MATEO 11 - Embimbiliya - Bíblia Sagrada em Umbundu

¹ Eci Yesu a mala oku usika olondonge viaye ekui la vivali, oco wa tundako, wa enda oku longisa loku kunda vovaimbo avo.

² Yoano wa kala vokayike. Eci a yeva evi Kristu a kala loku linga, oco wa tuma olondonge viaye

³ oku u pula, okuti, Ove una o kasi loku iya ale, ale tu lavoka umue wiñi?

⁴ Kuenje Yesu wa va kumbulula hati, Kuendi, ka sapuili Yoano ovina vu yevite levi vu lete okuti,

⁵ olomeke vi letuluka, lovilema vi enda, vakuavilundu va yelisiwa, lovisitatui vi yeva, ava va fa va pinduka, lolosuke vi kundilua ondaka yiwa.

⁶ Kuenje u ka sangi kokuange eci cu tatamisa wa sumũlũha.

⁷ Eci va enda oco Yesu wa fetika oku vangula lowiñi omuenyo wa Yoano, hati, Wa ililili nye vekalasoko? oku tala oluneva lua lituñunya lofela ale?

⁸ Nda hacoko wa lilili nye? oku tala omunu wa wala uwalo u yuyuma ale? Ava va wala uwalo u yuyuma va kasi volonjo violosoma.

⁹ Puãi wa ililili nye? oku tala uprofeto ale? Ocili ndu sapuili, siti, Una wa endeleli wa velapo, uprofeto o sule.

¹⁰ Eye, eye una ovisonehua via lombolola, viti. Tala, ndi tuma omunga yange okuti o pita kovaso yove oku ku pelela onjila yove.

¹¹ Mopia lene siti, Ocili, pokati kava va citiwa lakãi ka pa la tukuluka u wa velapo okuti Yoano Upapatisi o sule; puãi u o sule vusoma wokilu unene, Yoano o sule.

¹² Tunde koloneke via Yoano Upapatisi toke cilo usoma wokilu wa kagisua, kuenje lopo vakuakukangisa vo kuata.

¹³ Momo ovaprofeto vosi lovihandeleko via imba owanji toke ku Yoano.

¹⁴ Kuenje, nda vu tava oku ci kolela, Yoano eye muẽle Eliya una iya.

¹⁵ U o kasi lovatui a yevelele.

¹⁶ Ocitumbulukila cilo ndi ci sokisa le? Ca soka ndomãla va tumala vovila kuenje va vilikiya vakuavo vati,

¹⁷ Tuo sikili olombendo kuenje ka wa cĩlili. Tua lila kuenje ka wa liteteleli.

¹⁸ Momo Yoano weya, ka lia lia, ka nyua nyua, kuenje vati, O kuete ondele.

¹⁹ Mõlomanu weya, o lia lia, kuenda o nyua nyua, kuenje vati, U, ocisapanu, oholua, haeye ekamba lia vakuakutambula elisimu kuenda vakuakandu. Haimo Ndunge o tendiwa ndukuesunga mekonda liovilinga viaye.

²⁰ Oco a fetika oku popia ovaimbo omu mua lingilua ovilimbu viaye via lua omo ka a likekembelele akandu avo,

²¹ hati, A Horaseni! Ngongo yove! A Betesaita! Ngongo yove! Momo ovilimbu via lingiwa kokuene nda via lingiwilile vo Turo lo vo Sidono, nda va likekembele osimbu, loku wala ovikeleyi kuenda oku tumala vetiko.

²² Puãi mopia lene siti, Keteke liekanga eyambulo lia Turo la Sidono li sule, liene li velapo.

²³ Kuenje ove, a Kafarinau, o kemalisilua kilu? Ndati, o lokila vonjembo. Momo ovonene a lingiwa kokuove nda a lingiwilile vo Sodomo nda lia kaile toke etaili.

²⁴ Mopia love siti, Keteke liekanga eyambulo lia Sodomo li sule, liove li velapo.

²⁵ Eteke liaco Yesu wa tuala hati, A Tate, a Cime cilu losi, hu sivaya omo wa sitikila ovina evi kolonoño la vakualondunge kuenje wa vi situluila komãla.

²⁶ A Tate, hu sivaya muẽle omo wa ci panga ndoco.

²⁷ Ovina viosi via ñundikiwa la Tate. Lomue wa kũlĩha Omõla te Isia, haico lomue wa kũlĩha Isia te Omõla, kuenda undeti Omõlaco a panga oku u situluila Isia.

²⁸ Enjui kokuange, vosi wa sovoloki kuenda wa lemiwi kuenje ndu kavuluisi.

²⁹ Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene,

³⁰ momo okanga yange ya sunguluka, locitele cange ca leluka.