MATEO 13 - Embimbiliya - Bíblia Sagrada em Umbundu

¹ Keteke liaco Yesu wa tunda vonjo, yu wa tumala kohulo yokalunga.

² Owiñi wa lua wo liongoluila oco wa wila vowato, kuenje wa tumalamo, owiñi wosi wa kala kongongo.

³ Yu wa popia lavo ovina via lua lolosapo hati, Uwayi umue wa tunda oku waya.

⁴ Eci a kala loku waya, olomema vimue via lokila kohulo yonjila kuenje olonjila vieya via vi lia.

⁵ Vikuavo via lokila pocikalakala, apa ka pali eve lia lua, oco via tunda lonjanga momo eve ka lia luile.

⁶ Eci ekumbi lia tunda via kakuka, kuenje, omo ka via kaile lolombombo, viovuka.

⁷ Vikuavo via lokila pocambanda kuenje ocambanda ca yova kuenje ca vi totomisa.

⁸ Vikuavo via lokila posi yiwa kuenje via ima olomema, vimue ocita, vimue akui epandu, vimue akui atatu.

⁹ U o kuete ovatui oku yeva a yeve.

¹⁰ Oco olondonge viaye vieya kokuaye kuenje vio pula viti, Nye o popela lavo lolosapo?

¹¹ Yu wa va kumbulula hati, Momo ene wa ihiwi oku kũlĩha alumbu usoma wo kilu, puãi ovo ka ca va ihiwile.

¹² Momo u o kuete ihiwa kuenje cu supokaila; puãi u ka kuete, ndaño eci a kasi laco cu nyehiwa.

¹³ Oco mopia lavo lolosapo momo va vanja puãi ka va lete, va yeva puãi ka va yevite, kuenda ka ci va lomboloka.

¹⁴ Yi va lingiwila ondaka yuprofeto Isaya, yiti, Oku yeva vu yeva, puãi ka vu yevite. Oku mola vu mola, puãi ka vu limbuka.

¹⁵ Momo utima womanu ava wa siva. Va yeva naito lovatui avo, va pata ovaso avo, kuenje va yeva lovatui avo, sanga va limbuka lovitima viavo, ha va tiuka kuenje ndi va sakula.

¹⁶ Puãi ovaso ene a sumũlũha momo a lete, lovatui ene haico momo a yeva.

¹⁷ Momo mopia lene siti, Ocili, ovaprofeto kuenda vakuesunga va lua va livelele oku mola ovina ene vu lete kuenje ka va vi muile, loku yeva ovina ene vu yevite kuenje ka va vi yevele.

¹⁸ Oco, yevi olusapo luwayi.

¹⁹ Nda umue o yeva ondaka yusoma kuenje ka yi yevite, oco eliapu liya ha liu nyeha eci ca kũliwa vutima waye. Eci oco ca wayiwa kohulo yonjila.

²⁰ U wa wayiwa kocikalakala, eye u yeva ondaka kuenje haico a tava lonjolela,

²¹ haimo ka kuete olombombo eye muẽle, kuenje o pandikisa naito ño, oco eci kuiya ohali loku sakalasailua ondaka, o konyoha lonjanga.

²² U wa kũliwa pokati kocambanda, eye u o yeva ondaka yaco kuenje ohele yoluali leliaño liukuasi vi totomisa ondaka yaco kuenje ka yi imi.

²³ U wa kũliwa vongongo yiwa eye u o yeva ondaka yaco yu yo yevala. Ocili omunu waco ima epako, umue ocita, umue akui epandu, umue akui atatu.

²⁴ Wa va tela olusapo lukuavo hati, Usoma wokilu wa soka ndomunu wa imba ombuto yiwa vepia liaye.

²⁵ Puãi, osimbu omanu va pekela, unyali waye weya, wa imba ombuto yosoka votiliku, oco wa enda.

²⁶ Puãi eci ocisila ca tunda kuenje ca ima olomema, oco osoka ya molehavo.

²⁷ Akuenje vamuẽleonjo veya, kuenje vo pula vati, A Ñala, kua kũlile ombuto yiwa vepia liove? Osoka hẽ, ya tunda pi?

²⁸ Yu wa va kumbulula hati, Unyali umue wa ci linga. Oco akuenje vo pula vati, O yongola okuti tu yi nolamo?

²⁹ Puãi eye hati, Hacoko, sanga osimbu vu nolamo osoka vu tukũlavo otiliku.

³⁰ Vi kulile ño kumuamue toke koku lombola, kuenje koku lombola mopia la vakuakulombola siti, Handi, noli osoka, yi kuti ovitungu ho yi yoki, puãi unguili otiliku vosila yange.

