MARKO 6 - Embimbiliya - Bíblia Sagrada em Umbundu

¹ Yesu, oku tundako, wa enda koluse luaye kuenje olondonge viaye vio kuama.

² Kesambata wa fetika oku longisa vosunangonga kuenje va lua vo yeva va komoha vati, Ovina evi hẽ, u wa vi upa pi? Olondunge vie via ihiwa omunu u? Ovilinga vinene vi lingiwa lovaka aye!

³ U siti carpinteiro, omõla a Maria, huva a Tiago la Yose kuenda Yuda la Simono? Vamukãi vaye hẽ, ka va kasi letu kulo? Kuenje va tatamisiwa laye.

⁴ Yesu wa popia lavo hati, Uprofeto ka pumbi esumbilo, te koluse luavo lo kepata liavo lo vonjo yavo.

⁵ Kuenje ka tẽlele oku lingako ocikomo, olombei viñamiñami lika a sakula poku vi kapa ovaka aye.

⁶ Eye wa komoha omo ka vo kolelele. Kuenje wa ñuala ñuala vovaimbo oku longisa.

⁷ Yu wa pañinya ekui liaco la vavali, kuenje wa fetika oku va tuma vavali, vavali, loku va iha omoko yoku tundisa ovilũlu via vĩha.

⁸ Wa vosika hati, Ko ka ambateli cimue ungende wene, te ombueti; okulia hakoko, ndaño ocipete, ndaño olombongo vovivia viene.

⁹ Oku wala olohaku ci tava puãi ko ka wali olombinja vivali.

¹⁰ Wa popia lavo hati, Kuosi wendi, eci vu singa vonjo yimue, kali vonjo yaco toke vu tunda vimbo liaco

¹¹ Imbo limue nda ka li tava oku u hindikisi pamue ka vo yevi, eci vu tundamo, tutumuli oneketela polomãi viene ndondimbukiso yoku va pisa.

¹² Oco va tunda, kuenje va kunda kunda vati, Likekembeli akandu ene.

¹³ Va tundisa ovilũlu via lua, kuenje va lua va vela va va waveka ulela, yu va va kayisa.

¹⁴ Soma Herode wa ci yeva, momo onduko ya Yesu ya yevala. Vamue vati, Yoano Upapatisi wa pinduiwa ku vakualufa, oco a kasilili lunene.

¹⁵ Puãi vakuavo vati, Eliya, vakuavo vati, Uprofeto wa soka lovaprofeto vosiahũlu.

¹⁶ Puãi, eci Herode a ci yeva, wa popia hati, Yoano una nda topola utue eye wa pinduka.

¹⁷ Momo Herode wa tumile oku kuata Yoano yu wo yikila vokayike. Wo yikila Herodiya, ukãi wa manjaye Filipu, omo wo kuela.

¹⁸ Yoano wa popia la Herode hati, Oku kala lukãi wa manjove hesungako.

¹⁹ Herodiya wo lipañela, kuenje wa yongola oku wipa, puãi ka ci tẽlele

²⁰ momo Herode wa kuatela Yoano usumba. Omo wa kũlĩha okuti Yoano ukuesunga haeye o kola, oco wo lava ciwa. Oco, eci o yeva, wa sakalala, puãi haimo wo yeva lonjolela.

²¹ Puãi keteke liunyamo wa Herode kua moleha evelo, omo Herode wa laleka kofesta olosekulu viaye la vakesongo vaye lakulu va Galilea.

²² Eci omõla a Herodiya ukãi a iñila kuenje wa cĩla, oco ca sanjuisa Herode lakombe vaye. Oco Soma wa popia lufeko hati, Minge cosi o panga kuenje hu ciha.

²³ Yu wa likuminya ohuminyo yi kola, hati, Cosi o minga hu iha, ndaño ombandu yofeka yange.

²⁴ Oco ufeko wa tunda, wa pula inaye hati, Minga nye? Inaye wa kumbulula hati, Pinga utue wa Yoano Upapatisi.

²⁵ Haico a iñila ku Soma lonjanga, yu wa pinga hati, Njongola okuti o nyiha ndopo utue wa Yoano Upapatisai pocimanda.

²⁶ Oco soma wa sumua ca lua, puãi omo a lisinga esingo li kola, lomo a kala lakombe va tumala laye kokulia, oco ka yonguile oku u likala.

²⁷ Haico Soma a tuma ukuenje welombe oku kopa utue wa Yoano. Ukuenje wa endako, wa topuila Yoano vokayike,

²⁸ kuenje weya lutue waye vocimanda, yu wo weca kufeko kuenje ufeko wo weca ku inaye.

