MARKO 9 - Embimbiliya - Bíblia Sagrada em Umbundu

¹ Yesu wa popia vali lavo hati, Mopia lene siti, Ocili vamue va tãi kulo ka va mahi kokufa te va mola usoma wa Suku weya lunene.

² Kovaso yoloneke epandu Yesu wa enda la Petulu la Tiago kuenda Yoano kuenje wa enda lavo kulika komunda yi sovi, yu wa pongolokela kovaso avo.

³ Uwalo waye wa nina, u yela ca lua, onjelisi yolonanga yokilu lieve nda ka yi tẽla oku u yelisa ndoco.

⁴ Kuenje kua va tukulukila Eliya la Mose, yu va kala loku vangula la Yesu.

⁵ Kuenje Petulu wa popia la Yesu hati, A Rambei, ciwa ndomo tu kasi kulo. Oco tu tungi olosinge vitatu, yimue yove, yimue ya Mose, yimue ye Eliya.

⁶ Eye ka kũlĩhile eci a popia, momo va saluka ca lua.

⁷ Kuenje elende lia va sikilila, valende mua tunda ondaka yiti, U, Omõlange wa soliwa u yevi.

⁸ Haico oku pukukako, lomue va mola vali te Yesu lika.

⁹ Osimbu va kala loku loka komunda Yesu wa va handeleka, hati, Ko ka sapuili omunu ovina wa moli te eci Mõlomanu a pinduka ku vakualufa.

¹⁰ Oco va tava kondaka eyi, puãi va lipula pokati kavo vati, Okupinduka kuaco ku vakualufa kua lomboloka ndati?

¹¹ Kuenje vo pula vati, Nye vakuavisonehua va popela vati, Eliya eye iya tete?

¹² Kuenje eye wa popia lavo hati, Ocili Eliya eye iya tete oku tumbulula ovina viosi, puãi ovisonehua vi lombolola ndati Mõlomanu? Vi lombolola okuti o talisiwa ohali ya lua, kuenje o tombiwa.

¹³ Puãi mopia lene siti, Eliya weyile ale, kuenje vo linga cosi va panga ndeci co sonehiwila.

¹⁴ Eci veya kolondonge, oco va mola owiñi wa lua u tãi lavio, kuenje vakuavisonehua va vi hoyisa.

¹⁵ Tuli omanu vo mola va lisaluka ca lua. Vo lupukila kuenje vo lama.

¹⁶ Yu wa va pula hati, Nye vu kasi loku hoya lavo?

¹⁷ Umue kowiñi wo kumbulula hati, Olongisi, nda ku nenela omõlange ukuenje omo o kuetiwe locilũlu cutende.

¹⁸ Kuosi co kuatela cu tanyisa, yu o tutuma efelefele kuenje o litakila ovayo. Cu kokela oku kopela vilu. Yu nda popia lolondonge viove, siti, Va ci tundise, kuenje ka via ci telele.

¹⁹ Oco Yesu wa va kumbulula hati, Acitumbulukila hacekoleloko, ñala lene toke pi? Toke pi mandikisa lene? U neneli.

²⁰ Kuenje vo vu nenela. Eci ocilũlu ca mola Yesu haico ca tanyisa ukuenje. Oco ukuenje wa kupukila posi kuenje oku tutuma efelefele wa tanya.

²¹ Yesu wa pula isiaye hati, Tunde pi apa ca ka wiya? Isiaye wa kumbulula hati, Tunde kumõla waye.

²² Olonjanja via lua co wimba pamue vondalu, pamue vovava, ha cu nyõli, puãi nda o tẽla cimue, tu linge ohenda, tu kuatise.

²³ Oco Yesu wa popia laye hati, Nda ndi ci tẽla! Ovina viosi vi tẽliwa lu o kolela.

²⁴ Haico isia yomõla a vilikiya hati, Ñolela. Nda nda kamba ekolelo ñuatise.

