MARKO 5 - Embimbiliya - Bíblia Sagrada em Umbundu

¹ Kuenje va pitila kesinya liokalunga vofeka ya va Gerasa.

² Eci a tunda vowato, haico omunu wa tunda volosonje a ñualehẽla laye, haeye o kuetiwe locilũlu ca vĩha.

³ Wa kala kala volosonje kuenje lomue wa tẽla oku u kuta vali, ndaño lalienge;

⁴ momo wa kutawaile olonjanja via lua lovikumbi lalienge, puãi alienge wa a tepa, lovikumbi wa vi teya. Lomue wa kala lolohõlo oku u pokuisa.

⁵ Uteke lutanya wa kala volosonje lo volomunda; wa kaloka, kuenje wa litãla tãla lovawe.

⁶ Oco, eci a muila Yesu kupãla, wa lupuka kuenje wo fendela.

⁷ Oku vilikiya londaka ya lua, wa linga hati, A Yesu, A Mõla a Suku Tõlo, o yongola oku linga nye lame? Hu livondela vonduko ya Suku, siti, Ku ka njambule.

⁸ Momo Yesu a popia ale laye hati, Acilũlu ca vĩha, weca.

⁹ Yesu yu wo pula hati, Ove elie? Yu wo kumbulula hati, Ame Lohoka, momo tua lua.

¹⁰ Kuenje vio livondela ca lua viti, Ku ka tu tundise vofeka.

¹¹ Kua kala ocunda cinene colongulu ca lila kepato liomunda.

¹² Kuenje ovilũlu vio livondela viti, Tu tume kolongulu okuti tu iñilamo.

¹³ Kuenje wa vi tava. Oco ovilũlu via vĩha vio tunda, kuenje via iñila volongulu. Ocunda colongulu ca soka ndolohũlũkãi vivali condumuhila vocingunguma, kuenje ca taka vokalunga.

¹⁴ Alisi vaco va tila yu va ci sapuila vimbo lo vofeka. Oco omanu veya oku tala eci ca lingiwa.

¹⁵ Veya ku Yesu, kuenje va tala u wa kuatiwile lovilũlu yu, wa tumala, wa wala, wa kaya, una wa kuatiwile lolohoka, kuenje va kala lusumba.

¹⁶ Ava vi ci mola va sapula ndeci ca lingiwa lu wa kuatiwile lovilũlu, leci ca lingiwa lolongulu.

¹⁷ Oco va fetika oku livondela Yesu okuti o tunda vofeka yavo.

¹⁸ Kuenje eci a soka oku wila vowato oco ulume una wa kuatiwile lovilũlu wo livondela oku kala laye.

¹⁹ Yesu puãi ka tavele, wa popia laye, hati, Kuende konjo yene kuenda ku vakuẽle. Va sapuila ovina viosi Suku a ku lingila, kuenda ndeci a ku linga ohenda.

²⁰ Oco wa tundako, wa fetika oku sapuila vo Dekapoli ovina viosi Yesu o lingila, kuenje omanu vosi va komoha.

²¹ Eci Yesu a tiukila vali kesinya lowato oco owiñi wa lua wo liongoluila, kuenje wa kala kohulo yokalunga.

²² Kueya umue ukulu wosunangonga, onduko yaye Yairo. Oku mola Yesu, wo fendela,

²³ yu wo livondela ca lua hati, Omõlange, okofeko, o yongola oku fa. Enju o wimbe ovaka ove, oco a kaye, a kale lomuenyo.

²⁴ Oco wa enda laye. Owiñi wa lua wo kuama, yu vo sinda.

²⁵ Umue ukãi wa pita osonde ekui lianyamo kanyamo avali,

²⁶ kuenje wa tala ohali kolondotolo via lua, yu wa pesela cosi a kaile laco, haimo lohise lakamue, te oku vokiya.

²⁷ Oco, omo a yeva oluhimo lua Yesu, weya lowiñi konyima yaye kuenje wa lamba kuwalo waye.

²⁸ Momo wa linga hati, Ndaño ndamba ño kuwalo waye ñaya.

²⁹ Haico okupita kuosonde yaye kua kotoka, kuenje wa limbuka vetimba liaye okuti wa kaya uvei waye.

³⁰ Haico Yesu, omo a kũlĩha vutima waye okuti unene wo tunda, oco wa pongolokela vowiñi, kuenje hati, Helie wa lamba kuwalo wange?

³¹ Oco olondonge viaye via popia laye viti, O lete owiñi u kasi loku ku sinda, haimo o pula huti, Helie wa ndamba?

³² Oco wa pukukako oku vanja omunu wo lamba.

³³ Ukãi waco, omo wa kũlĩha eci co lingiwa, weya lusumba loku luluma kuenje, oku u fendela, wo sapuila ocili cosi.

³⁴ Oco Yesu wa popia laye hati, Amõlange, ekolelo liove lia ku popela. Kuende lombembua. Uvei wove wa ku tunda.

³⁵ Osimbu a kala loku popia, kueya vamue va tunda kukulu wosunangonga, vo sapuila vati, Omõlove wa fa. O kavisila vali nye ulongisi?

³⁶ Puãi eci va popia, Yesu ka ci kapeleko, oco wa popia lukulu wosunangonga hati, Ku ka kuate ohele, kolela ño.

³⁷ Kuenje ka tavele umue oku enda laye, te Petulu la Tiago la Yoano, manja a Tiago.

³⁸ Oco veya konjo yukulu wosunangonga, yu wa mola owiñi womanu va lila loku sinumula ca lua.

³⁹ Eci a iñila, wa va pula hati, Nye vu yuelela? Vu lilila nye? Momo omõla ka file, wa pekela ño otulo.

⁴⁰ Kuenje vo yola epembe. Puãi eye wa va tundisamo vosi, oco wa enda la isia yomõla la inaco lava va kala laye, kuenje wa iñila omu mu kasi omõla.

⁴¹ Yu, oku kuata omõla peka, wa popia laye hati, Talita kumi, ca lomboloka citi, Ofeko, hu sapuila siti, Pasuka.

⁴² Haico ufeko a votoka, kuenje enda, momo wa tẽla ekui lianyamo kanyamo avali. Kuenje va saluka okusaluka kua lua.

⁴³ Yesu wa va kandangiya ca lua okuti lomue ka ka ci kũlĩhe, kuenje wa handeleka hati, A ihiwe okulia.