MARKO 16 - Embimbiliya - Bíblia Sagrada em Umbundu

¹ Eci esambata lia pita oco Maria u Magadala kuenda Maria, ina ya Tiago, la Salome, va landa onguendu yi leha ciwa, ha va endi oku ko waveka.

² Kuenje omele ociteketeke, keteke liatete kosimanu, eci ekumbi lia tunda, veya keleva.

³ Yu va kala oku lipula pokati, vati, Helie o tu tiñuluilapo ewe liopuvelo weleva?

⁴ Oco, oku petula ovaso, va lete okuti lia tiñuluhapo ale, momo ewe liaco linene cimue.

⁵ Kuenje eci va iñila veleva, oco va mola ukuenje wa tumala kondio, wa wala uwalo u yela, kuenje va saluka.

⁶ Yu wa popia lavo hati, Ko ka saluki. Vu sanda Yesu u Nasara una wa valeliwile kekulusu. Wa pinduka, kulo keko. Tali oko vo kapele.

⁷ Puãi kuendi, ka sapuili olondonge viaye la Petulu hoti, U pitili kovaso oku enda ko Galilea, omo vu ko mola ndeci a popia lene.

⁸ Kuenje va tunda, va tila keleva, momo oku luluma locinjoko ca va kuata. Ka va popele cimue lomunu momo va kala lusumba.

⁹ Kaliye, eci a pinduka omele ociteketeke, keteke liatete kosimanu, wa tukuluka tete ku Maria u Magadala, una a tundisa ilũlu epanduvali.

¹⁰ Eye wa enda, wa ci sapuila ava va kala laye osimbu va kala loku sinumula loku lila.

¹¹ Oco, eci va yeva okuti o kasi lomuenyo kuenda wa muiwa laye, ka va ci kolelele.

¹² Kovaso yovina evi eye wa tukuluka lesetahalo liñi ku vamue vavali va tunda pokati kavo eci va kala loku enda kovaimbo.

¹³ Oco, oku tiukila va ci sapuila vakuavo, haimo ka va va kolelele.

¹⁴ Oco kovaso yaco wa tukuluka kekui liaco la mosi eci va tumala kokulia. Kuenje wa va patisa, momo ka va kaile lekolelo, lovitima viavo via siva. Momo ka va kolelele ava vo mola eci a pinduka.

¹⁵ Kuenje wa popia lavo hati, Kuendi kuosi kilu lieve. Kundi ondaka yiwa koviluvo viosi.

¹⁶ U o kolela kuenje o papatisiwa, o popeliwa, puãi u ka kolela, o pisiwa.

¹⁷ Ovilimbu vi linga ava va kolela, vievi: Va tundisa ilũlu londuko yange. Va popia lalimi okaliye.

¹⁸ Va tikula olonyoha, kuenje nda va nyua owule, ka u va lingi cimue. Va kapa ovaka avo komanu va vela kuenje va kaya.

¹⁹ Oco Ñala Yesu, eci a mala oku popia lavo, wa yeluiwa vilu, kuenje wa tumala kondio ya Suku.

²⁰ Oco va tunda, va kundila kuosi. Ñala wa talavaya lavo kuenje wa kolisa ondaka lovilimbu viaco. Amene.