MATEO 12 - Embimbiliya - Bíblia Sagrada em Umbundu

¹ Poloneke viaco, kesambata, Yesu wa kala loku pita vovapia. Olondonge viaye via kala lonjala kuenje via fetika oku kalula apunga loku lia.

² Puãi va Fariseo, eci va ci mola, va popia laye vati, Tala, olondonge viove vi kasi loku linga eci ka ci tava oku ci linga kesambata.

³ Eye wa kumbulula hati, Ka wa tangeli eci ca linga Daviti eci a kala lonjala, eye lava va kala laye,

⁴ ndeci va iñila vonjo ya Suku kuenje va lia ombolo ya tumbikiwa, yina ka ci tava okuti yi liwa laye, pamue lava va kala laye, te lovitunda lika?

⁵ Ele ka wa tangeli vovihandeleko ndomo ovitunda vi vihaisaila esambata vonembele kuenje va yovoka?

⁶ Mopia lene siti, Ulo wa velapo okuti onembele yi sule.

⁷ Puãi nda wa kũlĩhili ndeci ca lomboloka ondaka yiti, Njongola ohenda, ovilumba havioko, nda ka wa pisili ava va pua eko.

⁸ Momo Mõlomanu eye Cime cesambata.

⁹ Oco wa tundako, wa iñila vosunangonga yavo.

¹⁰ Kuenje tala, mua kala omunu umue leka lia siõsia. Yu vo pula vati, Ci tava hẽ oku kayisa kesambata? Vo ci pulila oku u pisa.

¹¹ Kuenje eye wa popia lavo hati, Helie pokati kene o kuete omeme yimuamue, nda yi fa vocitunyu kesambata, ka yi kuata ha yu upimo?

¹² Omunu hẽ, ka velipo ca lua okuti omeme yi sule? Oco ci tava oku linga ciwa kesambata.

¹³ Oco wa popia lomunu waco hati, Olõla eka liove. Eye wa li olõla kuenje kuenje lia ñuaima ndeka likuavo.

¹⁴ Puãi va Fariseo va tunda kuenje vo tumbika ongombo yoku u nyõla.

¹⁵ Yesu oku ci limbuka wa sondolokako, kuenje va lua vo kuama yu wa va kayisa vosi.

¹⁶ Kuenje wa va handeleka okuti ka vo sapula.

¹⁷ Ca lingiwila okuti ondaka ya popia uprofeto Isaya yi tẽlisua, yokuti,

¹⁸ Tala ukuenje wange nda nola. Utima wange wo sanjukila, ndu sole. Ndu wiha Espiritu liange. Eye o sapuila vakualofeka okuti kuli ekanga liesunga.

¹⁹ Ka hoyi, ka kaluka, lomue o yeva ondaka yaye voluwa.

²⁰ Oluneva lua sasoha eye ka lu teya. Ocinyaña ci taima ka cimi, toke a yulisa esunga.

²¹ Kuenje vakualofeka va muila elavoko konduko yaye.

²² Oco vo nenela omunu o kuetiwe locilũlu, haeye omeke, haeye ocitende. Yesu wo kayisa okuti u wa kaile ocitende wa popia kuenda wa letuluka.

²³ Owiñi wosi wa komoha, yu va linga vati, Ocili nga u omõla a Daviti?

²⁴ Puãi eci va Fariseo va ci yeva va linga vati, Omunu u, ka tundaisa ño ovilũlu te la Belesevulu, soma yovilũlu.

²⁵ Kuenje Yesu, omo a limbuka ovisimilo viavo, wa popia lavo hati, Ofeka yosi yi likatukila yi nyõleha. Limbo liosi, pamue onjo yosi, yi likatukila ka yi tumala.

²⁶ Satana nda o tundisa Satana ca lomboloka okuti wa likatukila. Oco hẽ, usoma waye u kala ndati osimbu?

²⁷ Ame nda nundisa ovilũlu la Belesevulu, omãla vene va vi tundisa lelie? Oco ovo va linga olonganji viene.

²⁸ Puãi nda ame ndi tundisa ovilũlu le Espiritu lia Suku oco usoma wa Suku weyale kokuene.

