MATEO 26 - Embimbiliya - Bíblia Sagrada em Umbundu

¹ Eci Yesu a mala olondaka evi viosi, wa popia lolondonge viaye hati,

² Vu ci okuti kovaso yoloneke vivali kuli o Pascoa kuenje Mõlomanu o pakuiwa ha valeliwa kekulusu.

³ Oco ovitunda vinene lakulu vofeka va liongoluila vocitali cocitunda cinene, Kayafa.

⁴ Va tumbika ongombo yoku kuata Yesu lelimbi ha vo wipa.

⁵ Puãi va linga vati, Kofesta yo Pascoa hakoko sanga kuiya ema pokati komanu.

⁶ Oco, eci Yesu a kala ko Betánia, vonjo ya Simono ukuavilundu,

⁷ ukãi umue weya kokuaye lokambutika konguendu ya tĩla ca lua. Kuenje wa yi itila kutue waye eci a tumala komesa.

⁸ Puãi, eci olondonge via ci mola, via fungula viti, Epese eli wa li lingila nye?

⁹ Momo nda ca tavele oku yi landisa olombongo via lua loku vi eca kolosuke.

¹⁰ Puãi Yesu, oku ci limbuka, wa popia lavo hati, Nye vu luahãlisila ukãi u? Momo wa ndingila upange uwa.

¹¹ Momo olosuke vi kasi ño-o hũ lene, puãi ame si kasi hũ lene.

¹² Eci a itila onguendu eyi ketimba liange oco wa ci lingila okukendiwa kuange.

¹³ Ocili mopia lene siti, Kuosi ondaka yiwa yi kundilua voluali luosi, eci ca linga ukãi u ci sapuiwa ndonjivaluko yaye.

¹⁴ Oco umue pekui la vavali, haeye Yuda Isikariote, wa enda kovitunda vinene.

¹⁵ Wa linga hati, Vu nyiha nye nda ndu pakuila kokuene? Kuenje vo pesalisila akui atatu kolopalata.

¹⁶ Tunde opo wa sanda evelo lioku u pakula.

¹⁷ Keteke liatete lioloneke violombolo ka vi kuete etumbisa oco olondonge vieya ku Yesu, vio pula viti, Ku pi o yongola okuti oko tu ku yalela okulia kuo Pascoa?

¹⁸ Eye wa kumbulula hati, Kuendi vimbo, kungandi, ka popi laye hoti, Ulongisi wa linga hati, Eteke liange li li ocipepi. Ndila o Pascoa vonjo yove kumue lolondonge viange.

¹⁹ Oco olondonge via linga ndeci Yesu a vosika kuenje va pongiya o Pascoa.

²⁰ Eci ca linga oñolosi eye wa tumala komesa kumue lolondonge ekui la vivali.

²¹ Osimbu va kala loku lia eye wa popia hati, Mopia lene siti, Ocili, umue pokati kene o makula.

²² Ca va vala ca lua, kuenje va fetika vosi oku u pula umue umue vati, A Ñala, ame?

²³ Eye wa kumbulula hati, U wa miñila kumue lame pelonga, eye o makula.

²⁴ Mõlomanu enda ndeci co sonehelua puãi u u pakula, ngongo yaye. Hise nda omunu waco ka vo citile.

²⁵ Yuda una wo pakula, wo pula hati, A Rambei, ame nga? Yesu wo kumbulula hati, Ove wa ci popia.

²⁶ Osimbu va kala loku lia oco Yesu wa nyañula ombolo, wa yi panduila kuenje wa yi timbula, yu wa yeca kolondonge, kuenje hati, Tambuli, li, ombolo eyi etimba liange.

²⁷ Oku nyañulavo okopo, wa yi panduila, wa yi eca kokuavo hati, Nyuiko vosi;

²⁸ momo eyi osonde yange yocisila, yi peseliwila va lua ongecelo yakandu.

²⁹ Puãi mopia lene siti, Kepako eli liuyuva, tunde opo, si nyuiko vali, toke keteke ndi nyuila liokaliye kumue lene vusoma wa Tate.

³⁰ Eci va imba ocisungo oco va tunda, va enda komunda yo Oliveira.

³¹ Oco Yesu wa popia lavo hati, Uteke ulo ene vosi vu natamisilua, momo ca sonehiwa citi, Njipa ungombo kuenje olomeme viocunda caco vi sandoka.

³² Puãi eci ndi pinduka oco ho livangeli ko Galilea.

³³ Petulu wa kumbulula longusu hati, Ndaño vosi va ku yanduluka ame lalimue eteke hu yanduluka.

³⁴ Yesu wa popia laye hati, Mopia love siti, Ocili, uteke ulo, osimbu ekondombolo ka lia lilile, o liñala lutatu.

³⁵ Petulu wa popia laye hati, Ndaño fila kumue love haimo si ku likali. Haico olondonge viosi via popiavo.

³⁶ Oco Yesu wa enda lavo vocumbo onduko yaco Gesemane, kuenje wa popia lolondonge viaye hati, Tumali kulo osimbu ngenda oko si likutilila.

³⁷ Wa enda la Petulu lomãla vavali va Sebedeo, yu wa fetika oku sumua loku tokotelua.

³⁸ Oco wa popia lavo hati, Utima wange wa tekela oku fa. Kali kulo, lavuluili kumue lame.

³⁹ Oco wa amako kamue, wa tuvika ocipala posi kuenje wa likutilila hati, A Tate, nda ci tava, okopo eyi yi ndomboke, puãi ndeci nda panga hacoko, te eci ove o panga.

⁴⁰ Kuenje weya kolondonge, yu wa va sanga va pekela kotulo. Oco wa popia la Petulu hati, Ococo, ka wa tẽleli oku lavuluila kumue lame ndaño ola yimuamue?

