MARKO 12 - Embimbiliya - Bíblia Sagrada em Umbundu

¹ Kuenje wa fetika oku popia lavo lolosapo hati, Omunu umue wa tuika ocumbo cayuva, wombako ongumbu, wa felamo ocitunyu ha ci lingi ocikulungu covinyu, yu wa tungamo onjo yelavelo, kuenje wa ci pindikisa kolongunja, yu wa enda kofeka yikuavo.

² Oco kuvo waco wa tuma ukuenje kolongunja viaco, oco a kopeko apako ocumbo cayuva.

³ Yu vo kuata, kuenje vo tipula, vo tiuwiya ño ovoko.

⁴ Kuenje wa tuma vali ukuenje ukuavo, yu vo tota ombole vutue, kuenje vo fũkĩlisa.

⁵ Kuenje wa tuma ukuavo, vo wipa; haico va lua vakuavo; vamue va va tipula, vamue va va ipa.

⁶ Po sialela ño umuamue lika, haeye omõlaye wa soliwa. Kesulilo wo tuma, hati, Va sumbila omõlange.

⁷ Puãi olongunja viaco via livangula viti, U, eye kapiñala kaco, tu wipayi, oco ocipiñalo caco ci linge cetu.

⁸ Oco vo kuata, vo wipa, keunje oku u wupa vocumbo, va wimba kusenge.

⁹ Muẽleacumbo cayuva o linga nye? Iya ha nyõli olongunja viaco kuenje eca ocumbo cayuva ku vaiñi.

¹⁰ Ka wa tangeli hẽ ocisonehua eci citi, Ewe lia inasi atungi, olio lia lingiwa utue wevindi.

¹¹ Eci ca tunda ku Ñala oco ocikomo vovaso etu.

¹² Omo va limbuka okuti ovo a tela olusapo luaco oco va sokele oku u kuata, puãi va kala lusumba wowiñi, kuenje vo sia, va enda.

¹³ Oco va tuma kokuaye vamue va Fariseo la vamue vakua Herode ha vo nuli londaka.

¹⁴ Eci veya va popia laye vati, Olongisi, tu ci okuti vukuacili, lomue o ku vindula ohele, momo ku vanji ovipala viomanu, puãi ocili o longisa onjila ya Suku. Ci tava oku lambuila Kaisare ele, ale ka ci tava?

¹⁵ Tu eca ele, ale ka tu eci? Puãi omo eye wa kũlĩha ombambe yavo oco wa va pula hati, Vu njonjela nye? Neneli olombongo viaco ndi vi tale.

¹⁶ Kuenje va vi nena. Yu wa va pula hati, Ociluvialuvia eci celie? Locisonehua caco celie? Kuenje vo kumbulula vati, Ca Kaisare.

¹⁷ Yu Yesu wa popia lavo hati, Evi via Kaisare vi eci ku Kaisare levi via Suku vi eci ku Suku. Kuenje vo komoha ca lua.

¹⁸ Oco va Sadukeo veya kokuaye, haivo va lingainga vati, Ka kuli epinduko, yu vo pula vati,

¹⁹ Olongisi, Mose wa tu sonehela hati, Omunu nda o fa, kuenje o sia ukãi, yu ka kasi lomõla, oco manjaye o piñala ukãi waco oku tumbuluila huvaye ombuto.

²⁰ Ulume umue wa kala la vamanjaye epandu; yu ukulu waco wa kuela ukãi, kuenje oku fa ka sile ombuto;

²¹ u wo kuama pekosi wa piñala ukãi, kuenje oku fa ka sile ombuto, watatu haico;

²² kuenje epanduvali liavo ka va sile ombuto, kesulilo liavo vosi ukãi wa favo.

²³ Kepinduko hẽ, o linga ukãi welie, omo epanduvali liaco vo kuelele?

²⁴ Yesu wa popia lavo hati, Mbi eci wa lueyi laco ceci, Ka wa kũlĩhili ovisonehua, ndaño unene wa Suku.

²⁵ Momo eci va pinduka ku vakualufa, ka va kuela, ka va kueliwa, puãi va linga ndovangelo vokilu.

²⁶ Puãi kondaka yepinduko liava va fa, ka wa tangeli velivulu lia Mose, kondaka yocisapa, ndeci Suku a popia laye hati, Ame ndi Suku ya Avirahama, haime ndi Suku ya Isake, haime ndi Suku ya Yakoba?

²⁷ Heyeko Suku yava va fa, te yava va kasi lomuenyo. Wa lueyi ca lua.

²⁸ Umue ukuavisonehua weya kuenje wa va yeva eci va likumbulula, oco, eci a limbuka okuti Yesu wa va kumbulula ciwa, oco wo pula hati, Ocihandeleko ce ca velapo okuti viosi vikuavo vi sule?

²⁹ Yesu wa kumbulula hati, Ca velapo ceci, A Isareli, yevelela. Yehova eye Suku yetu kuenje yevelela. Yehova eye Suku yetu kuenje Eye Suku lika waye.

³⁰ Sola Yehova Suku yove lutima wove wosi, lomuenyo wove wosi, lolondunge viove viosi, longusu yove yosi.

³¹ Cavali ceci, sola u o lisungue love ndeci o lisole ove muẽle. Ka kuli ocihandeleko cikuavo ca velapo okuti evi vi sule.

³² Kuenje ukuavisonehua wa popia laye hati, Olongisi, wa popia ocili okuti Suku o kasi lika waye kuenje ka kuli ukuavo, te eye;

³³ kuenda oku u sola lutima wosi, lolondunge viosi, loloholo viosi, loku sola u o lisungue love ndeci o lisole ove muẽle, oco ca velapo, ovilumba vioku pia elisi levi vioku yoka, viosi vi sule.

³⁴ Oco, eci Yesu a limbuka okuti wa kumbulula lolondunge, wa popia laye hati, Ku kasi ocipãla lusoma wa Suku. Oco lomue wa lukuta vali oku u pula cimue.

³⁵ Eci Yesu a kala loku longisa vonembele wa pula hati, Vakuavisonehua va popia ndati, vati, Kristu omõla a Daviti?

³⁶ Eye muẽle Daviti, wa popia la Espiritu Sandu hati, Ñala wa popia la Ñala yange hati, Tumala kondio yange, toke ndinga ovanyali vove ocilatelo colomãi viove.

³⁷ Eye muẽle Daviti wo tukula hati, Ñala, oco o linga ndati omõlaye? Yu owiñi wosi wo yeva lonjolela.

³⁸ Kuenje eci a longisa wa linga hati, Lunguki la vakuavisonehua va yongola oku ñuala ñuala luwalo wa lepa, loku lamiwa vovitanda,

³⁹ loku tumala kolomangu via velapo volosunangonga lo kolofesta.

⁴⁰ Va lia lia olonjo viovimbumba, loku ci pipiya va likutilila ovilañela. Va pisiwa lepiso lia piãla.

⁴¹ Kuenje wa tumala kovaso yolombango, yu wa mola ndeci omanu vowiñi va imba olombongo volombango. Olohuasi via lua via imbamo ca lua.

⁴² Oco kueya ocimbumba osuke, yu wa imbamo otuvingangu tuvali tua soka lolusendu.

⁴³ Oco, oku pañinya olondonge viaye, eye wa popia lavo hati, Mopia lene siti, Ocili ocimbumba eci, haico osuke, ca imbamo ca lua, cosi ca imbamo vakuavo, ci sule.

⁴⁴ Momo ovo vosi va imbamo ño isupe viavo, puãi eye kusuke waye wa imbamo cosi a kala laco, haico eteku liaye.