MATEO 5 - Embimbiliya - Bíblia Sagrada em Umbundu

¹ Oco oku mola owiñi eye wa londa komunda. Eci a tumala olondonge viaye vieya kokuaye.

² Oku asama wa va longisa, hati,

³ Vakuosuke wovutima va sumũlũha, momo usoma wokilu wavo.

⁴ Ava va lila va sumũlũha, momo va lembiwa.

⁵ Ava vomboka vutima va sumũlũha, momo va piñala ofeka.

⁶ Ava va kuete onjala lenyona liesunga va sumũlũha, momo ve kuta.

⁷ Vakuahenda va sumũlũha, momo va mola ohenda.

⁸ Ava va yela vutima va sumũlũha, momo va mola Suku.

⁹ Ava va koka ombembua va sumũlũha, momo va tukuiwa omãla va Suku.

¹⁰ Ava va yambuilua esunga va sumũlũha, momo usoma wokilu wavo.

¹¹ Nda omanu vo njimbuili loku vu fũkĩlisila loku vu ndundilila ovina viosi vĩvi, wa sumũlũhi.

¹² Sanjuki, yoleli ca lua, momo onima yene kilu ya lua, momo haico va fũkĩlisa ovaprofeto vo liangeli.

¹³ Ene vumongua wokilu lieve, puãi omongua nda wa sava vu savulula le? Ko silivila vali cimue, te oku u winasi ho liatailaiwa lomanu.

¹⁴ Ene vucinyi coluali. Imbo lia tungiwa komunda ka li vundisiwa.

¹⁵ Ndaño ondiyelo ka va yi mika ha va yi tuvika lonjongo, puãi va yi tumbika komesa kuenje yi taimila vosi va kasi vonjo.

¹⁶ Ocinyi cene ci taimile ndoco kovaso omanu okuti va mola ovilinga viene viwa kuenje va sivaya Isiene o kasi kilu.

¹⁷ Ko ka soki hoti, Weyilila oku imula ovihandeleko pamue ovaprofeto. Sieyilile oku vi imula te oku vi tẽlisa.

¹⁸ Ocili, mopia lene siti, Toke ilu longongo vi takata okatosi pamue okotayo kovihandeleko ka ka takata te ovina viosi vi lingiwa.

¹⁹ Oco, nda umue o sama cimue citito covihandeleko evi kuenje o longisa omanu oku ci lingavo, o tukuiwa o sule vusoma wokilu. Puãi umue, nda o vi linga loku vi longisa, o tukuiwa unene vusoma wokilu.

²⁰ Momo mopia lene siti, Nda esunga liene ka li velipo esunga lia vakuavisonehua leli lia va Fariseo lalimue eteke wiñili vusoma wa Suku.

²¹ Wa yevi okuti ca popiwa ku vakukululu, citi, Ku ka ponde, wosi o ponda o tualiwa vekanga.

²² Puãi ame mopia lene siti, Wosi o tema lokuavo o tualiwa vekanga; lu o popia lokuavo hati, Vucitumbefe, o tualiwa vekanga linene; lu o popia hati, Vuveke, wa loña konjembo yondalu.

²³ Oco osimbu o kasi loku lumbila ocilumba cove kutala, nda wivaluka okuti ukuẽle o kasi love londaka,

²⁴ oco, siapo ocilumba cove putala, kuende, ka lisunguluise handi lukuẽle, oco noke wiye, o lumbe ocilumba cove.

²⁵ Linalisa lombili lu o ku kuetele ondaka osimbu o kasi laye vonjila yoku enda kekanga, sanga o ku pindika kukuekanga kuenje ukuekanga o ku eca kukuenje welombe kuenje ove o yikiwa vokayike.

²⁶ Mopia love siti, Ocili ku tundimo vali te wa feta olusendu lua sulako.

²⁷ Wa yevi okuti ca popiwa citi, Ku ka pekelise,

²⁸ puãi ame mopia lene siti, U wa vanja ukãi ho liveli, vutima waye wo pekelisa ale.

²⁹ Nda iso liove liondio li ku lingisa ekandu li upamo, li inasi; momo hise ocimatamata cove cimuamue oku nyõleha, etimba liove liosi oku imbiwa vonjembo ca kãla vali enene.

³⁰ Kuenje, nda eka liove liondio li ku lingisa ekandu, li tetako, li inasi, momo hise ocimatamata cove cimuamue oku nyõleha, etimba liove liosi oku imbiwa vonjembo ca kãla vali enene.

³¹ Ca popiwavo citi, Wosi o nyala ukãi waye a wihe ukanda woku nyala.

³² Ame puãi mopia lene siti, Wosi o nyala ukãi waye, nda handaka yoku pekelisako, u lingisa okahonga, kuenje u o kuela ukãi wa nyaliwa, o lingavo ukahonga.

³³ Wa yevi vali okuti ca popiwa ku vakukululu citi, Ku ka lisinge lesanda puãi tẽlisa asingo wa lisinga la Ñala.

³⁴ Puãi ame mopia lene siti, Ku ka lisinge la naito, ndaño lilu, momo olio omangu ya Suku,

³⁵ ndaño longongo, momo oyo ociliatelo colomãi viaye, ndaño la Yerusalãi momo olio imbo lia Soma yinene.

³⁶ Haico, ku ka lisinge lutue wove momo ku tẽla oku linga esinga liaco limuamue olumbi pamue oku li tekavisa.

³⁷ Okupopia kuene ku linge nda oco, oco; nda hacoko, hacoko. Cosi ci pitahãla evi ca tunda kevĩho.

³⁸ Wa yevi okuti ca popiwa citi, Iso liso, eyo leyo.

³⁹ Puãi ame mopia lene siti, Ko ka litamalali londingaĩvi, puãi u wa ku veta ocikusi ketama liondio u pongoluila ketama liepĩli.

⁴⁰ Umue nda o yongola oku ku sombisa ha tambula ombinja yove, wihavo ocikutu cove.

⁴¹ U o ku kisika oku enda usenge umuamue, kuende laye vivali.

⁴² Avela u wa ku pinga. Ku ka limile u o yongola oku ku undila.

⁴³ Wa yevi okuti ca popiwa citi, Sola ukuẽle, suvuka unyali wove.

⁴⁴ Puãi ame mopia lene siti, Soli ovanyali vene, likutilili ava vo fũkĩlisa,

⁴⁵ oco vu linge omãla va Isiene o kasi kilu, momo o tundasaila ekumbi liaye kolondingaiwa lo kolondingaĩvi; kuenje o lokasaila ombela vakuesunga la vakuevĩho.

⁴⁶ Momo nda vu sole ava vo soli, vu kuete onima ye? Vakuakutambula elisimu hẽ, ka va ci lingaingavo?

⁴⁷ Nda vu lama vakuẽle lika, wa lingi nye ca velapo? Vakualofeka hẽ, ka va ci lingaingavo?

⁴⁸ Oco ene, pitili koseteko yesunga lia suapo ndeci Isiene o kasi kilu ukuesunga lia suapo.