MATEO 24 - Embimbiliya - Bíblia Sagrada em Umbundu

¹ Oco Yesu wa tunda vonembele yu wa kala loku enda, kuenje olondonge viaye vieya kokuaye ha viu lekisa olonjo vionembele.

² Puãi eye wa va kumbulula hati, Ko lete ovina evi viosi? Mopia lene siti, Ocili, kulo ka ku siala ewe kilu liewe likuavo ka li tunguluka.

³ Kuenje eci a tumala komunda yo Oliveira olondonge vieya kokuaye kulika, viti, Tu sapuile, eteke li pi ovina evi vi lingiwa? Ondimbukiso yokutukuluka kuove ye? Londimbukiso yesulilo lioluali ye?

⁴ Kuenje Yesu wa kumbulula hati, Lunguki sanga umue u kemba.

⁵ Momo va lua veya londuko yange oku popia vati, Ndu Kristu, kuenje va kemba va lua.

⁶ Vu laika oku yeva ovita lolohati, viovita. Lunguki. Ko ka yokoki, momo ovina evi vi lingiwa puãi eci hesuliloko handi.

⁷ Momo ofeka yi katukila ofeka, lusoma u katukila usoma, kuenje ku kala onjala lovilemawe kuiñi kuiñi.

⁸ Puãi ovina evi efetikilo ño liolongembia.

⁹ Noke vo pakuili kohali kuenje vo wipayi. Vu suvukilua onduko yange lolofeka viosi.

¹⁰ Oco va lua va konyoha, va lipakula loku lisuvuka.

¹¹ Ku katuka ovaprofeto vesanda va lua, kuenje va konyuisa va lua.

¹² Kuenje, omo evĩho li lua, oco ocisola comanu va lua ci pola.

¹³ Puãi u o pandakaisa toke kesulilo eye o popeliwa.

¹⁴ Kuenje ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.

¹⁵ Oco eci vu mola ocinyuañi cevĩho, cina ca tukuiwa luprofeto Daniele, okuti ci tãi vocitumalo ci kola,— u o tanga, a ci limbuke,—

¹⁶ oco ava va kasi vo Yudea va tilile kolomunda;

¹⁷ lu o kasi kilu lionjo ka ka loke hopi ovina vi kasi vonjo;

¹⁸ u o kasi vepia ka ka tiukile ha kopa ocilisikililo caye.

¹⁹ Oku sokolola ava va kasilili muiñi, lava va kasi loku nyamisa oloneke viaco, ci linga ohenda.

²⁰ Likutilili okuti okutila kuaco kuene ka kuiya koloneke viombambi pamue kesambata.

²¹ Momo koloneke viaco ku kala ohali ya lua, yimue ya linga ndoyo ka ya leya tunde kefetikilo lioluali toke cilo, kuenje ka yiya vali.

²² Kuenje, nda oloneke viaco ka via tepuluilue, nda lomue omunu o popeliwa, puãi oloneke viaco via tepuluilua ava va noliwa.

²³ Oco nda umue o popia lene hati, Vanji, Kristu yu pamue yo, ko ka ci koleli.

²⁴ Momo ku katuka va Kristu vesanda lovaprofeto vesanda, kuenje va lekisa ovilimbu vinene lovikomo okuti nda ci tava, va lueyisa vonjila ndaño vava va noliwa.

²⁵ Tali, ndo ci sapuili osimbu ka ceyile.

²⁶ Oco, nda va popia lene vati, Tali, o kasi vekalasoko, ko ka tundi; pamue vati, Tali, o kasi volohondo viovokati, ko ka ci koleli.

²⁷ Momo ndeci ociliakulo ci tunda kutundilo kuenje cenda toke kutakelo, haico kuiya okutukuluka kua Mõlomanu.

²⁸ Oco kuli ocife haiko ku liongoluila olohokohoko.

²⁹ Ndopo, kovaso yohali yoloneke viaco, ekumbi li vumbula, kuenje osai ka yeci owi wayo. Olombungululu vi loluka kilu, lovonene okilu a sengiwa.

³⁰ Noke ondimbukiso ya Mõlomanu yi tukuluka kilu, kuenje apata osi okilu lieve a lila. Va mola Mõlomanu yu iyilila valende okilu lunene lulamba wa lua.

³¹ O tuma ovangelo vaye londaka ya lua yolumbeta, kuenje vongolola ava vaye va noliwa tunde kolofela vikuãla, tunde kesulilo lilu toke kesulilo likuavo.

³² Lilongisi ocipama kukuyu. Nda ocanja cawo ci tomba ha ci yovi, vu ci cokuti onjovo yi li ocipepi.

³³ Haicovo ene, eci vu mola ovina evi viosi, kũlĩhi okuti Mõlomanu o kasi ocipepi, pivelo muẽle.

³⁴ Mopia lene siti, Ocili, ocitumbulukila cilo ka ci pui te ovina evi viosi vi lingiwa.

³⁵ Ilu losi vi takata, puãi olondaka viange ka vi takata.

³⁶ Puãi eteke liaco lola yaco lomue wa yi kũlĩha, ndaño ovangelo vokilu, ndaño Omõla, te Isia lika.

³⁷ Ndeci ca kaile koloneke via Noha haico ci kala eci Mõlomanu a tukuluka.

³⁸ Momo koloneke viaco, osimbu etande ka lieyile, omanu va kala loku lia kuenda oku nyua, oku kuela loku kueliwa, toke keteke Noha a iñila vocimbaluku.

³⁹ Puãi ka va limbukile cimue, toke eci etande lieya kuenje lia va nyõla vosi. Haico ciya ketukuluko lia Mõlomanu.

⁴⁰ Alume vavali va kala vepia, umue upiwapo, ukuavo o siala.

⁴¹ Akãi vavali va fulila pamuamue pohanda, umue upiwapo, ukuavo o siala.

⁴² Oco lavululi, momo ka wa kũlĩhili eteke Ñala yene eya.

⁴³ Puãi limbuki okuti nda muẽleanjo wa kũlĩhile ocipo cokuiya kuocimunu, nda wa lavuluile, kuenje nda ka tavele okuti ocimunu ci tuiyila onjo yaye.

⁴⁴ Oco liangiliyi, momo Mõlomanu iya owola ka wa simili.

⁴⁵ Helie ukuenje wa kolelua haeye wa lunguka okuti cime caye wo kundika vakuanjo yaye vosi oku va iha iha okulia kuavo kotembo ya tukuiwa?

⁴⁶ Ukuenje waco wa sumũlũha nda cime caye, eci eya, u sanga oku linga ndeci a kundikiwa.

⁴⁷ Mopia lene siti, Ocili, u kundika cosi a kuete.

⁴⁸ Puãi nda ukuenje waco ka sungulukile, kuenje o likunda lutima waye, hati, Cime cange keya ndopo,

⁴⁹ kuenje o fetika oku tipula akuenje vakuavo, loku lia kuenda oku nyuila kumue loloholua,

⁵⁰ cime cukuenje waco iya eteke ukuenje ko lavoka, lekumbi ka kũlĩhile.

⁵¹ Oco cime caye u yambula kuenje u kapa kumue la vakuambambe. Oko omanu va lila loku likeleketa ovayo.