MARKO 2 - Embimbiliya - Bíblia Sagrada em Umbundu

¹ Eci pa pita oloneke vimue, oco a iñila vali ko Kafarinau, kuenje omanu va yeva okuti o kasi vonjo.

² Va lua va liongolola, oco ka va suilemo, ndaño puvelo ka va suilepo. Wa kala loku va kundila ondaka.

³ Kuenje kueya ava vo nenela omunu wa fa ovolu, wa yinjiwa la vakuãla.

⁴ Eci ka va tẽlele oku pitila ocipepi laye omo owiñi waco wa lua, oco va papulula utu wonjo omo a kala, kuenje, eci vo tuiya, va lowisa ula omu mua pekela u wa fa ovolu.

⁵ Eci Yesu a mola ekolelo liavo oco wa popia lu wa fa ovolu, hati, Amõlange, akandu ove a eciwa.

⁶ Puãi vamue vakuavisonehua va tumalako va sokolola vovitima viavo vati,

⁷ Omunu u, nye a popela ndeti? O popia etonãi. Elie o tẽla oku ecela akandu nda ha Suku ko lika?

⁸ Haico Yesu, oku limbuka vutima waye okuti oco va sokolola vitima viavo, wa popia lavo hati, Ovina vi, nye vu vi sokoluila vitima viene?

⁹ Ca lelukapo ci pi, oku popia lu wa fa ovolu, siti, Akandu ove a ecelua, ele, ale oku popia laye siti, Votoka. Tikula ula wove, kuende?

¹⁰ Puãi oku vu lekisa okuti Mõlomanu o kasi lomoko yoku ecela akandu kilu lieve,— wa popia lu wa fa ovolu, hati,—

¹¹ Mopia love siti, Votoka. Tikula ula wove. Kuende konjo yove.

¹² Kuenje wa votoka, haico a tikula ula, yu wa tundila kovaso a vosi. Oco vosi va komoha, kuenje va sivaya Suku, vati, Ka tua la mola cimue ndeci.

¹³ Eci a tunda vali oco wa enda konele yokalunga, kuenje owiñi wosi wa enda kokuaye, yu wa va longisa.

¹⁴ Eci a pitako wa mola Lewi, omõla a Alfeo, wa tumala powombo. Yesu wa popia laye hati, Ñuame, yu wa votoka, wo kuama.

¹⁵ Oco, eci a tumala oku lia vonjo yaye, vakuakutambula elisimu va lua, la vakuakandu va lua, va tumala kumue la Yesu kuenda olondonge viaye, momo va lua vo kuama kuama.

¹⁶ Kuenje vakuavisonehua va va Fariseo, eci va mola okuti o kasi loku lila kumue la vakuakandu la vakuakutambula elisumu, oco va popia lolondonge viaye, vati, Nye a lila loku nyuila kumue la vakuakutambula elisimu la vakuakandu?

¹⁷ Eci Yesu a ci yeva wa popia lavo hati, Ava va vela ovo va posokela ondotolo, ava va ñuai havoko. Sieyilile oku kovonga vakuesunga, te vakuakandu.

¹⁸ Kuenje olondonge via Yoano la va Fariseo va kala loku likandangiya okulia. Oco omanu veya kuenje vo pula vati, Olondonge via Yoano levi via va Fariseo vi likandangayaila nye okulia, olondonge viove puãi ka vi likandangiya okulia?

¹⁹ Kuenje Yesu wa va kumbulula hati, Vasandombua hẽ, va tẽla oku likandangiya okulia osimbu sandombua a kasi lavo kumue? Osimbu sandombua a kasi lavo kumue, ka va tẽla oku likandangiya okulia.

²⁰ Ku keya oloneke eci sandombua a vopiwa, oco va likandangiya okulia eteke liaco.

²¹ Lomue o tongela ocitetele conanga ka ya likonyele kuwalo wa kuka, sanga ombandekua yi nala kuwalo waco, oco kuiya epangu linene.

²² Kuenje lomue o longela ovinyu viokaliye volonjeke viovipa via kuka, sanga ovinyu vi tuiya olonjeke, kuenje ovinyu vi peseka, lolonjeke vi nyõleha; te oku longela ovinyu viokaliye volonjeke viokaliye.

²³ Kesambata limue wa kala loku pita vovapia, kuenje olondonge, eci via enda, via fetika oku kalula apunga aco.

²⁴ Oco va Fariseo vo pula vati, Tala, nye va lingila eci ka ci tava oku linga kesambata?

²⁵ Oco Yesu wa va kumbulula hati, Ka wa tangeli eci ca lingile Daviti cina a suka okulia kuenje wa kala lonjala, eye lava va kala laye?

²⁶ Ka wa tangeli ndeci a iñila vonjo ya Suku, koloneke viocitunda cinene Aviatare, kuenje wa lia olombolo via tumbikiwa, evi ka vi tava okuti vi liwa te lovitunda lika, yu wa avelakovo ava va kala laye?

²⁷ Kuenje wa popia lavo hati, Esambata lia sovuilua omanu, omanu ka va sovuiluile esambata.

²⁸ Oco Mõlomunu eye Ñala ndaño yesambata.