MARKO 15 - Embimbiliya - Bíblia Sagrada em Umbundu

¹ Tuli kua ca omele haico ovitunda vinene lakulu la vakuvisonehua la vakuekanga linene va tumbika ongombo. Va kuta Yesu kuenje va enda laye oku u tuala ku Pilato.

² Yu Pilato wo pula hati, Ove hẽ, vu Soma ya va Yudea? Yesu wo kumbulula hati, Ove wa ci popia.

³ Kuenje ovitunda vinene vio pindika ovina via lua.

⁴ Pilato wo pula vali hati, Ku kumbulula cimue? Ku lete ndomo va ku pindika ovina via lua?

⁵ Puãi Yesu ka kumbuluile vali cimue. Kuenje Pilato wa komoha.

⁶ Kofesta Pilato wa tuwa oku va kutuluila omandekua u vo pinga.

⁷ Kua kala umue wa tukuiwa Baraba, wa kutiwa kumue la vakuosuanji, haivo, oku linga usuanji waco, va ipa omunu.

⁸ Kuenje owiñi weya, yu wa fetika oku pinga okuti o linga ndeci a va lingaila.

⁹ Pilato puãi wa va kumbulula hati, Vu yongola okuti ndi vu kutuluila Soma ya va Yudea?

¹⁰ Momo wa limbuka okuti ovitunda vinene vio pakuila onya.

¹¹ Puãi ovitunda vinene via tutuminya owiñi waco okuti hise oku va kutuluila Baraba.

¹² Pilato wa tambulula vali, hati, Ndinga nye lu wo tukuli, hoti, Soma ya va Yudea?

¹³ Va vilikiya vali, vati, U valela kekulusu.

¹⁴ Kuenje Pilato wa va pula, hati, Wa linga nye cĩvi? Puãi va vilikiya ca lua vati, U valela kekulusu.

¹⁵ Kuenje Pilato, omo a yongola oku sanjuisa owiñi, wa va kutuluila Baraba. Eci a tipuisa Yesu oco wa weca oku valeliwa kekulusu.

¹⁶ Kuenje asualali vo tuala vocitali haico ombonge, kuenje vongolola ocisoko cosi.

¹⁷ Vo walisa onanga yohusu, oku pata ekolowa liolosongo, vo li walisa,

¹⁸ kuenje va fetika oku u lama vati, A Hosi, a Soma ya va Yudea!

¹⁹ Vo veta kutue loluneva, kuenje vo siyila. Loku kekama vo fendela.

²⁰ Oco, eci vo fuanguila, vo lula onanga yohusu, yu vo walisa uwalo waye. Kuenje va enda laye oku u valela kekulusu.

²¹ Kuenje umue wa kala oku vinjukako, eye Simono u Kurene, o tunda vovapia, haeye isia ya Alexandro la Rufu. Vo kondolola oku enda lavo ha ambata ekulusu liaye.

²² Kuenje vo tuala kusenge Gongota, ca lomboloka usenge wekõlokõlo.

²³ Kuenje vo wiha ovinyu via tengiwa la mura, puãi eye ka vi tavele.

²⁴ Oco vo valela kekulusu, yu va lianjela uwalo waye, oku u limbaila ocela ndeci omunu opapo.

²⁵ Kola yatatu oco vo valela kekulusu.

²⁶ Ocisonehua ceko liaye ca sonehiwako citi, SOMA YA VA YUDEA.

²⁷ Va valelavo ovingumba vivali kakulusu, cimue kondio yaye, cikuavo kepĩli liaye.

²⁸ Oco, via lingiwa ovisonehua via linga viti, Kuenje eye wa tendiwa lolondingohole.

²⁹ Ava va vinjukako vo popia etonãi, oku lipuka ovitue viavo, va popia vati, Ove, okuaku nyõla onembele, kuenje o yi tunga vali koloneke vitatu.

³⁰ Lipopela ove muẽle, loka kekulusu.

³¹ Haicovo ovitunda vinene la vakuavisonehua, vosi yavo vo fuanguila loku u pembula, vati, Wa popela vakuavo, eye muẽle ka tẽla oku lipopela.

³² Kristu, Soma ya Isareli, kaliye tu tava. Kuenje ava va valeliwa kakulusu kumue laye lavovo vo savula.

³³ Kola yepandu oco kueya owelema kofeka yosi toke kola yecea.

³⁴ Kola yecea Yesu wa vilikiya londaka yinene hati, Eloi, Eloi, lama sabakatani, ca lomboloka citi, A Suku yange, a Suku yange, wa njandulukila nye?

³⁵ Vamue va kalako, eci va ci yeva, va popia vati, Yeveleli, o kovonga Eliya.

³⁶ Kuenje umue, oku yoloka, wa yukisa onjavi ovindangele, wa yi kapa koluneva, kuenje oku u nyuisa hati, Ci kale! Tu tali nda Eliya iya oku u tulula.

³⁷ Kuenje Yesu oku vilikiya londaka yu lua, wa tula omuenyo.

³⁸ Kuenje ongumbo yonembele ya toka tunde kilu toke posi.

³⁹ Oco kesongo lina lia kala kovaso aye, eci a mola ndeci a tula omuenyo, wa popia hati, Ocili omunu u Omõla a Suku.

⁴⁰ Kuenje kua kala akãi va talela kupãla. Pokati kavo pa kala Maria u Magadala, kuenda Maria, ina ya Tiago o sule la Yosefe, kuenda Salome.

⁴¹ Eci Yesu a kala vo Galilea vo kuama kuama kuenda vo vumba. Kua kalavo akãi va lua vakuavo vana va lamana kumue laye ko Yerusalãi.

⁴² Eci Ekumbi lia enda, omo eteke liaco eteke lieliangiliyo, ca lomboloka okuti hẽla esambata,

⁴³ oco kueya Yosefe u Arimateya, haeye ukulu wa kemãla, kuenje eye muẽle o lavoka usoma wa Suku. Eye, oku pua ohele, wa iñila ku Pilato yu wa pinga etimba lia Yesu.

⁴⁴ Kuenje Pilato wa komoha okuti wa fa ale. Oco oku pañinya kesongo, wo pula hati, Ocili wa fa ale?

⁴⁵ Kuenje eci a yeva ku kesongo okuti wa fa, oco wa tava oku eca etimba ku Yosefe.

⁴⁶ Eye wa landa onanga yovalatanya, kuenje, oku u tulula, wo wiña onanga yovalatanya kuenje wo langeka veleva limue lia sokotuiwa vewe, yu wa tiñuluila ewe puvelo weleva.

⁴⁷ Maria u Magadala, la Maria ina ya Yose, wa tala oko a kapiwa.