MATEO 16 - Embimbiliya - Bíblia Sagrada em Umbundu

¹ Oco va Fariseo lava Sadukeo veya kokuaye. Oku u nyika vo pinga okuti o va lekisa ondimbukiso yimue yokilu.

² Eye wa va kumbulula hati, Koñolosi vu linga hoti, Kuiya utanya, momo kilu ku kusuka.

³ Omẽle hoti, Etaili ombela, omo kilu ku kusuka kuenda kua sitika. Wa kũlĩhi oku limbuka eci ci li kilu puãi ko tẽla oku limbuka olondimbukiso viovina vi lingiwa.

⁴ Ocitumbulukila ca vĩha haico cukahonga ci yongola ocilimbu, puãi ka cihiwa ocilimbu te cina ca Yona. Oco wa va sia, wa enda.

⁵ Olondonge via pitila kesinya kuenje via ivalako oku ambata ombolo.

⁶ Yesu wa popia lavo hati, Lunguki, kuenda yuvuli etumbisa lia va Fariseo leli lia va Sadukeo.

⁷ Kuenje va livangula pokati vati, Ka tu ambatele ombolo.

⁸ Puãi Yesu, omo a ci limbuka, wa va pula hati, A vakuekolelo litito, nye vu vanguila okuti ka wambateli ombolo?

⁹ Lopo ka co lombolokeli? Ka wa ivalukili olombolo vitãlo violohũlũkãi vitãlo? Wa nolipo ovitenge viñami?

¹⁰ Leci colombolo epanduvali violohũlũkãi vikuãla co limbi nga? Wa nolipo ovitenge viñami?

¹¹ Nye ka co lombolokeleli okuti hamboloko nda kala loku vangula? Lunguki letumbisa lia va Fariseo leli lia va Sadukeo.

¹² Oco ca va lomboloka okuti hetumbisa liomboloko a tukula te ovilongua via va Fariseo la va Sadukeo.

¹³ Eci Yesu eya kofeka ya Kaisarea ka Filipu oco wa pula olondonge viaye hati, Mõlomanu vo tukola ndati?

¹⁴ Va kumbulula vati, Vamue vo tukola vati, Yoano Upapatisi; vamue vati, Eliya; vakuavo vati, Yeremiya, pamue uprofeto umue ukuavo.

¹⁵ Eye wa va pula hati, Puãi ene vu nukula ndati?

¹⁶ Kuenje Simono Petulu wo kumbulula hati, Ove vu Kristu, vumõla a Suku o kasi lomuenyo.

¹⁷ Kuenje Yesu wo kumbulula hati, A Simono, amõla a Yona, wa sumũlũha, momo hamunuko wa ku ci situluila, te Tate o kasi kilu.

¹⁸ Oco hu sapuila, siti, Ove ove Petulu. Pohanda yaco nungilapo ekongelo liange, kuenje olohõlo vionjembo ka vi li yuli.

¹⁹ Hu iha olosapi viusoma wokilu. Eci o kutila posi ci kutiwila kilu, leci o kutuluila posi ci kutuluiwila kilu.

²⁰ Oco a lemela olondonge viaye hati, Ko ka sapuili umue okuti ame Kristu.

²¹ Tunde opo Yesu wa fetika oku sapuila olondonge viaye okuti co sesamela oku enda ko Yerusalãi kuenda oku fũkĩlisilua ovina via lua lakulu lovitunda vinene la vakuavisonehua. Wa vi sapuilavo okuti o pondiwa kuenje o pinduiwa eteke liatatu.

²² Kuenje Petulu wo kovongela pokanele, yu wa fetika oku u lemela hati, A Ñala! Suku ka ka ci tave! Eci ka ci keya kokuove.

²³ Puãi Yesu, oku ñualapo, wa popia la Petulu hati, A Satana, pita konyima yange. Ove wa ndingila ocilondokua momo ovisimilo viove havia Sukuko, viomanu.

²⁴ Oco Yesu wa popia lolondonge viaye hati, Umue nda o yongola oku ñuama, ka ka litende vali eye muẽle, a tikule ekulusu liaye, a ñuame.

²⁵ Momo u o yongola oku popela omuenyo waye u pesela ño, puãi u o mesila omuenyo waye u sanga.

²⁶ Ci kuatisa ndati omunu, nda o nganyala oluali luosi kuenje o takisa omuenyo waye? Omunu o pitisila nye vomuenyo waye?

²⁷ Momo Mõlomanu iya lulamba wa Isiaye kumue lovangelo vaye, kuenje o muisa omanu vosi, omunu ndovilinga viaye, omunu ndovilinga viaye.

²⁸ Mopia lene siti, Ocili, vamue va tãi kulo ka va mahi okufa toke va mola Mõlomanu iya vusoma waye.