MARKO 7 - Embimbiliya - Bíblia Sagrada em Umbundu

¹ Eci va Fariseo la vamue vakuavisonehua va tunda ko Yerusalãi va liongoluila kokuaye oco

² va mola okuti vimue pokati kolondonge viaye via lia ño lovaka a vĩhisua, ca lomboloka okuti ka a yelisiwile.

³ Momo va Fariseo la va Yudea vosi, oku linga ovisila viakulu, ka va li te va pusa lutate.

⁴ Leci va tunda kocitanda ka va li te va liyelisa. Kuli ovisila vikuavo via lua va tẽlaisa vioku sukula oloneka lolombia lovikuata viosipi.

⁵ Kuenje va Fariseo la vakuavisonehua vo pula vati, Nye olondonge viove ka vi tavela ovihõlo via vakukululu puãi va lia ño lovaka a vĩhisua?

⁶ Yu wa popia lavo hati, A vakuambambe, Isaya wo wimbili owanji wocili eci o soneheli hati, Omanu ava va sumbila ño lovimela viavo, puãi ovitima viavo vi kasi ocipãla lame.

⁷ Va fendela ño esanda osimbu va kasi loku longisa ovisila viomanu.

⁸ Oku sia ovihandeleko via Suku, vu tava kovihõlo viomanu.

⁹ Kuenje wa popia lavo hati, Vu sia sia ovihandeleko via Suku ha vu lingainga ovihõlo viomanu.

¹⁰ Momo Mose hati, Sumba so la nyoho, kuenje u o popia cĩvi isiaye pamue inaye, oku fa a fe.

¹¹ Puãi ene vu linga hoti, Omunu nda o popia la isiaye pamue la inaye, hati, Eci cange wa sokele oku kuatisiwa laco ca linga elembe lia Suku,

¹² oco ko tava vali okuti o kuatisa isiaye pamue inaye.

¹³ Ca lomboloka okuti ovihõlo viene vi enda kovitumbulukila ovio vi nyõla ondaka ya Suku. Ocili vu linga ovina via lua via lisoka leci.

¹⁴ Oco wa pañinya vali owiñi, yu wa popia lawo hati, Ene vosi njeveleli kuenda limbuki.

¹⁵ Lacimue ka ci kasi ale vokati komunu, nda cu wiñila, ci tẽla oku u vĩhisa; puãi ovina vi tunda vomunu ovio vi tẽla oku u vĩhisa.

¹⁶ Umue nda o kasi lovatui oku yeva, a yeve.

¹⁷ Oco, eci a sia owiñi kuenje wa iñila vonjo, olondonge viaye vio pula olusapo.

¹⁸ Kuenje eye wa va pula hati, Lenevo wakuanumbi? Ka wa kũlĩhili okuti eci ka ci kasi ale vokati komunu nda ciniwa lomunu ka ci vĩhisa,

¹⁹ momo ka ci endi vutima, te vimo, kuenje ci imbiwa kusuafeka? Oco wa yelisa okulia kuosi.

²⁰ Kuenje hati, Eci ci tunda vomunu oco cu vĩhisa.

²¹ Momo vokati okuti vovitima viomanu, omo mu tunda ovipango vivi, ukahonga, umunu, umondi, oku pekelisa,

²² alivelo ãvi, asuvu, elimbi, oku pua ohele, onya, alundi, ocipombo, ahuku.

²³ Ovina evi viosi vĩvi vi tunda vokati kuenje vi vĩhisa omunu.

²⁴ Kuenje oku katuka wa tundako, wa enda konele ya Turo la Sidono. Yu wa iñila vonjo yimue kuenje ka yonguile okuti omanu va ci kũlĩha, puãi ka ca tavele okuti o vunda.

²⁵ Puãi haico ukãi umue o kuete omõla okofeko o kuetiwe locilũlu cĩvi, omo o yevela oluhimo, weya wo fendela.

²⁶ Ukãi waco u Helasi, oluse luavo ko Surofoinike. Kuenje wo peya okuti o tundisa ocilũlu ci kuete omõlaye.

²⁷ Oco Yesu wa popia laye hati, Omãla ve kute handi, momo ka ca sungulukile oku nyañula ombolo yomãla loku yimba kolombua.

²⁸ Puãi ukãi wa kumbulula hati, Oco muẽle a Ñala, haimo lumue olombua vi lia lia olosisi viomãla vemi liomesa.

²⁹ Oco Yesu wo kumbulula hati, Omo wa popia ondaka oyo, kuende, omõlove ocilũlu co weca.

³⁰ Oco wa enda konjo, yu wa sanga omõlaco vula, kuenje ocilũlu co tunda.

³¹ Yesu wa tunda vali vofeka ya Turo, yu wa pita vo Sidono oku tomela vofeka ya Dekapoli, weya kokalunga ka Galilea.

³² Yu vo nenela ocisitatui, haeye o popia ocilaka, kuenje vo pinga oku u kapa ovaka.

³³ Kuenje oku wupa vowiñi, wa enda laye kulika, yu wa kapa imuine vovatui aye, oku siya wa lamba kelimi liaye.

³⁴ Kuenje oku imba ovaso kilu, wa tula omuenyo kuenje hati, Efata, ca lomboloka citi, Situluka.

³⁵ Yu ovatui aye a situluka lelimi liaye lia kutuluka kuenje wa popia ciwa.

³⁶ Oco wa va handeleka hati, Ko ka ci sapuili umue. Puãi, ndeci a tongeka oku ci handeleka, haico va ci sapula ca lua.

³⁷ Yu va komoha cu lua vati, Ovina viosi wa vi linga nye ciwa! O yevisa ovisitatui, kuenda ovitende vi popia.