MATEO 6 - Embimbiliya - Bíblia Sagrada em Umbundu

¹ Lunguki lovilinga viene viohenda okuti ko vi lingila kovaso omanu oku sanda oku muiwa lavo. Nda oco vu linga, ko sangi vali onima ku Isiene o kasi kilu.

² Oco, eci weca oviali kolosuke, ku ka sikile enguena kovaso ove ndeci vakuambambe va lingainga volosunangonga lo valuwa oku sanda oku sivayiwa lomanu. Ocili mopia lene siti, Va sanga ale onima yavo.

³ Puãi eci weca oviali kolosuke, epĩli liove ka li ka kũlĩhe eci ci linga ondio yove

⁴ okuti oviali viove vi eciwa uyombeki, kuenje So, u o lete covuyombeki, o ku muisa onima.

⁵ Eci vu likutilila, ko ka lingi ndeci vakuambambe va lingainga, momo va sole oku talama volosunangonga lo panyaha aluwa oku sanda oku muiwa lomanu. Mopia lene siti, Ocili va sanga ale onima yavo.

⁶ Puãi ove, eci o likutilila, iñila vohondo yove kuenje oku yila epito, likutilila ku So o kasi vuyombeki, kuenje So o lete covuyombeki o ku muisa onima.

⁷ Kuenda vali eci vu likutilila ko ka pitololi ño-o olondaka vioku patekela ndeci vakualofeka va lingainga, momo va soka vati, Tu yeviwa omo olondaka vietu via lua.

⁸ Ko ka lisokisi lavo, momo Isiene wa kũlĩha ovina vio sesameli osimbu ka wa vi pingili.

⁹ Oco likutilili ndeci, hoti, A Isietu o kasi kilu. Onduko yove yi sumbiwe.

¹⁰ Usoma wove wiye. Ocipango cove ci lingiwe posi ndeci ci lingiwa kilu.

¹¹ Tu ihe okulia kuetu kuetaili.

¹² Tu ecele okulueya kuetu ndeci tu ecaila ava va tu lueyela.

¹³ Ku ka tu songuile veyonjo, puãi tu popele kũvi. Momo usoma, wove; unene, wove; ulamba, wove; oloneke vi enda ño-o hũ. Amene.

¹⁴ Momo nda weceli omanu ahuku avo oco Isiene o kasi kilu ecelavo ahuku ene.

¹⁵ Puãi nda ene ka weceli omanu ahuku avo, Isiene haico ka ecela ahuku ene.

¹⁶ Eci vu likandangiya okulia ko ka nyumali nda vakuambambe. Momo ovo va vĩhisa ovipala viavo okuti okulikandangiya kuavo okulia ku muiwa lomanu. Mopia lene siti, Ocili va sanga ale onima yavo.

¹⁷ Puãi ove, eci o likandangiya okulia, waveka utue wove loku pusa kocipala

¹⁸ okuti okulikandangiya kuove okulia ka ku muiwa lomanu puãi ku muiwa la So o kasi vuyombeki, kuenje So o lete covuyombeki o ku muisa onima.

¹⁹ Ko ka lisiliyili ukuasi kilu lieve oku ombunji longuyu yi lia lia, haiko ovimunu vi tuiyila loku iva.

²⁰ Puãi lisiliyili ukuasi kilu, oku ndaño ombunji, ndaño onguyu, ka yi li, haiko ovimunu ka vi tuiyila loku iva.

²¹ Momo oku ku kasi ukuasi wove haiko ku kala utima wove.

²² Iso olio ondiyelo yetimba. Oco iso liove, nda li yela, etimba liove liosi li kala locinyi.

²³ Puãi iso liove nda lia vuvala, etimba liove liosi li kala lowelema. Ocinyi ci li vokati kove nda owelema, owelema waco owelema muẽle.

²⁴ Lomue o tẽla oku vumba vacime vavali, momo pamue umue u suvuka lukuavo u sola, pamue o sumbila umue lukuavo u lavisa. Ko tẽla oku vumba Suku kuenda ukuasi.

²⁵ Oco mopia lene siti, Ko ka kali lohele yomuenyo wene, hoti, Tu lia nye? Tu nyua nye? pamue yetimba liene hoti, Tu wala nye? Omuenyo hẽ, ka wa velelepo okuti okulia ku sule? Etimba hẽ, ka lia velelapo okuti uwalo u sule?

²⁶ Sokololi olonjila okuti ka vi limi, ka vi lombola, ka vi unguila volosila, haimo Isiene ukuailu o vi tekola. Ene hẽ, ka wa velelipo ca lua okuti ovio vi sule?

²⁷ Elie kokuene o tẽla oku vokiya ukeya kutunga waye ndaño wo sakalaela?

²⁸ Nye vu kasilili lohele yuwalo? Sokololi oloneleho viusenge ndeci vi kula kula, ka vi lingi upange, ka vi poti.

²⁹ Haimo lumue ndu sapuili siti, Ndaño Salomone vulamba waye wosi ka la wala uwalo wa posoka ndowu woneleho yimue pokati kavio.

³⁰ A vakuekolelo litito, nda Suku o walisa ndoco owangu wovusenge u kasi etaili kuenje hẽla wimbiwa vofolono, ene hẽ, ko walisi ca velapo vali?

³¹ Oco ko ka kali lohele, hoti, Tu lia nye? pamue tu nyua nye? pamue tu wala nye?

³² Momo ovina viaco ovio vakualofeka va sakalala ño lavio oku vi sanda. Ene puãi, Isiene o kasi kilu wa kũlĩha ale okuti vu sesamela ovina evi viosi.

³³ Puãi tete vanjiliyi usoma waye kuenda, esunga liaye, kuenje ovina evi viosi viu vokiyiwi.

³⁴ Oco ko ka kali lohele ya hẽla momo hẽla yi kala lohele yalio. Ohali yeteke liongongo yi tẽla eteke liaco.