MATEO 21 - Embimbiliya - Bíblia Sagrada em Umbundu

¹ Eci va pitila ocipepi lo ko Yerusalãi loku iya ko Betefage, komunda yo Oliveira, oco Yesu wa tuma olondonge vivali.

² Wa va sapuila hati, Kuendi kimbo li kasi kovaso yene. Tuli vu pitila vu sanga ocimbulu ca pandekiwa kuenda omõlaco. Vi kutululi loku vi nena kokuange.

³ Nda umue o popia lene cimue ene vu u sapuila hoti, Ñala o vi yongola, kuenje o vi tuma ndopo.

⁴ Eci ca lingiwa oku tẽlisa ondaka yuprofeto yiti,

⁵ Sapuili omõla a Siono ukãi hoti, Tala, Soma yove yo, iya kokuove. Wonjuka, endela kocimbulu, kuenda komõla ocimbulu.

⁶ Oco olondonge via enda, via linga ndeci Yesu a vi sapuila.

⁷ Va nena ocimbulu lomõlaco kuenje va yalako olonanga viavo. Yesu wa tumalako.

⁸ Vu lua kowiñi va yala olonanga viavo vonjila kuenje vakuavo va teta ovisapa, yu va yi yala vonjila.

⁹ Kuenje owiñi wo pitila kovaso lu wo kuama konyima, vosi va vilikiya vati, Hosana ku Mõla a Daviti. U iyilila onduko ya Ñala a sivayiwe! Kilu va vilikiyevo, vati, Hosana.

¹⁰ Eci a iñila vo Yerusalãi imbo liosi lia tokotelua, vati, U helie?

¹¹ Kuenje owiñi wa popia uti, U, uprofeto Yesu u Nasara ko Galilea.

¹² Kuenje Yesu wa iñila vonembele ya Suku. Wa tundisamo vosi va landa lava va landasaila vonembele. Wa leñula olomesa via vakuakutolokala olombongo lolomangu via vakuakulandisa olopomba.

¹³ Wa popia lavo hati, Ca sonehiwa citi, Onjo yange yi tukuiwa onjo yoku likutilila, puãi ene wa yi lingisi ocilala covingumba.

¹⁴ Olomeke lovilema vieya kokuaye vonembele yu wa vi sakula.

¹⁵ Puãi, eci ovitunda vinene la vakuavisonehua va mola ovikomo a linga, kuenda omãla va kala loku vilikiya vonembele vati, Hosana ku Mõla a Daviti, oco va tema.

¹⁶ Vo pula vati, O yevite eci ava va kasi loku popia? Yesu wa va kumbulula hati, Ndi ci yevite. Puãi ka wa la tangi olondaka evi viokuti, Kovimẽla viomãla lotuñaña ove wopako esivayo liocili?

¹⁷ Oco, oku va sia, wa tunda vimbo, wa enda, wa ka kala ko Betánia.

¹⁸ Komẽle, eci a kala loku tiukila vimbo, wa kala lonjala.

¹⁹ Oku mola ukuyu kohulo yonjila wa endako kuenje ka sangeleko cimue, te amela lika. Oco wa popia lawo hati, Tunde opo, kokuove ka ku ka tunde vali epako. Kuenje haico ukuyu wa kukuta.

²⁰ Oco, eci olondonge via ci mola, via komoha viti, Ukuyu wa kukuta ndati ocipikipiki?

²¹ Yesu wa va kumbulula hati, Mopia lene siti, Ocili, nda vu kasi lekolelo okuti ka vu suma suma, oco, eci ca lingiwa lukuyu u hacoko lika vu linga, puãi ndaño vu popia lomunda eyi hoti, Veyuka, limba vokalunga, ci lingiwa.

²² Kuenje nda vu kuete ekolelo, cosi vu pinga poku likutilila vu ci tambula.

²³ Eci a iñila vonembele oco ovitunda vinene lakulu vomanu veya kokuaye osimbu a kala loku longisa. Vo pula vati, Ovina evi o li loku vi linga lomoko ye? U wa ku iha omoko eyi helie?