⁴¹ Lavululi kuenda likutilili okuti eyonjo ka liu sangi. Ocili, utima u kasi lombili puãi etimba lia leñela.

⁴² Kuenje wa enda vali, wa likutilila hati, A Tate, nda ka ci tava okuti okopo eyi yi ndomboka, te ndi yi nyua, oco ocipango cove ci ligiwe.

⁴³ Oco weya vali, wa va sanga va pekela, momo ovaso avo a lemua.

⁴⁴ Kuenje wa va sia vali, wa enda yu wa likutilila onjanja yatatu, olondaka vimuamue haivio a popia.

⁴⁵ Oco eya kolondonge, kuenje wa popia lavo hati, Kaliye pekeli ño, puyuki. Tali, Mõlomanu o pakuiwa povaka a vakuakandu. Ola yaco ya pitila.

⁴⁶ Votoki, tu endi. Tali, u o makula o kasi ocipepi.

⁴⁷ Osimbu a kala loku popia, Yuda, umue pekui la vavali, weya. Weya lowiñi wa lua wava va tumiwa lovitunda vinene lakulu vofeka. Vambata olosipata lolombueti.

⁴⁸ Omakuli ya va ihile ale ondimbukiso, yiti, U ndi sipula eye, u kuati.

⁴⁹ Oco, tuli veya, Yuda wa enda ku Yesu, wo lama hati, A Rambei! a Kuku! kuenje wo sipula.

⁵⁰ Yesu wa popia laye hati, Okuetu, weyilila nye? Oco veya, vo woluĩla ovaka, vo kuata.

⁵¹ Kuenje umue wava va kala la Yesu wolõla eka liaye, wa pola osipata yaye, yu wa veta layo ukuenje wocitunda cinene okuti wa sonja etui liaye.

⁵² Oco Yesu wa popia laye hati, Someha osipata yove vocilalo cayo, momo vosi va kuata osipata va nyõleha losipata.

⁵³ Wa soka okuti si tẽla oku pinga ku Tate hã ha numisa ndopo olohoka viovangelo, okuti ekui liolohoka kolohoka vivali vi sule?

⁵⁴ Puãi nda oco, ovisonehua hẽ, vi tẽlisua ndati? Momo via popia viti, Ci lingiwa ndoco.

⁵⁵ Kola yaco Yesu wa popia lowiñi hati, Weyi lolosipata lolombueti oku ñuata ndocingumba? Eteke keteke nda tumala vonembele oku longisa kuenje ka wa ñuateli.

⁵⁶ Puãi eci cosi ci kasi ndoco okuti oco ovisonehua viovaprofeto vi lingiwe. Oco olondonge viosi vio sia kuenje via tila.

⁵⁷ Oco ava va kuata Yesu va enda laye kocitunda cinene Kayafa oko kua liongoluila vakuavisonehua lakulu.

⁵⁸ Puãi Petulu wo kuama ocituanyima toke kocitali cocitunda cinene, kuenje wa iñila, wa tumala kumue lolondavululi oku mola esulilo liaco.

⁵⁹ Oco ovitunda vinene lekanga liosi va sanda uvangi wuhembi woku pisa Yesu ha vo wipa.

⁶⁰ Kuenje ka vo sangele, ndaño olombangi via lua viuhembi vieya. Puãi noke kueya vavali,

⁶¹ vati, Omunu u wa popia hati, Nẽla oku nyõla onembele ya Suku loku yi tunga vali oloneke vitatu.

⁶² Oco ocitunda cinene ca votoka, ca pula citi, Lacimue o kumbulula? Va ku pindikila nye?

⁶³ Puãi Yesu woha ño. Kuenje ocitunda cinene ca popia laye citi, Hu lisingisa la Suku o kasi lomuenyo siti, Nda ove Kristu, Mõla a Suku, tu ci sapuile.

⁶⁴ Yesu wa popia laye hati, Ove ove wa ci popia, puãi mopia lene siti, Ndopo vu mola Mõlomanu wa tumala kondio ya Tõlo kuenje iyilila kalende okilu.

⁶⁵ Oco ocitunda cinene, oku tola uwalo waye, ca popia citi, Wa popia etonãi. Nye tu yonguila vali olombangi? Ota, wa yevi etonãi.

⁶⁶ Wa soki nye? Vo kumbulula vati, Eye wa sesamela oku fa.

⁶⁷ Oco va siyila kocipala, kuenje vo veta. Vamue oku u patula,

⁶⁸ vati, A Kristu, pilula. Tu sapuile, Helie wa ku veta?

⁶⁹ Petulu wa tumala posamua vocitali. Kuenje ufeko umue upika weya kokuaye hati, Ndaño ove wa kalavo la Yesu u Galilea.

⁷⁰ Puãi Petulu wa likalela kovaso avo vosi, hati, Eci o popia, si ci.

⁷¹ Eci a tundila koluwa ufeko ukuavo upika wo mola, kuenje wa popia lomanu va kalapo hati, U wa kala kala la Yesu u Nasara.

⁷² Oco wa likala vali loku lisinga hati, Omunu waco siu wi.

⁷³ Okasimbu naito ño ava va talamako veya, va popia la Petulu vati, Ocili ove u wavo, momo elimi liove li ku sapula.

⁷⁴ Oco Petulu wa fetika oku lisiñala loku lisinga hati, Omunu waco siu wi, kuenje haico ekondombolo lia lila.

⁷⁵ Haico Petulu a ivaluka ondaka Yesu a popele hati, Osimbu ekondombolo ka lia lilile, o liñala lutatu. Kuenje wa tunda, yu wa lila ca piãla.