MATEO 28 - Embimbiliya - Bíblia Sagrada em Umbundu

¹ Kovaso yesambata, eci eteke liatete kosimanu lia fetika oku ca, oco Maria u Magadala kuenda Maria ukuavo veya oku nyula keleva.

² Kuenje tala, kueya ocilemawe ya lua, momo ungelo wa Yehova wa loka kilu, kuenje weya, wa tiñululako ewe liaco, kuenje wa tumalako.

³ Kuenje okumoleha kuaye kua soka ndociliakulo, luwalo waye u yela ndocikokoto.

⁴ Olondavululi vio lulumila, usumba ka vi likuete, yu via linga ndovivimbi.

⁵ Ungelo wa popia lakãi hati, Ko ka kali lusumba momo ndi ci okuti vu sanda Yesu wa valeliwile kekulusu.

⁶ Mulo kemo, momo wa pinduka ndeci a popele. Enjui, ndo tali apa Ñala a pekelele.

⁷ Kuendi lombili, ka sapuili olondonge viaye hoti, Wa pinduka kovilangu, kuenje tali, u liangeli ko Galilea, oko vu ko muila. Tali, ndo ci sapuili.

⁸ Kuenje va tunda lombili keleva lusumba lonjolela ya lua, kuenje va lupuka oku ka ci sapuila olondonge viaye.

⁹ Kuenje tala, Yesu wa ñualehela lavo, hati, Kalungi. Ovo vamako, vo kuata kolomãi kuenje vo fendela.

¹⁰ Oco Yesu wa popia lavo hati, Ko ka kali lusumba. Kuendi, ka pañinyi vakuetu okuti va ende ko Galilea, kuenje oko va ka muila.

¹¹ Osimbu va kala loku enda, tala, olondavululi vimue vieya vimbo, via sapuila ovitunda vinene ovina viosi via lingiwa.

¹² Kuenje eci va liongolola kumue lovakulu oco va limba onumbi, kuenje va iha asualali olombongo via lua,

¹³ vati, Lingi hoti, Olondonge viaye vieya uteke, kuenje vio yombololamo osimbu tua pekela.

¹⁴ Kuenje nda ondaka eyi yi yevala ku nguluvulu tu ko livondela ha tu vupi onguele.

¹⁵ Oco va tambula olombongo viaco kuenje va linga ndeci va imbiwa onumbu, kuenje ondaka yaco ya sandoka pokati ka va Yudea toke ketaili lilo.

¹⁶ Puãi olondonge ekui la mosi via enda ko Galilea toke komunda yina Yesu a va tukuila.

¹⁷ Kuenje eci vo mola vo fendela, puãi vamue va tatãla.

¹⁸ Kuenje Yesu weya kokuavo, wa popia lavo hati, Uviali wosi wokilu lowu wokilu lieve wa nyihiwa.

¹⁹ Oco kuendi, ka tavisi olofeka viosi oco va linge olondonge. Va papatisili vonduko ya Tate la Mõla, kuenda Espiritu Sandu.

²⁰ Va longisi oku linga ovina viosi ndo kundiki. Kuenje ame ñasi lene kumue oloneke viosi toke kesulilo lioluali.