²⁹ Eci olondonge viaye via ci yeva, oco vieya, via yelula ocivimbi caco, kuenje via ci kapa vosonje.

³⁰ Ovapostolo va liongoluila ku Yesu kuenje vo sapuila ovina viosi va linga, lovina viosi va longisa.

³¹ Kuenje eye wa popia lavo hati, Enjui ene muẽle, tu endi lika lietu vekalasoko ho puyuka naito. Momo va lua veya, va lua va enda, kuenje ka va muile evelo ndaño lioku lia.

³² Kuenje va tunda lowato, va enda lika liavo vekalasoko.

³³ Eci va enda omanu va va mola kuenje va lua va ci kũlĩha. Oco, oku tunda kovaimbo osi, va pita kongongo oku lupukila kekalasoko kuenje va livanga.

³⁴ Eci a tunda vowato oco wa mola owiñi wa lua, yu wa va kuatela ohenda, momo va linga ndolomeme ka vi kasi lungombo, kuenje wa fetika oku va longisa ovina via lua.

³⁵ Eci ekumbi lia enda oco olondonge viaye vieya kokuaye, viti, Mulo vekalasoko, kuenje ekumbi lia enda.

³⁶ Va va ece oco va ende vovapia lo vovaimbo a lisungue oku landa okulia.

³⁷ Puãi eye wa popia lavo, hati, Va ihi okulia ene muẽle. Kuenje vo kumbulula vati, Nga, tu ka landa olombolo via soka lovita vivali kolosingu ha tu va iha okulia.

³⁸ Oco wa va pula hati, Vu kuete olombolo viñami? Kuendi, ka vanji. Oco eci va ka ci kũlĩhisa vo sapuila, vati, Olombolo tu kasi lavio vitãlo, lolosi vivali.

³⁹ Eye wa va handeleka oku tumala vowangu u talala, ovimuka.

⁴⁰ Oco va tumala kilala viocita ocita, kuenda viakui atãlo atãlo.

⁴¹ Eye wa nyañula olombolo viaco vitãlo lolosi viaco vivali, yu oku imba ovaso vilu, wa pandula kuenje wa timbula olombolo, yu wa vi eca kolondonge oku amuila pokati kavo vosi, kuenda olosi vivali wa vi amula.

⁴² Kuenje vosi va lia ve kuta.

⁴³ Va nolapo ekui liovitenge kovitenge vivali viovimalañanya, kuenda evi violosi.

⁴⁴ Kuenje ava va lia kolombolo viaco va soka olohũlũkãi vitãlo kalume.

⁴⁵ Haico a kisika olondonge viaye oku wila vowato ha viu liangela kesinya ko Betesaita osimbu eye a kasi loku sandula owiñi.

⁴⁶ Eci a vosika oco wa enda komunda oku ka likutilila.

⁴⁷ Eci ca linga oñolosi owato wa kala vokati kokalunga, kuenje eye wa kala kongongo kulika.

⁴⁸ Eci a mola okuti va likavisa ño loku tapula, momo ofela ya va tateka, oco kuteke, kocipo cakuãla, eye weya kokuavo loku endela kilu liovava, kuenje wa sokele oku va pitahãla.

⁴⁹ Puãi ovo, eci vo mola endela kilu liovava, va soka vati, Ocilũlu, kuenje va liyula.

⁵⁰ Momo vosi vo mola kuenje va yokoka. Puãi haico a popia lavo hati, Kuati utõi! Ame. Ko ka yokoki.

⁵¹ Yu wa kokela kokuavo, wa wila vowato kuenje ofela ya imuha, oco va saluka ca lua loku komoha.

⁵² Momo ka va limbukile eci ca lingiwa lolombolo, ocili ovitima viavo via va puiya.

⁵³ Eci va yokila kesinya, oco veya ko Genesara, yu va pandekela owato kongongo.

⁵⁴ Tuli va tunda vowato haico omanu vo limbuka.

⁵⁵ Kuenje va fetika oku yolokela kuosi ku lisungue, vambatela ava va vela voviyalo viavo ha va va tuala kuosi vo yevela.

⁵⁶ Kuenje kuosi a iñila, ci kale vovaimbo atito, ci kale vovaimbo anene, ci kale pi la pi, oko va langeka ava va vela vovitanda, kuenje vo pinga okuti va lamba ndaño kolunjenje luwalo waye. Kuenje vosi va lambako va kaya.