³¹ Wa va tela olusapo lukuavo hati, Usoma wokilu wa soka ndombuto yulemba omunu wa nyañula kuenje wa yi kũla vepia liaye.

³² Ocili yitito, olombuto viosi vikuavo vinene, puãi nda ya kula yi velapo, ovikũla viosi vi sule, yi linga uti, oco olonjila viovusenge viya kuenje vi tungila vovianja viawo.

³³ Wa popia lavo olusapo lukuavo hati, Usoma wokilu wa soka ndetumbisa ukãi a nyañula kuenje wa li tenga loviyongelo vitatu viosema toke cosi ca tumba.

³⁴ Ovina evi viosi Yesu wa popia lowiñi lolosapo, kuenje ka popele lavo cimue te lolosapo.

³⁵ Ca lingiwila okuti eci ca popiwa luprofeto ci lingiwa, cokuti Ngasama lolosapo. Mopia ovina via sitikiwa tunde koku seveta oluali.

³⁶ Oco wa sia owiñi, wa iñila vonjo. Kuenje olondonge viaye vieya kokuaye viti, Tu lomboluile olusapo luosoka yovepia.

³⁷ Eye wa va kumbulula hati, U wa waya ombuto yiwa, Mõlomanu;

³⁸ epia liaco, oluali; ombuto yiwa, omala vusoma; osoka yaco, omãla veliapu;

³⁹ unyali wa imbamo osoka, eliapu; okungula kuaco, esulilo lioluali; vakuaku ungula, ovangelo.

⁴⁰ Oco, ndeci osoka yi noliwapo kuenje yi yokiwa londalu, haico ci lingiwa kesulilo lioluali.

⁴¹ Mõlomanu o tuma ovangelo vaye kuenje vusoma waye va nolamo ovina viosi vi koka akandu, kuenje vakuakusinila ovihandeleko.

⁴² Kuenje va va imba velungulungu liondalu omu mu kala oku lila loku likeleketa ovayo.

⁴³ Oco vakuesunga va taima ndekumbi vusoma wa Isiavo. U o kasi lovatui oku yeva a yeve.

⁴⁴ Usoma wokilu wa soka ndukuasi wa solekiwa vepia. Umue wo walula kuenje wo lembika vali. Noke, omo a sanjuka, oco wa ka landisile cosi a kaile laco kuenje wa landa epia liaco.

⁴⁵ Kuenda vali, usoma wokilu wa soka ndufũli o sanda sanda olomota viwa viondongo.

⁴⁶ Kuenje eci a sanga omota yondongo ya tĩla ca lua, wa ka landisile cosi a kaile laco kuenje wa yi landa.

⁴⁷ Kuenda vali, usoma wokilu wa soka ndowanda wa imbiwa vokalunga kuenje wa kongela olosi viapata osi.

⁴⁸ Eci we yuka vo kokela kopalaya, oco, oku tumala, va nolela evi viwa vovikuata, puãi evi kaviwako va vi inasi.

⁴⁹ Haico ci lingiwa kesulilo lioluali. Ovangelo va tunda kuenje va tepa vakuevĩho la vakuesunga.

⁵⁰ Vakuevĩho va va imba velungulungu liondalu omu mu kala oku lila loku likeleketa ovayo.

⁵¹ Ovina evi viosi vu vi yevite? Vo kumbulula vati, Oco.

⁵² Yesu wa popia lavo hati, Oco ukuavisonehua wosi o linga ondonge yusoma wokilu wa soka nda muẽleonjo upopa vovikuata viaye ovina viokaliye lovina viale.

⁵³ Eci Yesu a mala olosapo evi wa tundamo.

⁵⁴ Oku iya koluse luavo wa va longisila volosunangonga viavo. Ca va komohisa ca lua kuenje va lipula pula pokati vati, U nga, olondunge evi lunene u wa vi upa pi?

⁵⁵ U siti omõla a carpinteiro? Inaye siti, Maria? Vamanjaye siti, Tiago la Yosefe la Simono la Yuda?

⁵⁶ Kuenda vamukãi waye vosi hẽ, ka va kasi kumue letu? Oco, ovina evi viosi wa vi upa pi?

⁵⁷ Kuenje va tatamisiwa laye. Puãi Yesu wa popia lavo hati, Uprofeto ka pumbi esumbilo te koluse luaye lo vepata liaye.

⁵⁸ Kuenje omo ka vo kolelele oco ka lingilileko ovikomo via lua.