MATEO 20 - Embimbiliya - Bíblia Sagrada em Umbundu

¹ Momo Usoma wokilu wa soka ndomunu muẽleonjo wa tunda omẽle ociteketeke oku pañinya olondingupange ha vi talavaya vocumbo caye cayuva.

² Eci a litava lolondingupange viaco okuti eteke osingu, eteke osingu, oco wa va tuma kocumbo caye cayuva.

³ Eci a tunda kocitalakumbi wa mola vakuavo ka va kasi lupange, va tãi ño vocitanda.

⁴ Wa popia lavo hati, Kuendivo vocumbo cange cayuva. Ndu feti eci ca sunguluka. Kuenje va enda.

⁵ Wa tunda vali ekumbi pongunji. Eci ekumbi lia senduluka haico a linga.

⁶ Pana okuti ekumbi lioku enda wa tunda vali kuenje wa sanga vakuavo va tãi. Wa va pula hati, Nye wa talameli ño utanya wosi, lacimue wa lingi?

⁷ Kuenje vo kumbulula vati, Momo lomue wa tu pañinya. Eye hati, Kuendivo vocumbo cange cayuva.

⁸ Kuenje eci oñolosi yeya muẽleacumbo cayuva wa popia la kalei kaye hati, Kovonga olondingupange. Va iha ofeto yavo. Fetikila ava va sulako, sulilako lava va teteka.

⁹ Eci veya, ava va fetika pana okuti ekumbi lioku enda, va tambula omunu osingu, omunu osingu.

¹⁰ Kuenje ava va teteka, eci veya, va soka vati, Etu tu tambula ca velapo, puãi lavovo va tambula omunu osingu, omunu osingu.

¹¹ Eci va yi tambula va lisiõsuĩla muẽleonjo,

¹² vati, Ava va sulako va talavaya ño ola yimuamue, kuenje wa va sokisa letu tua liyaka lupange lowuya utanya wosi?

¹³ Puãi eye wa kumbulula umue pokati kavo hati, Okuetu, sia ku liañele. Kua navele hẽ osingu?

¹⁴ Tambula cove, kuende. Ame muẽle nda panga oku eca ku wa sulako ndeci nda ku iha ove.

¹⁵ Ka ci tava hẽ, ame oku linga ndeci manga levi viange? Ca ku kokela hẽ ocikupe omo nda linga ohenda?

¹⁶ Oco ava va sulako va linga vatete, lava vatete va linga va sulako.

¹⁷ Osimbu Yesu a kala loku lamana ko Yerusalãi oco wa pañinyila pulika olondonge viaye ekui la vivali. Vonjila wa popia lavo hati,

¹⁸ Tala, tu kasi loku enda ko Yerusalãi kuenje Mõlomanu o pakuiwa kovitunda vinene kuenda ku vakuavisonehua. Vo pisa loku u tukuila okufa,

¹⁹ Kuenje vo pakuila ku vakualofeka ha vo fuanguila loku u tipula. Vo valela kekulusu kuenje o pinduka keteke liatatu.

²⁰ Oco ina yomãla va Sebedeo weya kokuaye lomãla vaye. Wo fendela kuenje wo pinga cimue.

²¹ Yesu wo pula hati, O yongola nye? Ukãi wo kumbulula hati, Sokiya okuti omãla vange, ava vavali, va tumala vusoma wove, ukuavo kondio yove, ukuavo kepĩli liove.

²² Puãi Yesu wa kumbulula hati, Ka wa kũlĩhili eci vu pinga. Vu tẽla oku nyua okopo ndaika oku nyua? Va popia laye vati, Tu ci tẽla.

²³ Eye wa popia lavo hati, Okopo yange vu yi nyua muẽle, puãi oku tumala kondio yange lo kepĩli liange hacangeko oku ceca, puãi, cava ca va angiliyiwila la Tate.

²⁴ Ekui liaco, eci va ci yeva, va funguila vamanjaco vavali.

²⁵ Puãi Yesu wa va pañinya kuenje hati, Vu ci okuti olombiali viavakualofeka vi va viala kuenda vavo vanene va va vumbisa.

²⁶ Ka ci ka kale ndomo pokati kene, puãi u o yongola oku linga fu pokati kene a linge ukuenje wene.

²⁷ Lu o yongola oku kala tete pokati kene a linge ndupika,

²⁸ ndeci Mõlomanu keyilile oku vumbiwa, te oku vumba, loku eca omuenyo waye ndocimuenyo coku yovola va lua.

²⁹ Eci va kala loku tunda ko Yeriko owiñi wa lua wo kuama.

³⁰ Olomeke vivali via tumala kohulo yonjila. Eci va yeva okuti Yesu o kasi loku pita oco va vilikiya vati, A Ñala, a Mõla a Daviti, tu linge ohenda.

³¹ Owiñi wa va lemela vati, A Ñala, a Mõla a Daviti, tu linge ohenda.

³² Oco Yesu wa talama kuenje wa va pañinya, hati, Nye vu yongola okuti ndu ci lingili?

³³ Kuenje va kumbulula vati, A Ñala, ovaso etu a patuluke.

³⁴ Oco Yesu, oku va kuatela ohenda, wa lamba vovaso avo, kuenje haico va letuluka, yu vo kuama.