MARKO 8 - Embimbiliya - Bíblia Sagrada em Umbundu

¹ Koloneke viaco eci kua kala vali owiñi wa lua, kuenje ka va kuete okulia, eye wa pañinya olondonge viaye, yu wa popia lavo hati,

² Ñuetele owiñi ohenda, omo va kala lame oloneke vitatu kuenje ka va kuete okulia.

³ Nda ndi va eca ha va endi lonjala kovaimbo avo, va fila vonjila ipepe, omo vamue va tunda kupãla.

⁴ Oco olondonge viaye vio kumbulula viti, Mulo vekalasoko tu upa pi olombolo vioku kutisa va lua ndava?

⁵ Eye wa va pula hati, Vu kuete olombolo viñami? Ovo vati, Epanduvali.

⁶ Kuenje wa pañinya owiñi oku tumala posi; yu wa nyañula olombolo epanduvali. Eci a vi panduila wa vi timbula kuenje wa vi eca kolondonge viaye oku vi amuila owiñi, yu via vi amuila owiñi.

⁷ Kuenje via kalavo lotulosi tuñamiñami. Eci a tu panduila oco hati, Tu va amuilivo.

⁸ Yu va lia ve kuta, kuenje va nolapo ovihamba epanduvali violosisi via supapo.

⁹ Ava va liako va soka ndolohũlũkãi vikuãla.

¹⁰ Oco wa va eca kuenje haico a wila vowato kumue lolondonge viaye, kuenje veya konele yo ko Dalamanuta.

¹¹ Va Fariseo veya kuenje va fetika oku u hoyisa. Vo nyika poku u pinga ondimbukiso yokilu.

¹² Kuenje wa tulila omuenyo vutima waye, yu wa linga hati, Ocitumbulukila cilo, nye ci sandela ondimbukiso? Mopia lene siti, Ocili, layimue ondimbukiso yeciwa kocitumbulukila cilo.

¹³ Oco wa va sia, wa wila vali vowato, kuenje wa yokila kesinya likuavo.

¹⁴ Yu va ivalako oku ambata ombolo, kuenje ombolo yimosi lika va kala layo vowato.

¹⁵ Oco wa va lungula hati, Patuluki! Lunguki sanga vu lueyisiwa letumbisa lia va Fariseo kuenda etumbisa lia Herode.

¹⁶ Kuenje va vangula vati, Ka tu kuete ombolo pua.

¹⁷ Yesu, oku ci limbuka, wa popia lavo hati, Nye vu vanguila hoti, Ka tu kuete ombolo? Ka vu yevite? Ka wa ci limbukili? Ovitima viene hẽ, via siva?

¹⁸ Vu kuete ovaso puãi haimo ka vu lete? Vu kuete ovatui puãi haimo ko yevite? Ka wa ci ivalukili?

¹⁹ Cina nda timbuilile olohũlũkãi vitãlo olombolo vitãlo, ovitenge viñami viovimalañanya wa nolipo? Vo kumbulula vati, Ekui la vivali.

²⁰ Cina nda timbuilile olombolo epanduvali pokati kolohũlũkãi vikuãla, wa nolipo ovihamba viñami viovimalañanya? Kuenje vo kumbulula vati, Epanduvali.

²¹ Kuenje wa popia lavo hati, Lopo ko yevite?

²² Oco veya ko Betesaita, kuenje vo nenela omeke, yu vo pinga oku yi lamba.

²³ Kuenje wa kuata omeke peka, wa enda layo kofeka. Eci a siyila vovaso aye, kuenje wa wimba ovaka aye oco wo pula hati, O lete cimue?

²⁴ Yu wa petula ovaso aye kuenje hati, Ndete omanu, puãi ndi va lete va enda ndoviti.

²⁵ Oco wa imba vali ovaka kovaso aye. Omeke yu ya vanja sui, ya kaya, kuenje ya mola ciwa ovina viosi.

²⁶ Yu wa weca, wo tuma konjo yavo, hati, Ndaño vimbo ku ka iñilemo.

²⁷ Kuenje Yesu wa tunda kumue lolondonge viaye. Va enda kovaimbo o ko Kaisarea ka Filipu. Vonjila wa pula olondonge viaye, hati, Omanu va nukula ndati?

²⁸ Vo kumbulula vati, Vamue va ku tukula vati, Yoano Upapatisi, vakuavo vati, Eliya, vakuavo vati, Umue uprofeto.

²⁹ Yu wa va pula hati, Puãi ene vu nukula ndati? Petulu wa kumbulula hati, Ove u Mesiya.

³⁰ Yesu yu wa va handeleka hati, Ko ka ci sapuili omunu.

³¹ Kuenje eye wa fetika oku longisa okuti Mõlomanu o talisua ohali ya lua, kuenje o takumuiwa lakulu lovitunda vinene la vakuavisonehua. Noke ipaiwa kuenje kovaso yoloneke vitatu o pinduka.

³² Eci cosi wa ci popia kutanya. Oco Petulu wa enda laye kulika, kuenje wa fetika oku u lemela.

³³ Puãi Yesu wa ñualapo, kuenje eci a mola olondonge viaye, wa tutuiya Petulu hati, Kuende konyima yange, a Satana, momo ovisimilo viove havia Sukuko, viomanu.

³⁴ Kuenje wa pañinya owiñi kumue lolondonge viaye, yu wa popia lavo hati, Umue, nda o yongola oku ñuama, ka ka litende vali eye muẽle, a tikule ekulusu liaye, a ñuame.

³⁵ Momo u o seteka oku popela omuenyo waye u pesela ño; u o mesila ame londaka yiwa omuenyo waye, u popela.

³⁶ Ci kuatisa ndati omunu, nda o nganyala oluali luosi kuenje o takisa omuenyo waye?

³⁷ Omunu o pitisila nye vomuenyo waye?

³⁸ Momo u o ñuetele osõi vocitumbulukila cilo ca vakahongo haico ca vakuakandu, Mõlomanu u kuatelavo osõi eci eya vulamba wa Isiaye kumue lovangelo vaye va kola.