MATEO 27 - Embimbiliya - Bíblia Sagrada em Umbundu

¹ Eci kua ca omele oco ovitunda vinene viosi lakulu vofeka va tumbika ongombo yoku u wipa.

² Kuenje vo kuta, vo wambatela kukolo, yu vo weca ku nguluvulu Pilato.

³ Oco Yuda, una wo pakula, eci a mola okuti Yesu wa pisiwa, wa livela kuenje wa tiula olopalata viaco akui atatu kovitunda vinene lakulu.

⁴ Wa linga hati, Nda linga ekandu omo nda pakula osonde ya pua eko. Puãi va popia vati, Ci tu linga nye? Eci cove, hacetuko.

⁵ Kuenje olopalata viaco wa vi imba vonembele yu wa tunda, wa enda, wa liponda.

⁶ Oco ovitunda vinene via yelula olopalata viaco kuenje viti, Ka ci tava oku vi kapa vombango momo ondando yosonde.

⁷ Oco via limba onumbi, kuenje via landa usenge wukuakutunga olombia ho lingi ayambo akombe.

⁸ Oco usenge waco wa tukuiwa Usengewosonde toke ketaili lilo.

⁹ Oco ca lingiwa eci ca popia uprofeto Yeremiya hati, Kuenje va yelula akui atatu kolopalata, haivio ondando yu wa tukuiwila ondando la vamue va Isareli,

¹⁰ kuenje va landa lavio usenge wukuakutunga olombia, ndeci Ñala a sapuila.

¹¹ Yesu wa talama kovaso a nguluvulu kuenje nguluvulu wo pula hati, Ove usoma ya va Yudea ale? Yesu wo kumbulula hati, Ove, ove wa ci popia.

¹² Puãi, eci a pindikiwa lovitunda vinene lakulu, lacimue a kumbulula.

¹³ Oco Pilato wa pula hati, Ku yevite ndeci va ku pindikila ovina via lua?

¹⁴ Puãi ko kumbuluile cimue, oco nguluvulu wa komoha ca lua.

¹⁵ Kua kala ocituwa okuti ko Pascoa nguluvulu o kutuluila owiñi omandekua yimue va yongola.

¹⁶ Oloneke viaco va kala lomandekua yimue ya kemala, onduko yaye Baraba.

¹⁷ Oco eci va liongolola, Pilato wa popia lavo hati, Vu yongola okuti ndu kutuluili elie? Baraba ale, ele Yesu wa tukuiwa Kristu?

¹⁸ Momo wa limbuka okuti vo pakuila ño onya.

¹⁹ Kuenda vali, osimbu a tumala komangu yekanga ukãi waye wa tumile kokuaye hati, Ku ka linge cimue omunu una ukuesunga, momo etaili nda tala ohali vonjoi ndo lotela.

²⁰ Puãi ovitunda vinene lakulu va tutuminya owiñi okuti va pinga oku kutulula Baraba loku ipaya Yesu.

²¹ Nguluvulu wa popia lavo hati, Po kavali kavo vu yongola okuti ndu kutuluilipo elie? Kuenje vati, Baraba.

²² Pilato wa popia lavo hati, Nda oco, Yesu wa tukuiwa Kristu, ndu linga nye? Vosi va linga vati, A valeliwe kekulusu.

²³ Oco nguluvulu wa popia hati, Puãi nye? Caco cĩvi a linga, ce? Lopo va vilikiya enene vati, A valeliwe kekulusu.

²⁴ Oco, eci Pilato a limbuka okuti ka tẽla cimue, puãi ca laika oku wengula ema, oco wa nyañula ovava, wa pusila ovaka kovaso owiñi, kuenje hati, Ame nda lipua osonde yomunu u ukuesunga. Eci cene, hacangeko.

²⁵ Kuenje omanu vosi va kumbulula vati, Osonde yaye yi tu wile etu lomãla vetu.

²⁶ Oco wa va kutuluila Baraba. Wa tipuisa Yesu kuenje wo weca oku valeliwa kekulusu.

²⁷ Oco asualali a nguluvulu va tuala Yesu vombonge kuenje vo wongoluila owiñi wavo vosi.

²⁸ Oco vo lula uwalo kuenje vo walisa onanga yohusu.

²⁹ Va pata ekolowa liolosongo yu vo li walisa. Va kapa oluneva peka liaye liondio. Oku kekamela kolongolo kovaso aye vo fuanguila vati, A Hosi, a Kuku, a Soma ya va Yudea.

³⁰ Vo siyila, kuenje oku nyeha oluneva vo veta laluo kutue.

³¹ Oco eci vo fuanguila, vo lula onanga yohusu kuenje vo walisa uwalo waye. Noke vo wambata ha vo valelisa kekulusu.

³² Eci va tunda va sanga omunu umue u Kurene onduko yaye Simone, vo wambatisa ekulusu lia Yesu.

