MATEO 18 - Embimbiliya - Bíblia Sagrada em Umbundu

¹ Ekumbi liaco olondonge vieya ku Yesu viti, Helie wa velapo vusoma vokilu?

² Yu wa kovonga okamõla, wa ka talamisa pokati kavo.

³ Wa popia hati, Ocili mopia lene siti, Lalimue eteke wiñili vusoma wokilu te nda vu pongoloka ho lingi ndotumãla.

⁴ U o liketisa ha lingi ndokamõla aka eye wa velapo vusoma wokilu.

⁵ U o hindikisa okamõla ndaka vonduko yange wa hindikisa ame;

⁶ puãi u o kapela ovilondokua kamue kava vatito va ñolela, hise laye nda ewe linene liokufulila li nyoñamisiwila kosingo yaye, kuenje o vombisiwa velondo liokalunga.

⁷ Oluali, ngongo yaluo mekonda liovilondokua. Ku kala muẽle ovilondokua, ka vi yuvuiwa, puãi u o kapela ukuavo ocilondokua, ngongo yaye.

⁸ Nda eka liove pamue omãi yove yi ku lingila ocilondokua, yi tetako, yi inasi. Cu ku velelapo oku iñila vomuenyo ocinimbaile pamue lokulu kumuamue, oku imbiwa vondalu ka yi pui lovoko avali pamue lovolu avali hacoko.

⁹ Nda iso liove li ku lingila ocilondokua li tofolamo, li inasi. Cu ku velelapo oku iñila vomuenyo ocitofue, oku imbiwa vonjembo yondalu lovaso avali hacoko.

¹⁰ Kali lutate okuti ka vu sepuisa kamue kava vatito, momo mopia lene siti, Kilu ovangelo vavo va vanja ño-o hũ kocipala ca Tate o kasi kilu.

¹¹ Momo Mõlomanu weyilila oku popela eci ca nyelela.

¹² Wa soki ndati, Nda umue o kasi locita colomeme, kuenje yimue ya nyelela, ka si hẽ olomeme akui ecea lecea kolomunda ha endi oku sanda eyi ya nyelela?

¹³ Ocili mopia lene siti, Nda o yi sanga o yi sanjukila ca lua, akui ecea lecea ka via nyelile ci sule.

¹⁴ Oco hacipango ca Isieneko o kasi kilu okuti kamue kamosi kava vatito ka taka.

¹⁵ Nda ukuẽle wa ku lingila cĩvi kuende kokuaye, ko lomboluile kulika ndeci a ku lueyela. Nda o ku yeva nda wa popela ukuẽle.

¹⁶ Nda ka ku yevi, kuende lomunu pamue vavali okuti ondaka yosi yi vanguiwa lolombangi vivali pamue vitatu.

¹⁷ Puãi nda eye ka yevi ondaka yavo oco ci sapula kekongelo. Kuenje nda lopo ka yevi ndaño ondaka yekongelo oco o kala laye ndeci o kala lukualofeka pamue ukuakutambula elisimu.

¹⁸ Mopia lene siti, Ocili, ovina vu kutila kilu lieve vi kutiwila kilu, kuenje ovina vu kutuluila kilu lieve vi kutulukila kilu.

¹⁹ Mopia vali lene siti, Kulo kilu lieve, nda vavali pokati kene va litava oku likutilila cimue, ci va lingiwila la Tate o kasi kilu.

²⁰ Momo apa pali vavali pamue vatatu va liongoluila vonduko yange haipo ñasi pokati kavo.

²¹ Oco Petulu weya wo pula hati, A Ñala, olonjanja viñami ukuetu a ndueyela okuti lopo ndu wecela, olonjanja epanduvali ale?

²² Yesu wo kumbulula hati, Si popi love siti, olonjanja epanduvali, puãi mopia siti, akui epanduvali kolonjanja kolonjanja epanduvali.

²³ Oco usoma wokilu wa soka losoma yimue ya yongola oku sokiya lakuenje vaye.

²⁴ Eci a fetika oku sokiya, vo nenela umue wo levala ekui liolokondu.

²⁵ Puãi, omo ka kuete eci a feta, oco cime caye wa tuma oku u landisa kumue lukãi waye lomãla vaye la cosi a kuete, okuti ofuka yi fetiwa.

²⁶ Oco ukuenje wa wila posi, wa livondela, hati, A Ñala, ngamisilepo handi kuenje hu feta cosi.

²⁷ Kuenje cime cukuenje waco, omo o kuatela ohenda, wo weca kuenje wo wecela ofuka yaco.

²⁸ Puãi ukuenje waco, eci a tunda, wa sanga ukuavo o kasi lofuka yaye yocita colosendu, kuenje wo kuata, wo leka ekõle, hati, Feta eci wa ndevala.

²⁹ Oco ukuavo wa wila posi, wo peya hati, Ngamisilepo kuenje hu feta.

³⁰ Kuenje eye ka tavele, puãi wa enda yu wo wimba vokayike toke wa feta ofuka yaye.

³¹ Oco, eci akuenje vakuavo va mola eci ca lingiwa, ca va puiya, kuenje veya, va sapuila cime cavo cosi ca lingiwa.

³² Oco cime caye wo pañinya kuenje wa popia laye hati, Okuenje wa huka, nda ku ecela ofuka yina yosi omo wa meya.

³³ Ka ca ku sesamelele hẽ oku linga ukuẽle ohenda ndeci nda ku linga ohenda?

³⁴ Kuenje cime caye wa tema wo weca kolonjambuli toke wa feta ofuka yaye yosi.

³⁵ Haico Tate ukuailu a linga lene vosi nda ka weceli vakuẽle lutima wosi.