MARKO 4 - Embimbiliya - Bíblia Sagrada em Umbundu

¹ Yesu wa fetika vali oku longisa konele yokalunga. Yu owiñi wa lua wo liongoluila, oco a wila vowato kuenje omo a tumala vokalunga. Owiñi wa kala kohulo yokalunga kongongo.

² Oco wa va longisa ovina via lua lolosapo. Oku va longisa, wa popia lavo hati,

³ Yeveleli! Uwayi umue wa tunda oku waya.

⁴ Oco eci a waya, olomema vimue via lokila kohulo yonjila, kuenje olonjila vieya yu via vi lia.

⁵ Kuenje vikuavo via lokila pocikakala opo ka pa kuete eve lia lua; via tunda lonjanga momo eve liaco ka lia longele.

⁶ Eci ekumbi lia tua via kakuka kuenje, omo ka via kaile lolombombo, viovuka.

⁷ Vikuavo via lokila pocambanda, kuenje ocambanda ca yova, ca vi totomisa, oco ka via imile.

⁸ Vikuavo via lokila posi yiwa kuenje via ima olomema, oku kula via yova kuenje via ima, vimue akui atatu, vimue akui epandu, vimue ocita.

⁹ Oco wa popia hati, U o kasi lovatui oku yeva a yeve.

¹⁰ Eci a kala lika liaye oco ava va kala laye kumue lekui liaco la vavali va pinga okuti o va lomboluila olosapo.

¹¹ Eye wa popia lavo hati, Ene wa kundikiwi elumbu liusoma wa Suku, puãi ava ka va kundikiwile elumbu liaco ovina viosi vi va lomboluiwa lolosapo okuti,

¹² oku vanja va vanja, puãi ka va lete, oku yevelela va yevelela kuenje ka va yevite, sanga mbi va pongoloka kuenje ci va ecelua.

¹³ Kuenje wa popia lavo hati, Olusapo olu hẽ, ka luo lombolokeli? Nda oco, vu limbuka ndati olosapo viosi?

¹⁴ Uwayi o waya ondaka.

¹⁵ Ava vokohulo yonjila oko ku wayiwa ondaka, tuli va yeva, Satana iya kuenje o nolapo ondaka ya wayiwa vitima viavo.

¹⁶ Haico ava va wayiwa kocikakala, tuli va yeva, haico va tava lonjolela,

¹⁷ kuenje omo ka va kasi lolombombo ovo muẽle, puãi va pandikisa ño naito, oco nda kuiya ohali pamue oku sakalasailua ondaka, haico va konyoha.

¹⁸ Kuenje vakuavo va wayiwa pokati kocambanda vava va yeva ondaka,

¹⁹ kuenje ohele yoluali, leliaño liukuasi, lovilivelo viovina vikuavo, viñila, vi totomisa ondaka, kuenje yi linga ocikupa.

²⁰ Kuenje ava va wayiwa kongongo yiwa ovo va yeva ondaka kuenje va yi tava, yu va ima, vamue akui atatu, vamue akui epandu, vamue ocita.

²¹ Yesu wa popia vali lavo hati, Ondiyelo hẽ, yi nenelua oku kapiwa vemi lionjongo, pamue vemi liula, okuti hakomesa yacoko?

²² Momo lacimue ci solekiwa, te ci solekiwila oku muiwa noke, lacimue cuhilua te cuhiwilua oku sapuiwa noke.

²³ Umue nda o kasi lovatui oku yeva, a yeve.

²⁴ Kuenje wa popia lavo hati, Lunguki leci vu yeva, momo onjongo vu yonga layo haiyo vo yongeli, kuenje cu vokiyiwi.

²⁵ Momo u o kuete ihiwa, kuenje u ka kuete o nyehiwa ndaño eci a kuete.

²⁶ Kuenje wa popia vali, hati, Usoma wa Suku wa lisoka ndomunu imba ombuto posi.

²⁷ Osimbu a pekaela loku pasoka uteke lutanya, oco ombuto yi tunda, yi kula, kuenje ndeci ya ci linga eye ka ci kũlĩhile.

²⁸ Osi yimisa oyo muẽle, tete osongo, noke ocisangu, noke olomema vocisangu.

²⁹ Puãi eci olomema vi yela, haico a tuma omila, momo okungula kueya.

³⁰ Wa popia vali hati, Usoma wa Suku, tu u sokisa ndati, tu u tela olusapo lue?

³¹ Wa lisoka lombuto yulemba, okuti nda yimbiwa posi, ndaño yitito pokati kolombuto viosi viokilu lieve,

³² haimo, nda yi kũliwa, yi tunda, kuenje yi kula, yi linga uti unene, ovikũla viosi vikuavo vi sule, yi kuata ovianja vinene kuenje olonjila viovusenge vi tunga vulembo wawo.

³³ Yu wa va longisa lolosapo via lua ndevi ndomo va tẽla oku yeva.

³⁴ Ka va longisile cimue, te lolosapo, puãi, kolondonge viaye muẽle kulika, wa lombolola cosi.

³⁵ Eteke liaco, eci ekumbi lia iñila, eye wa popia lavo hati, Tu endi kesinya.

³⁶ Oku sia owiñi, va enda laye vowato ndeci a kala. Kuenje awato akuavo a kala laye.

³⁷ Oco, kueya ehunguhungu lia lua kuenje akimba a samohaila vowato toke owato wa soka oku yuka.

³⁸ Eye muẽle wa kala ketako liowato, wa pekela kopetu, kuenje vo pasula, va popia laye vati, Olongisi, ka ci ku vindula ohele nda tu nyõleha?

³⁹ Yu wa pasuka, wa lemẽla ofela, kuenje wa popia lokalunga hati, Liweka, tulumuha. Kuenje ofela ya liweka, yu kueya etulumuho lia lua.

⁴⁰ Oco eye wa va pula hati, Wa salukili nye? Ka wa kuateli handi ekolelo?

⁴¹ Kuenje va kala lusumba wa lua. Va vangula vati, U helie nga okuti ndaño ofela lokalunga viu pokola?