lonjila yaco ya tĩla, kuenje vañamiñami va yi sanga.

¹⁵ Lunguki lovaprofeto vesanda, vana veya kokuene luwalo wolomeme, puãi vokati kavo va linga ovimbungu vi kukulula.

¹⁶ Vu va limbukila kapako avo. Va la yunga ayuva kolosongo pamue akuyu kasõsa?

¹⁷ Ndati, oviti viosi viwa vima apako awa, puãi uti ũvi wima apako ha-awako.

¹⁸ Uti uwa ko tẽla oku ima apako ha-awako, haico uti ũvi ko tẽla oku ima apako awa.

¹⁹ Uti wosi ka wimi apako awa u timbuiwa kuenje wimbiwa vondalu.

²⁰ Oco vu va limbukila kapako avo.

²¹ Havosiko va popia lame vati, A Ñala, a Ñala, va iñila vusoma wokilu, te u o linga ocipango ca Tate o kasi kilu.

²² Keteke liaco va lua va popia lame vati, A Ñala, a Ñala, ka tua imbaile hẽ owanji wondaka vonduko yove? Ka tua tundaisaile hẽ ovilũlu vonduko yove? Ka tua lingile ovonene a lua vonduko yove?

²³ Oco mopia lavo siti, Sia lo kũlĩhi. Nundi, alondingaĩvi.

²⁴ Wosi o yeva olondaka evi viange kuenje o vi linga wa soka ndomunu wa lunguka wa tungila onjo yaye vohanda.

²⁵ Ombela ya loka, andunde eya, ofela ya sika, kuenje ya veta onjo, onjo yaco puãi ka ya kupukile omo ya tungiwila vohanda.

²⁶ Wosi o yeva olondaka evi viange kuenje ka vi lingi wa soka ndomunu ka lungukile, yu wa tungila onjo yaye veseke.

²⁷ Ombela ya loka, andunde eya, ofela ya sika, ya veta onjo kuenje ya kupuka, okunyõleha kuayo kua lua.

²⁸ Eci Yesu a mala olondaka evi, oco owiñi womanu wa komoha okulongisa kuaye,

²⁹ momo wa va longisa ndu o kuete omoko, handavakuavisonehua vavoko.