²⁹ Omunu iñila ndati vonjo yocindululu ha pundi ovikuata viaye nda tete ka kutile ocindululu? Pana okuti wa ci kutale oco ci tava noke oku punda onjo yaye.

³⁰ U wosi ka kasi lame unyali wange. U wosi kongoluila kumue lame o sandola.

³¹ Oco mopia lene siti, Ekandu liosi liomanu letonãi liosi li ecelua, puãi ekandu lioku popia Espiritu etonãi, olio ka li ecelua.

³² U o lundila cimue Mõlomanu cu wecelua, puãi u o lundila Espiritu Sandu ka cu wecelua, ndaño cilo, ndaño noke.

³³ Popi, nda hẽ uti waco uwa lepako liaco liwavo ale, ele nda uti waco ũvi lepako liaco lĩvivo, omo uti u limbukiwila kepako liawo.

³⁴ Amãla volonyoha, omo vulondingaĩvi, vu tẽla ndati oku popia ovina viwa? Momo eci ca siata vutima oco omẽla u popia.

³⁵ Omunu wa sunguluka, kovina viwa a soleka upopako ovina via sunguluka, puãi omunu wa vĩha, kovina via vĩha a soleka upopako ovina via vĩha.

³⁶ Kuenje mopia lene siti, Keteke liekanga omanu va puliwa olondaka viosi viesanda va popia kuenje va kumbulula ondaka ondaka.

³⁷ Momo o yovoka lolondaka viove pamue o pia lolondaka viove.

³⁸ Oco vamue vakuavisonehua la va Fariseo vamue va fetika oku popia laye vati, Olongisi, tu yongola oku muila ocilimbu cimue kokuove.

³⁹ Puãi eye wa va kumbulula hati, Ocitumbulukila ca vĩha haico cukahonga ci sanda ocilimbu, puãi ka cihiwa ocilimbu te eci cuprofeto Yona.

⁴⁰ Momo ndeci Yona a kaile vimo liocimuandu ovotanya atatu lovoteke atatu haico Mõlomanu o kala vutima wongongo ovotanya atatu lovoteke atatu.

⁴¹ Va Ninevei va pindukila kekanga kumue locitumbulukila cilo kuenje va ci pisa, momo ovo va likekembela akandu avo kohundo ya Yona, kuenje tala, kulo ku kasi u wa velapo okuti Yona o sule.

⁴² Nasoma yo ko Sul o pindukila kekanga kumue locitumbulukila cilo kuenje o ci pisa, momo eye wa tunda kasulilo oluali oku yeva olondunge via Salomone, kuenje tala, kulo ku kasi u wa velapo okuti Salomone o sule.

⁴³ Ocilũlu ca vĩha nda ca tunda vomunu ci tungayala vekango ka mu kuete ovava ha ci sandi epuyuko puãi ka ci li sangi.

⁴⁴ Oco ci popia citi, Niukila vonjo yange muna nda tunda. Eci ceya ca yi sanga upolokoso, mua kombiwa kuenda mua yanguiwa.

⁴⁵ Oco cenda, ci kopa ovilũlu vikuavo epanduvali via vĩha ca lua okuti catete ci sule, kuenje viñila loku tungamo, yu esulilo liomunu waco lĩvi, ndeci a kaile hise. Haico ci kala locitumbulukila cilo ca vĩha.

⁴⁶ Osimbu a kala loku vangula lowiñi, tala, inaye la vamanjaye vava, va talama posamua, yu va sanda oku vangula laye.

⁴⁷ Umue wa popia laye hati, Vanja, nyoho la vamanjove va tãilili posamua, va sanda oku vangula love.

⁴⁸ Puãi eye wa kumbulula, wa popia lu wo ci sapuila hati, Mãi elie? vamanjange velie?

⁴⁹ Yu woluĩla olondonge viaye eka liaye kuenje hati, Tali, mãi la vamanjange hava.

⁵⁰ Momo u o linga ocipango ca Tate o kasi kilu eye manjange, haeye mukãi wange, haeye mãi.