MATEO 3 - Embimbiliya - Bíblia Sagrada em Umbundu

¹ Koloneke viaco kueya Yoano Upapatisi, wa kundila vekalasoko lia Yudea, hati,

² Likekembeli akandu ene momo usoma wokilu u kasi ocipepi.

³ Momo u, eye una wa tukuiwa luprofeto Isaya eci a popia hati, Ondaka yukuakuvilikiyila vekalasoko, yiti, Peli onjila ya Ñala. Suñamisi alila aye.

⁴ Yoano wa wala uwalo wovonya ongamelo kuenda uvia wombandua vombunda yaye. Wa lia lia olohuma lowiki wombula.

⁵ Oco va Yerusalãi, la va Yudea yosi, la vakuafeka yosi yo ko Yordão, vosi va tundila kokuaye.

⁶ Kuenje, oku likekembela akandu avo, va papatisiwa laye volui Yordão.

⁷ Eci a mola okuti va lua va Fariseo la va Sadukeo veyilila epapatiso liaye, oco wa popia lavo hati, Ambuto yolonyoha, helie wo lunguli oku tila onyeño yiya?

⁸ Imi apako a sungulukila epongoloko liutima.

⁹ Ko ka soki oku popia litima viene hoti, Tu kuete ale kukululu Avirahama, momo mopia lene siti, Suku o tẽla oku pindula ovawe a ha a lingi omãla va Avirahama.

¹⁰ Momo cilo muẽle ondiaviti yi kasi ale kolombombo vioviti, kuenje uti wosi ka wimi apako awa u timbuiwa loku imbiwa vondalu.

¹¹ Ame ndu papatisili vovava, oku vu papatisila epongoloko liutima, puãi u o ñuai vonyima wa mbelapo. Sia sungulukilile oku ambata olohaku viaye. Eye u papatisili le Espiritu Sandu londalu.

¹² Ocipekulo caye ci li peka liaye. O yelisa ocimbandi caye. Unguila otiliku yaye vosila, puãi o yoka ovinene londalu ka yimiwa.

¹³ Oco Yesu, oku tunda ko Galilea, weya ku Yoano ko Yordão ha papatisiwa laye.

¹⁴ Puãi Yoano wa si oku u tutuiya hati, Ame, ame sesamela oku papatisiwa love, ove puãi wiya kokuange?

¹⁵ Yesu wo kumbulula hati, Handi ci kale ndomo ci kasi, momo ca tu sesamela oku tẽlisa esunga liosi. Oco wo tava.

¹⁶ Tuli Yesu a papatisiwa haico a tunda vovava kuenje ilu lio situlukila, yu wa mola Espiritu lia Suku li loka ndopomba kuenje lio vata.

¹⁷ Kuenje ondaka ya tunda vilu, ya linga yiti, U, Eye Omõlange wa soliwa, ndo sanjukila.