²⁴ Yesu wa va kumbulula hati, Ndu pulivo ondaka yimuamue. Nda vu yi sapuila oco ndu sapuilivo omoko ndinga layo ovina evi.

²⁵ Epapatiso lia Yoano hẽ, lia tunda pi? Lia tunda kilu ale, ele lia tunda komanu? Va livangula pokati vati, Nda tu linga tuti, Lia tunda kilu, eye o tu pula hati, Nda oco, nye ka wo taveleli?

²⁶ Puãi nda tu linga tuti, Lia tunda komanu, ci tu linga usumba kowiñi, momo vosi va soka vati, Yoano uprofeto.

²⁷ Oco va kumbulula Yesu vati, Ka tuiko. Eye wa popia lavo hati, Ndaño ame, siu sapuili omoko ndinga layo ovina evi.

²⁸ Wa soki nye? Omunu wa kala lomãla vaye valume vavali. Wa enda ku umue, wa popia laye hati, Amõlange, etaili kuende, ka linge upange vocumbo cayuva.

²⁹ Yu wa kumbulula hati, Si endi, puãi noke wa litiulamo kuenje wa enda.

³⁰ Noke wa enda kukuavo kuenje haico a popia laye. Eye wa kumbulula hati, A Ñala, ame ngenda, puãi kaile.

³¹ Pokati ka vavali vaco, u wa linga ocipango ca isiaye helie? Vati, Yu watete. Yesu wa popia lavo hati, Mopia lene siti, Ocili, vakuakutambula elisimu la vakahonga va livanga oku iñila vusoma wa Suku osimbu ene ka wa iñilili handi.

³² Momo Yoano weyile kokuene lonjila yesunga kuenje ka wa taveli kokuaye, puãi vakuakutambula elisimu la vakahonga vo tava. Kuenje ene ndaño wa ci moli, haimo ka wa lituwilimo ho tava.

³³ Yeveleli olusapo lukuavo. Kua kala omunu muẽleonjo, wa tuika ocumbo cayuva, wombako ongumbu, wa kulungulamo ocikulungu covinyu, wa tungamo onjo yoku lavela, kuenje wa ci kundika kolongunja, yu wa enda kofeka yikuavo.

³⁴ Eci ceya ocipepi kuvo wapako aco oco a tuma akuenje vaye kolongunja viaco oku kopa apako aye.

³⁵ Olongunja via kuata akuenje vaye, umue vo tipula, ukuavo va wipa, ukuavo vo sosola lovawe.

³⁶ Oco wa tuma vali akuenje va lua okuti vatete va sule, kuenje haico va va linga.

³⁷ Puãi noke wa tuma kokuavo omõlaye, hati, sanga va sumbila omõlange.

³⁸ Puãi olongunja, eci va mola omõlaco, va livangula pokati vati, U, eye kapiñala kaco. Tu wipayi ha tu kuata ocipiñalo caye.

³⁹ Kuenje vo kuata, vo tundisa vocumbo cayuva, kuenje vo wipa.

⁴⁰ Oco nda muẽleacumbo cayuva iya, o linga nye lolongunja viaco?

⁴¹ Va kumbulula vati, Olondingaĩvi viaco o vi nyõla lãvi, kuenje o kundika ocumbo caye cayuva kolongunja viñi, viu wiha apako aco kuvo waco.

⁴² Yesu wa va pula hati, Ka wa la tangi vovisonehua okuti, Ewe lia inasi atungi olio lia lingiwa utue wevindi. Eci ca tunda ku Ñala, haico ocikomo vovaso etu.

⁴³ Oco mopia lene siti, Usoma wa Suku upiwa kokuene kuenje weciwa kofeka yima apako awo.

⁴⁴ U o kupukila kewe eli o sasoha, puãi u li kupukila liu keleketa pe.

⁴⁵ Eci ovitunda vinene la va Fariseo va yeva olosapo viaye va limbuka okuti ovo a vi popela.

⁴⁶ Puãi, eci va seteka oku u kuata, va yokokela omanu, momo omanu va soka vati, Yesu Uprofeto.