MATEO 14 - Embimbiliya - Bíblia Sagrada em Umbundu

¹ Koloneke viaco ombiali Herode wa yeva oluhimo lua Yesu.

² Yu wa popia lakuenje vaye hati, U, Yoano Upapatisi wa pinduka ku vakualufa, oco a kasilili lunene.

³ Momo Herode wa kuata Yoano kuenje wo kuta loku u yika vokayike oku sanjuisa Herodiya, ukãi wa manjaye Filipu.

⁴ Omo Yoano a popia la Herode hati, Ove oku kala la Herodiya hesungako.

⁵ Herode wa yonguile oku ipa Yoano puãi wa kuata usumba wowiñi, omo vati, Yoano uprofeto.

⁶ Haimo lumue, keteke liunyamo wa Herode, omõla a Herodiya ukãi wa cĩlila kovaso avo kuenje wa sanjuisa Herode.

⁷ Oco Herode wa likuminya loku lisila oku eca kufeko cosi a pinga.

⁸ Ufeko wa tutuminyiwa la inaye oku kumbulula hati, Ñapele apa pocimanda utue wa Yoano Upapatisi.

⁹ Kuenje Soma wa sumua, puãi omo a lisila, kuenda oku sokolola akombe vaye, oco wa tumila oku u wiha,

¹⁰ okuti wa tuma oku topuisila Yoano vokayike.

¹¹ Kuenje utue waye wa nenelua vocimanda, wa eciwa kufeko, leye wo tuala ku inaye.

¹² Olondonge via Yoano vieya, via yelula ocivimbi caco yu va ci kenda. Noke va enda, va sapuila Yesu ndomo ca pita.

¹³ Oco, eci Yesu a ci yeva, wa tundako wa endela vowato. Wa enda vekalasoko kulika. Puãi, eci omanu va ci yeva, va tunda kovaimbo, kuenje, oku u kuama, va pita posi.

¹⁴ Oco, eci a tunda vowato, wa mola owiñi wa lua, kuenje, omo a va kuatela ohenda, wa sakula olombei viavo.

¹⁵ Eci ekumbi lia enda, olondonge viaye vieya kokuaye viti, Mulo vekalasoko, kuenje ekumbi lia enda. Sandula omanu oco va ende kovaimbo ha va lilandela okulia.

¹⁶ Puãi Yesu wa popia lavo hati, Ka va endi. Ene muele va ihi okulia.

¹⁷ Va popia laye vati, Tu kuete lika olombolo vitãlo lolosi vivali.

¹⁸ Kuenje eye hati, Vi neneli.

¹⁹ Oco wa sapuila omanu oku tumala kowangu. Oku tambula olombolo viaco vitãlo lolosi vivali wa imba ovaso kilu kuenje wa vi panduila. Noke wa vi timbula loku eca olombolo kolondonge viaye, kuenje olondonge via vi eca komanu.

²⁰ Yu va lia vosi kuenje ve kuta. Kuenje va nolapo ekui liovitenge kovitenge vivali vie yuka ovimalañanya via supapo.

²¹ Ava va lia va tẽla olohũlukãi vitãlo vialume, akãi lomãla ka va tendiwile.

²² Tuli va mala wa kisika olondonge oku wila vowato oku livanga oku yoka osimbu eye a sandula owiñi.

²³ Eci a sandula owiñi oco wa londa komunda kulika ha likutilila. Eci ca linga oñolosi haiko a siala lika liaye.

²⁴ Puãi owato wa kala vokati kokalunga kuenje wa pungua lakimba, momo ofela ya va tateka.

²⁵ Kuenje kuteke, kocipo cakuãla, eye weya kokuavo, endela kilu liovava.

²⁶ Eci olondonge viaye vio mõla, endela kilu liovava, via yokoka viti, Oco ocilũlu, kuenje va liyula lusumba.

²⁷ Haico Yesu wa popia lavo hati, Kolisiko, ame, ko ka yokoki.

²⁸ Petulu wo kumbulula hati, A Ñala, nda ove muẽle, mañinye okuti njiya kokuove kilu liovava.

²⁹ Yesu wa linga hati, Enju. Kuenje Petulu, oku tunda vowato, wa endela kilu liovava oku enda ku Yesu.

³⁰ Oku mola ofela, wa kuata usumba kuenje wa fetika oku vomba, yu wa vilikiya hati, A Ñala, mopele.

³¹ Haico Yesu a imba okuokuo kuaye kuenje wo kuata, yu wa popia laye hati, Okuekolelo litito, wa sumaila nye?

³² Oco, eci va wila vowato, ofela yu imuha.

³³ Kuenje ava va kala vowato vo fendela vati, Ocili, ove vumõla a Suku.

³⁴ Eci va yoka veya kongongo ko Genasara.

³⁵ Kuenje eci alume vaco vo limbuka va tuma kofeka yi lisungue lavo kuenje vo nenela vosi va vela.

³⁶ Vo pinga okuti va lamba ño kolunjenje luonanga yaye, kuenje vosi va lambako va sakuiwa.