MATEO 10 - Embimbiliya - Bíblia Sagrada em Umbundu

¹ Noke wongolola olondonge viaye ekui la vivali, yu wa va iha omoko yoku tundisa ovilũlu via vĩha, leyi yoku sakula okuvela kuosi lovoveyi osi.

² Olonduko viovapostolo ekui la vivali vievi: Tete, Simono wa tukuiwa Petulu, la huvaye Andereu, kuenda Tiago, omõla a Sebedeo, la manjaye Yoano,

³ Filipu la Bartolomeu, Tomasi la Mateo ukuakutambula elisimu, Tiago, omõla a Alfeo, la Tadeo,

⁴ Simono u Kanana, la Yuda Isikariote una wo pakula.

⁵ Ava ekui la vavali wa va tuma. Wa vosika hati, Ko ka endi lonjila yenda ku vakualofeka. Ko ka iñili vimbo limue lia va Samária.

⁶ Puãi cinene, kuendi kolomeme via nyelela viepata lia Isareli.

⁷ Eci vu kasi loku ñuala ñuala, kundi hoti, Usoma wokilu u kasi ocipepi.

⁸ Sakuli ava va vela. Pinduli ava va fa. Yelisi vakuavilundu. Tundisi ovilũlu. Omo wa tambuli ocali oco ecivo ocali.

⁹ Ko ka ambati ulu pamue opalata, pamue okovili vovivia viene.

¹⁰ Ko ka kali locipete cokonjila, pamue ovikutu vivali, pamue olohaku, pamue ombueti, momo ondingupange ya posokela okulia kuayo.

¹¹ Vimbo liosi wiñili, ci kale linene, ci kale litito, kũlĩhisimo umue wa sunguluka kuenje singi kokuaye toke vu tundamo.

¹² Eci wiñili vonjo yaco yi lami lombembua.

¹³ Oco nda onjo yaco ya sunguluka, ombembua yene yi yi wila; puãi nda onjo yaco ka ya sungulukile ombembua yi tiukila kokuene.

¹⁴ Wosi ko hindikisi pamue ka yevi olondaka viene, vonjo yaco, pamue vimbo liaco, tundimo. Kuenje eci vu tunda, tutumuli oneketela yaco kolomãi viene.

¹⁵ Mopia lene siti, Ocili, keteke liekanga eyambulo liofeka ya Sodomo la Gomora li sule, eyambulo limbo liaco li lua vali enene.

¹⁶ Tali, ndu tumi ndolomeme pokati kolombinji, oco lunguki ndolonyoha, unjuki ndolopomba.

¹⁷ Lunguki lomanu momo vo pakuila kakanga kuenje vo tipuila volosunangonga viavo.

¹⁸ Oco vu nanañainyailua kovaso olombiali lolosoma oku njimbila uvangi kokuavo kuenda ku vakualofeka.

¹⁹ Eci vo tuali kekanga, ko ka kuati ohele, hoti, Tu popia ndati, pamue tu popia nye? Momo ola yaco eci vu popia cu wihiwi.

²⁰ Momo heneko vu ci popia, puãi Espiritu lia Isiene eye u ci popisa.

²¹ Omunu o pakuila manjaye kokufa, isia o pakula omõlaye, omãla va katukila olonjali viavo ha va vi ipaisa.

²² Vu suvukilua onduko yange lomanu vosi, puãi u o pandikisa toke kefulilo eye o popeliwa.

²³ Eci vo talisi ohali vimbo eli, tilili kimbo likuavo, momo mopia lene siti, Ocili, ko mosula ovaimbo a Isareli osimbu Mõlomanu keyile.

²⁴ Ondonge ka yi velipo okuti ulongisi waye o sule, ndaño ukuenje ka velipo okuti cime caye o sule.

²⁵ Nda ondonge ya soka lulongisi waye, pamue ukuenje la cime caye, ci tẽla. Nda va tukula muẽleonjo vati, Belesevulu, vakuanjo yaye hẽ, ka ci piãla?

²⁶ Oco, ko ka va kuateli ohele; momo ka kuli eci ca tuvikiwa okuti ka ci tuvuka, ka kuli eci ca yombekiwa okuti ka ci kũlĩhiwa.

²⁷ Eci ndu ci sapuili vowelema ci popeli vutanya, leci co loñuilui ci kalukili kilu liolonjo.

²⁸ Ko ka kuateli usumba ava va ipa etimba puãi ka va tẽla oku ipa ocilelembia, puãi kuateli usumba u o tẽla oku nyõlela ocilelembia letimba vonjembo.

²⁹ Olongungu vivali hẽ, ka vi landiwa lolusendu? Kuenje layimue yavio yi lokila posi te Isiene wa ci panga.

³⁰ Puãi ndaño esinga liovovitue, viene lia tendiwa.

³¹ Oco ko ka kuati ohele, momo wa velipo olongungu via lua.

³² Wosi o njimbila uvangi kovaso omanu ame ndu wimbila uvangi kovaso a Tate o kasi kilu.

³³ Puãi wosi o liñalela kovaso omanu ame ndu likalelavo kovaso a Tate o kasi kilu.

³⁴ Ko ka soki hoti, Weya oku nena ombembua kilu lieve. Sieyilile oku nena ombembua, te oku imba osipata.

³⁵ Momo ndeyilila oku puiyisa omunu la isiaye kuenda omõla ukãi la inaye, londombua la ndatembo yaye yukãi;

³⁶ kuenje ovanyali vomunu vakuepata liaye.

³⁷ U o sole ca lua isiaye pamue inaye, okuti o sole ame citito, ka sungulukilile; lu o sole ca lua omõlaye, ci kale omõla ulume, ci kale omõla ukãi, okuti o sole ame citito, ka sungulukilile.

³⁸ U ka yelula ekulusu liaye ha ñuama ka sungulukilile.

³⁹ U wa sanga omuenyo waye u nyelisa, puãi u o nyelisila ame omuenyo waye eye u sanga.

⁴⁰ U u hindikisi o hindikisa ame, lu o hindikisa ame o hindikisa u wa numa.

⁴¹ U o hindikisa uprofeto omo uprofeto, o mola onima yuprofeto; lu o hindikisa ukuesunga omo ukuesunga, o mola onima yukuesunga.

⁴² Ocili, mopia lene siti, Wosi eca kumue wava vatito ndaño okopo yovava atalala omo ondonge ka pumbi onima yaye.