³³ Eci va pitila kusenge wa tukuiwa Gongota, ca lomboloka usenge wekõlokõlo,

³⁴ vo wiha ovinyu via tengiwa londulu. Puãi eci a vi maha ka tavele oku nyua.

³⁵ Eci vo valela kekulusu, oco va lianjela pokati kavo uwalo waye oku u limbaila ocela.

³⁶ Eci va mala va tumalako oku u lava.

³⁷ Kilu liutue waye va kapako ocisonehua ceko liaye, citi, U YESU, SOMA YA VA YUDEA.

³⁸ Oco ovingumba vivali via valelua kumue laye kakulusu, cimue kondio, cikuavo kepĩli.

³⁹ Ava va vinjukako, oku lipuka ovitue, vo popia etonãi,

⁴⁰ kuenje vati, Okuakunyõla onembele, kuenje o yi tunga vali koloneke vitatu, lipopela ove muẽle. Nda vumõla a Suku, loka kekulusu.

⁴¹ Haicovo ovitunda vinene la vakuavisonehua lakulu vo fuanguila vati,

⁴² Wa popela vakuavo, ka tẽla oku lipopela eye muẽle. Eye Soma ya va Isareli! A tuluke kekulusu oco tu tava kokuaye.

⁴³ Eye wa kolela Suku. Kaliye Suku o popele, nda Suku u yongola! Momo wa popele hati, Ndimõla a Suku.

⁴⁴ Kuenje ovingumba via valelua kakulusu kumue laye vio savulavo.

⁴⁵ Tunde kola yepandu toke kola yecea kua kala owelema kofeka yosi.

⁴⁶ Kuenje eci ca soka ndola yecea Yesu wa vilikiya londaka yinene hati, Eli, Eli, lama sabakatani? Ca lomboloka hati, A Suku yange, a Suku yange, wa njandulukila nye?

⁴⁷ Kuenje vamue va kalako, eci va ci yeva, va linga vati, U o kasi loku kovonga Eliya.

⁴⁸ Ndopo umue wa yoloka, wa nyañula onjavi, wa yi yukisa indangele, wa yi kapa koluneva, kuenje wo nyuisa.

⁴⁹ Vakuavo vati, Ci kale. Tu tali nda hẽ eliya iya oku u popela.

⁵⁰ Kuenje Yesu, oku vilikiya vali londaka ya lua, wa tula omuenyo.

⁵¹ Kuenje tala, ongumbo yonembele ya toka tunde kilu toke posi, kuenje osi ya luluma lovawe a toka.

⁵² Olosonje laviovo via yuluka, kuenje ovivimbi via lua violosandu via pekelele via pinduka.

⁵³ Oku tunda volosonje kovaso yepinduko liaye va iñila vimbo li kola, kuenje va tukulukila komanu va lua.

⁵⁴ Eci kesongo lava va kala laye oku lava Yesu va mola osi ya luluma lovina via lingiwa, oco va yokoka ca lua vati, Ocili u Omõla a Suku.

⁵⁵ Kua kalavo akãi va lua, vana va sindikila Yesu loku u vumba tunde ko Galilea. Va talela kupãla.

⁵⁶ Pokati kavo pa kala Maria u Magadala, la Maria ina ya Tiago la Yosefe, kuenda ina yomãla va Sebedeo.

⁵⁷ Eci ca linga oñolosi kueya ohuasi, u Arimateya, onduko yaye Yosefe haeye oñame ya Yesu.

⁵⁸ Eye wa enda ku Pilato kuenje wa pinga ocivimbi caco. Oco Pilato wa tuma oku ci eca kokuaye.

⁵⁹ Kuenje Yosefe wa nyañula ocivimbi, wa ci muña vonanga yovalatanya yi yela,

⁶⁰ kuenje wa ci langeka veleva liaye liokaliye lia songiwa vesenje. Noke wa tiñuluila ewe linene kuvelo weleva kuenje wa tundako.

⁶¹ Maria u Magadala wa kalako, la Maria ukuavo. Va tumalela kovaso yeleva.

⁶² Hẽla yaco, hailio eteke liokovaso yeliangiliyo, ovitunda vinene la va Fariseo va liongoluila ku Pilato,

⁶³ kuenje vati, A Kuku, tua ivaluka okuti ondimbiki eyi, eci a kala lomuenyo, wa lingile hati, Kovaso yoloneke vitatu minduka.

⁶⁴ Oco handeleka okuti eleva li kolisiwa toke keteke liatatu sanga olondonge viaye viya, viu yombololamo, kuenje vi popia lomanu viti, Wa pinduka ku vakuavilangu, kuenje elimbi lia sulako li piãla, okuti liatete li sule.

⁶⁵ Pilato wa popia lavo hati, Vu kasi lolondavululi. Kuendi, ka kolisi ciwa eleva ndeci wa kũlĩhi.

⁶⁶ Oco va enda, kuenje va kolisa eleva poku sitika ewe liaco loku kapako olondavululi.