MARKO 13 - Embimbiliya - Bíblia Sagrada em Umbundu

¹ Eci Yesu a tunda vonembele, umue kolondonge viaye wa popia laye hati, Olongisi, tala, havaweko! halonjoko!

² Oco Yesu wa popia laye hati, Siti vu lete olonjo evi vinene vinene? Ka ku siala ewe kilu liewe ka li tunguluka.

³ Eci a tumala komunda yo Oliveira kovaso yonembele oco Petulu la Tiago la Yoano la Andereu vo pulila pulika vati,

⁴ Tu sapuileko. Ovina evi hẽ, vi lingiwa eteke li pi? Kuenda ondumbukiso yaco ye, eci ovina evi vi laika oku lingiwa?

⁵ Yesu wa fetika oku popia lavo hati, Lunguki sanga umue u lueyisi.

⁶ Va lua veya londuko yange oku linga vati, Ame, kuenje va lueyisa va lua.

⁷ Nda vu yeva ovita pamue olombonde viovita, ko ka kuati ohele, ovina evi viya, puãi hesuliloko handi.

⁸ Momo ofeka yi katukila ofeka, lusoma u katukila usoma. Ku kala okululuma kuongongo kuiñi kuiñi. Ku kalavo onjala. Ovina evi efetikilo ño liolongembia.

⁹ Puãi ene muẽle lunguki, momo vo pakuila kakanga, kuenje vu tipuilua volosunangonga, vu nalamela kovaso olonguluvulu lo kovaso olosoma oku njimbila uvangi kovaso avo.

¹⁰ Puãi ka ci lingiwa te ondaka yiwa yi kundiwila olofeka viosi.

¹¹ Leci vo tuali kakanga ko ka kali lohele yeci vu popia, puãi eci cu wihiwi oku popia kola yaco oco vu popia, momo heneko vu popia, te Espiritu Sandu.

¹² Omunu o pakuila manjaye kokufa; isia omõlaye, kuenje omãla va katukila olonjali oku va pisila okufa.

¹³ Vu suvukilua onduko yange lomanu vosi, puãi u o pandikisa toke kesulilo eye o popeliwa.

¹⁴ Puãi nda vu mola ocinyuañi cevĩho ci tãi oku ka ca sesamelele,— u o tanga a ci limbuke,— oco ava va kasi vo Yudea va tilile kolomunda,

¹⁵ lu o kasi kilu lionjo ka ka loke, ndaño oku iñila hopi cimue vonjo yaye.

¹⁶ U o kasi vepia ka ka tiukile kimbo oku kopa ocikutu caye.

¹⁷ Puãi ava va kasilili muiñi lava va nyamisa koloneke viaco, ci linga ohenda, ohali yavo yi lua.

¹⁸ Likutilili okuti ka ci kala koloneke viombambi.

¹⁹ Momo koloneke viaco kuiya ohali ya lua, ya lisoka layo ka la yeya, tunde kefetikilo lioku lulika ovina Suku a lulika, toke cilo, kuenje ka yiya vali.

²⁰ Kuenje Ñala nda ka tepuluile koloneke viaco, nda lomue ukuetimba wa popeliwa. Puãi oloneke viaco, via tepuluilua ava va noliwa, haivo eye a nola.

²¹ Oco nda umue o popia lene hati, Vanji, Kristu o kasi kulo, pamue hati, Vanji oko, ko ka ci koleli.

²² Momo ku katuka va Kristu vesanda lovaprofeto vesanda, kuenje va lekisa ovilimbu vinene lovikomo ha va kembisa, nda ci tava, ndaño ava va noliwa.

²³ Lunguki, ndo sapuili handi ovina viosi viya.

²⁴ Puãi voloneke viaco, kovaso yohali yaco, ekumbi li vumbula, losai ka yeci owi wayo,

²⁵ kuenje olombungululu vi loluka kilu, ovonene o kilu a sengiwa.

²⁶ Oco va mola Mõlomanu oku iyilila kalende lunene wa lua lulamba.

²⁷ Kuenje o tuma ovangelo ha vongolola ava vaye va noliwa tunde kolofela vikuãla, tunde kesulilo liokilu lieve, kuenda tunde kesulilo lilu.

²⁸ Lilongisili kukuyu olusapo luawo. Eci ocanja cawo ci tomba ha ci yovi amela, vu ci okuti onjovo yi li ocipepi.

²⁹ Haicovo ene, eci vu mola ovina evi vi lingiwa, kũlĩhi okuti ci kasi ocipepi, pivelo muẽle.

³⁰ Mopia lene siti, Ocili ocitumbulukila cilo ka ci pui te ovina evi viosi vi lingiwa.

³¹ Ilu losi vi takata, puãi olondaka viange ka vi takata.

³² Puãi eteke liaco lola yaco, lomue wa yi kũlĩha, ndaño ovangelo vokilu, ndaño Mõla, te Isia lika.

³³ Lunguki, lavululi kuenda likutilili, momo ka wa kũlĩhili eteke liaco.

³⁴ Ci soka ndomunu enda ungende, eci a tunda vonjo yaye, eca ovikele kakuenje vaye, u upange waye, u upange waye, kuenje o handeleka ukuambundi oku lavulula.

³⁵ Oco lavululi, momo ko ci eci Muẽleanjo eya, nda kõnõlosi, nda vokati kuteke, nda kokulila kuakondombolo, pamue omele.

³⁶ Lavululi sanga iya ño ocipikipiki kuenje u sangi wa pekeli.

³⁷ Oco eci mopia lene haico mopia la vosi, siti, Lavululi.