²⁵ Eci Yesu a mola okuti owiñi wa lupuka oku liongolola oco wa handeleka ocilũlu ca vĩha hati, Acilũlu cutende lusitatui, ha sapuila siti, Weca. Ku ko kuate vali.

²⁶ Kuenje eci ca liyula, kuenda co tanyisa ca lua, oco co weca, yu ukuenje wa linga ndocivimbi okuti va lua va popia vati, Wa fa.

²⁷ Puãi Yesu wo kuata peka, wo votola, kuenje wa votoka.

²⁸ Eci Yesu a iñila vonjo oco olondonge viaye vio pula kulika viti, Nye ka tua tẽlele oku ci tundisa?

²⁹ Yesu wa kumbulula hati, Evi viepata eli ka ci tava oku vi tundisa te lolohutililo.

³⁰ Kuenje va tundako yu va pita vo Galilea, kuenje Yesu ka tavele okuti umue o ci kũlĩha.

³¹ Momo wa longisa olondonge viaye, yu wa popia lavo hati, Mõlomanu o pakuiwa povaka omanu kuenje vo wipa. Leci a ipaiwa, kovaso yoloneke vitatu o pinduka.

³² Puãi ka va limbukile eci a popia, kuenje ca va linga ohele oku ci pula.

³³ Kuenje veya ko Kafarinau. Eci va iñila vonjo oco wa va pula hati, Nye wa lipataleli vonjila?

³⁴ Puãi voha, momo vonjila va lipatala ondaka eyi vati, Elie wa velapo?

³⁵ Oco wa tumala kuenje wa pañinya ekui liaco la vavali, yu wa popia lavo hati, Umue nda o yongola oku linga fu, a linge kuasula kua vosi lombumba ya vosi.

³⁶ Kuenje wa nyañula okamõla, yu wa ka tumbika pokati kavo, oco oku ka angata, wa popia lavo hati,

³⁷ U o hindikisila kamue ndaka onduko yange, ame a hindikisa, lu o hindikisa ame, hameko a hindikisa, puãi o hindikisa u wa numa.

³⁸ Yoano wa popia laye hati, Olongisi, tua mola umue wa tundisa ovilulu londuko yove, kuenje omo hokuetuko tuo tutuiya, tuti, Ku ka ci linge.

³⁹ Puãi Yesu wa linga hati, Ku ko tutuiye, momo ka kuli omunu o linga ocilimbu londuko yange kuenje o mopia cĩvi.

⁴⁰ Momo u ka tu tamalaila o tu amela.

⁴¹ Momo u o ku iha okopo yovava atalala, omo vukua Kristu, mopia lene siti, Ocili, ka pumbi onima yaye.

⁴² Kuende u o tatamisa kamue kava vatito va ñolela, ciwa laye nda ewe linene lioku fulila lia nyoñamisiwilue kosingo yaye kuenda wa imbiwilue vokalunga.

⁴³ Nda eka liove li ku tatamisa, li tetako; hise love oku iñila vomuenyo ocinimbaile, oku iñila vonjembo yondalu ka yimi lovaka avali hacoko;

⁴⁴ muna epuka liavo ka li fi londalu ka yi imi.

⁴⁵ Nda omãi yove yi ku tatamisa, yi tetako; ciwa love oku iñila vomuenyo lokulu kumuamue, oku imbiwa vonjembo lolomãi vivali hacoko;

⁴⁶ muna epuka liavo ka li fi londalu ka yi imi.

⁴⁷ Nda iso liove li ku tatamisa, li litofola, ciwa love oku iñila vusoma wa Suku liso limuamue, oku imbiwa vonjembo lovaso avali hacoko;

⁴⁸ muna epuka liavo ka li fi londalu ka yi imi.

⁴⁹ Momo vosi va singiwa londalu.

⁵⁰ Omongua uwa, puãi nda wa sava vu savulula le? Kali lomongua vokati kene ho likuateli ombembua pokati.