MATEO 22 - Embimbiliya - Bíblia Sagrada em Umbundu

¹ Yesu wamisako oku vangula lavo lolosapo, hati,

² Usoma wokilu wa soka ndosoma wopisa uvala womõlaye.

³ Wa tuma akuenje vaye oku pañinya omanu va lalekiwa kuvala puãi ka va tavele oku iya.

⁴ Wa tuma vali akuenje vakuavo, hati, Sapuili ava va lalekiwa hoti, Tali, ofesta yange nda yi pongiya, olongombe viange levi via lẽla nda vipa kuenje ovina viosi via pia, veye kuvala.

⁵ Puãi va ci tomba, umue wa enda kepia liaye, ukuavo wa enda kocipindi caye,

⁶ kuenje vakuavo va kuata akuenje vaye, va va fũkĩlisa, yu va va ipa.

⁷ Puãi Soma, oku tema, wa tuma asualali vaye, kuenje wa nyõla olomondi viaco yu wa yoka imbo liavo.

⁸ Oco wa popia lakuenje vaye hati, Uvala wa pia, puãi ava va lalekiwile ka vo sungulukilile.

⁹ Kuendi kanyaha alila, vosi vu sangako va laleki kuvala.

¹⁰ Akuenje va enda valila, vosi va sangamo va va konga, vakuevĩho la vakuesunga, kuenje uvala we yuka akombe.

¹¹ Puãi, eci Soma a iñila oku vanja akombe, wa mola ulume ka walele uwalo wuvala.

¹² Soma wo pula hati, Okuetu, wa iñila ndati mulo, kua walele uwalo wuvala? Ulume waco woha ño.

¹³ Oco Soma wa popia lakuenje vaye hati, U kuti kovoko lo kovolu, wimbi vowelema wokosamua, kuna kuli oku lila loku likeleketa ovayo.

¹⁴ Momo va lua va lalekiwa, puãi vañamiñami lika va noliwa.

¹⁵ Oco va Fariseo va enda, va tumba ehãla loku u nula londaka.

¹⁶ Va tuma olondonge viavo kumue la va Herode vati, Olongisi, tu ci okuti vukuacili kuenda o longaisa onjila ya Suku locili. Lomue o ku vindula ohele, momo ku vanji kovipala viomanu.

¹⁷ Oco, tu sapuileko, wa soka ndati, Ci tava oku lambuila Kaisare ale, ele ka ci tava?

¹⁸ Puãi Yesu, oku limbuka ukuse wavo, wa linga hati, A vakuambambe, vu njonjela nye?

¹⁹ Ndekisi olombongo viulambu. Oco vo nenela olombongo viaco.

²⁰ Kuenje wa va pula hati, Ociluvialuvia eci celie, locisonehua caco?

²¹ Vo kumbulula vati, Ca Kaisare. Oco a popia lavo hati, Evi via Kaisare vi eci ku Kaisare, levi via Suku vi eci ku Suku.

²² Eci va ci yeva va komoha, yu vo sia, va enda.

²³ Eteke liaco va Sadukeo vamue veya kokuaye. Ovo ovo ava va lingainga vati, Ka kuli epinduko. Vo pula,

²⁴ vati, Olongisi, Mose hati, Ulume nda o fa kuenje ka kuete omõla oco manjaye a kuele ukãi waco ha pindula ombuto ya huvaye.

²⁵ Oco, kokuetu kua kala vamanji valume epanduvali va tunda vimo limosi. Watete wa kuela kuenje wa fa. Omo ka kuete ombuto, wa sia ukãi waye ku manjave.

²⁶ Haico wavali, lu watatu toke ku wepanduvali.

²⁷ Noke kesulilo liaco ukãi waco wa favo.

²⁸ Oco kepinduko hẽ, ukãi waco o linga welie pokati kepanduvali liaco? Momo vosi va kala laye.

²⁹ Puãi Yesu wa va kumbulula hati, Wa lueyi omo ka wa kũlĩhili ovisonehua, ndaño unene wa Suku.

³⁰ Momo kepinduko ka kuli oku kuela, ndaño oku kueliwa, puãi vosi va linga ndovangelo vokilu.

³¹ Puãi, kondaka yepinduko liava va fa, ka wa tangeli hẽ eci Suku a popia lene hati,

³² Ame Suku ya Avirahama, haime ndi Suku ya Isake, haime ndi Suku ya Yakoba? Suku ha Sukuko yava va fa, te yava va kasi lomuenyo.

³³ Kuenje eci owiñi wa ci yeva wa komoha okulongisa kuaye.

³⁴ Puãi, eci va Fariseo va yeva okuti wohisa va Sadukeo, oco va liongolola.

³⁵ Kuenje umue wavo, haeye ukuavihandeleko, wo pula ondaka oku u seteka hati,

³⁶ Olongisi, pokati kovihandeleko, ocihandeleko cinenepo ci pi?

³⁷ Yesu wo kumbulula hati, Sola Ñala suku yove lutima wove wosi lomuenyo wove wosi lolondunge viove viosi.

³⁸ Eci oco ocihandeleko cinene, haico catete.

³⁹ Kuenje cavali ca lisoka laco, ceci, okuti, Sola u o lisungue love ndeci o lisole ove muẽle.

⁴⁰ Ovihandeleko viosi kuenda cosi ca longisa ovaprofeto ca tunda kovihandeleko evi vivali.

⁴¹ Eci va Fariseo vongoloka, oco Yesu wa va pula,

⁴² hati, Wa sokeli ndati Kristu? Omõla elie? Vo kumbulula vati, Omõla a Daviti.

⁴³ Wa va pula vali hati, Nda oco, ci kasi ndati okuti Daviti, oku popia le Espiritu, wo tukula Ñala, hati,

⁴⁴ Ñala wa popia la Ñala yange, hati, Tumala kondio yange, toke ñapa ovanyali vove vemehi liolomãi viove?

⁴⁵ Nda Daviti wo tukula Ñala, o linga ndati omõlaye?

⁴⁶ Kuenje lomue wa tẽla oku u kumbulula cimue. Kuenje tunde keteke liaco lomue wa lukuta oku u pula vali cimue.