MATEO 19 - Embimbiliya - Bíblia Sagrada em Umbundu

¹ Oco, eci Yesu a mala olondaka evi, wa tunda vo Galilea kuenje weya vofeka ya Yudea kesinya lia Yordão.

² Owiñi wa lua wo kuama kuenje oko a va sakuila.

³ Va Fariseo vamue veya kokuaye. Vo seteka vati, Ci tava okuti ulume o nyalela ukãi waye evelo limue?

⁴ Eye wa kumbulula hati, Ka wa tangeli okuti kefetikilo usovoli wa va lulika ulume lukãi?

⁵ Kuenda wamisako vali hati, Oco ulume o sia isiaye la inaye, o likakatela lukãi waye, kuenje kavali kavo va linga etimba limuamue.

⁶ Oco ka va lingi vali omanu vavali, puãi va linga omunu umosi. Oco eci ca tokekisa Suku omunu ka ka ci tepise.

⁷ Vo pula vali vati, Nda oco, nye Mose a handelekela okuti nda kuli oku tundisa ukãi, tete o wiha ukanda woku nyala?

⁸ Eye wa kumbulula hati, Omo ovitima viene via tĩla oco Mose a tavela okuti vu nyala akãi vene, puãi, tunde kefetikilo ka ca kaile ndoco.

⁹ Kuenje mopia lene siti, Wosi o nyala ukãi waye, nda halondaka yoku pekelisako, kuenje o kuela ukãi ukuavo, o linga ukahonga. Lu o kuela ukãi wa nyaliwa layevo o linga ukahonga.

¹⁰ Olondonge via popia laye viti, Nda ci kasi ndoco pokati kulume lukãi waye hise nda omanu ka va likuela.

¹¹ Puãi Yesu wa va kumbulula hati, Havosiko va tẽla oku tẽlisa ondaka eyi, te ava va ihiwa utima waco.

¹² Momo kuli ava va kasi ndava va vetiwa tunde vovaimo a vainavo, kuli ava va vetiwa lomanu, kulivo ava va lilingisa ndava va vetiwa mekonda liusoma wokilu. Wosi o tẽla oku kolela ondaka eyi a yi kolele.

¹³ Kuenje vo nenela otumala okuti o tu kapa ovaka loku tu likutilila. Olondonge via lemela ava va tu nena.

¹⁴ Puãi Yesu hati, Omãla va kale, ko ka va tutuiyi oku iya kokuange, momo Usoma wokilu wava va lisoka lavo.

¹⁵ Oco wa va kapa ovaka aye kuenje wa tundako.

¹⁶ Oco umue weya kokuaye wo pula hati, Olongisi, nye ciwa ndinga okuti mola omuenyo ko pui?

¹⁷ Kuenje Yesu wo kumbulula hati, Nye wa mulila eci ciwa? Kuli umosi lika uwa. Puãi, nda o yongola oku iñila vomuenyo, pokola kovihandeleko.

¹⁸ Wa pula Yesu hati, Vi pi? Kuenje Yesu hati, Ku ka ipe. Ku ka pekelise. Ku ka ive. Ku ka popie uvangi vuhembi.

¹⁹ Sumba so la nyoho. Sola u o lisungue love ndeci o lisole ove muẽle.

²⁰ Umalehe wa popia laye hati, Ovina evi viosi ndi vi lingainga ale. Pa ñambela vali nye?

²¹ Yesu wo kumbulula hati, Nda o yongola oku lipua ocili, kuende, ka landise cosi o kasi laco, ci avela olosuke kuenje o kala lukuasi kilu, oco wiye o ñuame.

²² Puãi, eci umalehe a yeva ondaka eyi, oco wa enda loku nyumala momo wa kala lovikuata via lua.

²³ Kuenje Yesu wa popia lolondonge viaye hati, Mopia lene siti, Ocili ohuasi oku iñila vusoma wokilu, ci tĩla.

²⁴ Mopia lene vali siti, Ongamelo oku pita venyulu lionguya hise, ohuasi oku iñila vusoma wa Suku upange.

²⁵ Eci olondonge via ci yeva via komoha ca lua, kuenje viti, Elie nga o tẽla oku popeliwa?

²⁶ Oku va vanja Yesu wa popia lavo hati, Eci ka ci tẽliwa lomanu, puãi la Suku ovina viosi vi tẽliwa.

²⁷ Oco Petulu wa kumbulula, hati, Tala, tua sia ovina viosi ha tu ku kuama, oco hẽ, tu mola nye?

²⁸ Yesu wa popia lavo hati, Mopia lene siti, Voluali luokaliye, eci Mõlomanu a tumala komangu yulamba waye, ene wa ñuami vu tumala kolomangu ekui la vivali oku tetuluila ekui liapata kapata avali a Isareli.

²⁹ Vosi va sia olonjo, pamue vamanjavo, pamue vamukãi wavo, pamue vaisiavo, pamue vainavo, pamue omãla, pamue ovapia, mekonda lionduko yange, va mola eci ca velapo kuenje va piñala omuenyo ko pui.

³⁰ Puãi va lua va kasi kovaso va kala konyima, kuenje va lua va kasi konyima va kala kovaso.