MATEO 25 - Embimbiliya - Bíblia Sagrada em Umbundu

¹ Oco Usoma wokilu u sokisua lekui liafeko va yelula olondiyelo viavo kuenje va tunda oku upilila sandombua.

² Vatãlo va wulua, vatãlo va lunguka.

³ Ava va wulua va ambata olondiyelo viavo, puãi ka va ambatele ulela waco.

⁴ Puãi ava va lunguka va ambata ulela vovikuata kumue lolondiyelo viavo.

⁵ Oco, omo sandombua keyile lombili, vosi va suñila kuenje va pekela.

⁶ Puãi vokati kuteke va yeva evilikiyo liti, Tali, sandombua weya! Tundi, ko wupililili.

⁷ Oco afeko vosi va pasuka kuenje va pongiya olondiyelo viavo.

⁸ Ava va wulua va popia lava va lunguka, vati, Tu ihiko kamue okolela momo olondiyelo vietu vi kasi loku ima.

⁹ Ava va lunguka va kumbulula vati, Sanga ulela waco ka u tu tẽla, lene letu. Hise nda wendi kolondandisi ha vu lilandela ene muẽle.

¹⁰ Osimbu va ka landa, sandombua weya kuenje ava va lipongiya ale va iñila laye kuvala, kuenje ava va lipongiya ale va iñila laye kuvala, kuenje epito lia yikiwa.

¹¹ Noke afeko vakuavo veyavo va popia vati, A Ñala, a Ñala, tu yuluileko.

¹² Puãi eye wa kumbulula hati, Mopia lene locili siti, Siu wi.

¹³ Oco lavululi, momo ka wa kũlĩhili eteke liaco, ndaño ekumbi.

¹⁴ Momo ca linga ndomunu wa soka oku enda kofeka yiñi, yu wa pañinya akuenje vaye kuenje wa va kundika ovikuata viaye.

¹⁵ Oco wa va iha, umue olokondu vitãlo, ukuavo vivali, ukuavo yimuamue; u ndeci a tẽla, u ndeci a tẽla. Oco wa enda kungende waye.

¹⁶ U wa tambula olokondu vitãlo, haico a enda, wa ka fũlile lavio, wa nganyala olokondu vikuavo vitãlo.

¹⁷ Haico ukualokondu vivali wa nganyala vikuavo vivali.

¹⁸ Puãi u wa tambula okondu yimuamue wa enda, wa fẽla posi, kuenje wa solekapo olombongo via cime caye.

¹⁹ Osimbu ya lua ya pitapo kuenje noke cime cakuenje vaco weya, wa sokiya lavo.

²⁰ U wa tambuile olokondu vitãlo weya lolokondu vikuavo vitãlo, hati, A cime cange, wa ñundikile olokondu vitãlo, tala, nda nganyala olokondu vikuavo vitãlo.

²¹ Cime caye wa popia laye hati, Wa linga ciwa. Vukuenje wocili haive wa kolelua. Omo wa linga ciwa lovina viñamiñami hu kundika ovina via lua. Iñila vesanju lia cime cove.

²² Ukualokondu vivali weyavo, yu wa linga hati, A cime cange, wa ñundikile olokondu vivali, tala, nda nganyala olokondu vivali vikuavo.

²³ Cime caye wa popia laye hati, Wa linga ciwa, vukuenje wocili, haive wa kolelua. Omo wa linga ciwa lovina viñamiñami hu kundika ovina via lua. Iñila vesanju lia cime cove.

²⁴ Ukuakondu yimuamue weyavo, kuenje hati, A Cime cange, mue weyavo, kuenje hati, A Cime cange, omo nda ku kũlĩha okuti vumunu wa kãla, o lombola oko kua kũlile, o nola nola apa kua saselele,

²⁵ oco nda kala lohele, kuenje ndaile, nda ka solekele okondu yove posi. Tala, o kuete cove.

²⁶ Puãi cime caye wa popia laye hati, Vukuenje wa huka, haive ukuawesi. Wa ci kũlĩha okuti ndombola oko sia kũlile, kuenje nola oko sia saselele.

²⁷ Oco nda ca ku sesamelele oku eca olombongo viange ku vakualombongo okuti kokuiya kuange nambula cange losindike yaco.

²⁸ Oco, u nyehi okondu yaye, kuenje yi eci ku o kasi lekui liolokondu.

²⁹ Momo u o kuete ale ihiwa vali, kuenje cu supokaila; puãi u ka kuete, ndaño eci a kasi laco cu nyehiwa.

³⁰ Puãi ukuenje u ka silivila, winasi vowelema wokosamua. Oko ku kala oku lila loku likeleketa ovayo.

³¹ Eci Mõlomanu eya lulamba waye kumue lovangelo vosi, oco o tumala kocalo culamba waye.

³² Kuenje olofeka viosi vi kongelua kokuaye. Oco omanu vaco o va tepa pokati okuti va likaila, ndeci ungombo a tepa olomeme lolohombo.

³³ O kapa olomeme kondio, olohombo kepĩli.

³⁴ Oco Soma o popia lava va kasi kondio yaye hati, Enjui ene wa sumũlũisui la Tate, ndo piñali usoma wo wangiliyilui tunde koku seveta oluali.

³⁵ Momo nda kala lonjala kuenje wa nyihi okulia, nda yeva enyona kuenje wa nyuisi, nda kala ukombe kuenje wa njekisi,

³⁶ nda kala lepẽle, keunje wa mbualisi, nda vela kuenje wa nati, nda kala vokayike yu wa masuli.

³⁷ Oco vakuesunga vo kumbulula, vati, A Ñala, eteke lipi tua ku mola lonjala kuenje tua ku tekula, pamue wa kala lenyona kuenje tua ku nyuisa?

³⁸ Eteke lipi tua ku sanga ukombe kuenje tua ku yekisa, pamue lepẽle kuenje tua ku walisa?

³⁹ Eteke lipi tua ku mola wa vela pamue wa kala vokayike kuenje tua ku pasula?

⁴⁰ Oco Soma o va kumbulula, hati, Mopia lene siti, Ocili, omo wa ci lingili umue wa vakuetu ava va sule, oco wa ci ndingilivo ame.

⁴¹ Oco o popia lava va kasi kepĩli, hati, Nundi, ene wa siñaliwi. Wili vondalu ka yi pui ya angiliyilua eliapu lovangelo vaye.

⁴² Momo nda kala lonjala kuenje ka wa nyihili okulia, nda yeva enyona kuenje ka wa nyuisili.

⁴³ Nda kala ukombe kuenje ka wa njekisili, nda velele yu nda kaile vokayike kuenje ka wa masuili.

⁴⁴ Oco ava va kumbululavo vati, A Ñala, eteke lipi tua ku mola lonjala, pamue lenyona, pamue vokayike, kuenje ka tua ku kuatisile?

⁴⁵ Oco o va kumbulula hati, Mopia lene siti, Ocili, omo ka wa ci lingilili umue wava va sule oco ka wa ci ndingililivo ame.

⁴⁶ Kuenje ava va enda keyambulo ka li pui, puãi vakuesunga va enda komuenyo ko pui.