MATEO 23 - Embimbiliya - Bíblia Sagrada em Umbundu

¹ Yesu wa popia lowiñi kuenda olondonge viaye,

² hati, Vakuavisonehua la va Fariseo va tumala komangu ya Mose.

³ Oco cosi vo longisi ci lingi loku ci kuama. Puãi ko ka setukuli ovilinga viavo. Momo va longisa puãi eci va longisa ka va ci lingi ovo muẽle.

⁴ Va kuta ovitele vi lema haivio vinjangatela kuenje va vi tuika kovitai viomanu, puãi ka va tava oku lambako, ndaño lomuine, oku upa ovitele viaco.

⁵ Cosi va linga va ci lingila oku taliwa lomanu. Va vokinyako kolosilo viavo kuenje va luisa olonjenje violonanga viavo.

⁶ Va sole olomangu viunene kolofesta, lolomangu viokovaso volosunangonga,

⁷ lovilamo viovovitanda kuenda oku tukuiwa lomanu, A Rambei.

⁸ Ene puãi, ko ka tukuiwi, vati, A Rambei, momo ulongisi wene umuamue, lene vosi wamanji.

⁹ Ko ka tukuili omunu kilu lieve hoti, Isietu, momo Isiene umuamue, o kasi kilu.

¹⁰ Ko ka tukuiwi, vati, A cime, momo Cime cene umuamue, Kristu.

¹¹ Puãi u wa velapo pokati kene a linge ukuenje wene.

¹² U o liamisa kunene amisua kutito, kuenje u o liamisa kutito amisua kunene.

¹³ Ene a vakuavisonehua, lene a va Fariseo, wakuambambe, ngongo yene! Momo vu yikilako omanu usoma wokilu; ene muẽle ka wiñilamo, lava va yongola oku iñila vu va tateka.

¹⁴ Ene a vakuavisonehua, ngongo yene, lene a va Fariseo, haene wakuambambe, ngongo yene, momo vu lia lia olonjo viovimbumba, loku ci pipiya vu likutalaila ovilañela, oco vu pisiwa ca piãla.

¹⁵ Ene a vakuavisonehua, lene a va Fariseo, wakuambambe, ngongo yene! Momo vu ñuala ñuala kokalunga lo kongongo ho lingisa omongoloke yimuamue. Leci ya pongoloka, vu yi lingisa omõla onjembo okuti wo velipo luvali.

¹⁶ Ene asongui haene vulomeke, ngongo yene! Momo vu linga hoti, Nda umue o lisinga lonembele esingo liaco ka li koli, puãi nda o lisinga lulu wovonembele esingo liaco liu kola.

¹⁷ Waveke, haene vulomeke. Ca velapo ci pi, ulu waco ale, ele onembele yi kolisa ulu waco?

¹⁸ Kuenda vali, vu popia hoti. Nda umue o lisinga lutala esingo liaco ka li koli, puãi nda o lisinga locilumba ci kasi kutala esingo liaco liu kola.

¹⁹ Vulomeke! Ca velapo ci pi? ocilumba ale, ele utala u kolisa ocilumba caco?

²⁰ Oco u o lisinga lutala o lisinga lawo lovina viosi vi kasiko.

²¹ Lu o lisinga lonembele o lisinga layo kuenda u wa tungamo.

²² Kuenda u o lisinga lilu o lisinga localo ca Suku lu wa tumalako.

²³ Ene a vakuavisonehua lene a va Fariseo, wakuambambe, ngongo yene! Momo vu tepa tepa onepa yekui kocimbumba lo kocelo lo konjikãu kuenje vu lomboka ovina via velapo viovihandeleko, ndeci esunga vekanga lohenda, kuenda ekolelo. Ovio nda vio sesameleli oku vi linga, oku lombokapo vikuavo hacoko.

²⁴ Ene asongui, vulomeke, vu kenja kenjamo okaweñelele kuenje ongamelo vu yina ño.

²⁵ Ene a vakuavisonehua, lene a va Fariseo, wakuambambe, ngongo yene! Momo vu yelaisa koñoño yokopo leyi yelonga puãi vokati mue yuka ocipululu lundiamololo.

²⁶ O Fariseo, vumeke. Tete yelisa vokati kokopo lo pelonga oco koñoño yalio ku yelevo.

²⁷ Ene a vakuavisonehua, lene a va Fariseo, wakuambambe, ngongo yene! Momo wa lisoki ndolosonje via sieketiwa ocikela. Kilu via posoka puãi vokati mue yuka akepa omanu va fa leliño liosi.

²⁸ Haico ene, kilu vu moleha komanu nda vakuesunga puãi vokati we yuki ombambe levĩho.

²⁹ Ene a vakuavisonehua, lene a va Fariseo, wakuambambe, ngongo yene! Momo vu tungila ovaprofeto olosonje kuenje vu posuisa olosonje via vakuesunga.

³⁰ Kuenje vu linga hoti, Nda tua kaile voloneke via vaisietu nda ka tua va kuatisile oku pesela osonde yovaprofeto.

³¹ Oco vu limbila uvangi okuti vumãla vava va ponda ovaprofeto.

³² Oco yukisi onjongo ya vaisiene.

³³ Alonyoha, ambuto yolombuta, vu puluka ndati episo lioku enda konjembo?

³⁴ Oco numila kokuene ovaprofeto lolonoño la vakuavisonehua. Vamue pokati kavo vu va ipa loku va valela kakulusu. Vamue vu va tipuila volosunangonga viene, kuenje vu va hangisa tunde vimbo eli toke vimbo likuavo.

³⁵ Oco vu pila osonde yosi yesunga ya pesekela kilu lieve, tunde kosonde yukuesunga Abel toke kosonde ya Sakariya, omõla a Barakiya, una wo pondeli pokati kocitumalo ci kola lutala.

³⁶ Mopia lene siti, Ocili, ovina evi viosi viya kocitumbulukila cilo.

³⁷ A Yerusalãi, a Yerusalãi, okuakuipa ovaprofeto, okuaku sosola ava va tumiwa kokuove. Olonjanja via lua nda livela oku vutama omãla vove ndeci ekuwe li vutama ivuvu vialio vemi liavava alio, kuenje ka wa taveli!

³⁸ Tali, onjo yene yo siali upolokoso.

³⁹ Momo mopia lene siti, Ko moli vali te vu popia hoti, U iyilila vonduko ya Ñala a sivayiwe!