MARKO 11 - Embimbiliya - Bíblia Sagrada em Umbundu

¹ Eci va pitila ocipepi lo ko Yerusalãi ko Betefage lo ko Betania komunda yo Oliveira, oco a tuma olondonge vivali.

² Wa va sapuila hati, Kuendi kimbo li kasi kovaso yene. Tuli wiñilimo vu sanga okacimbulu ka pandekiwa, lomue wa la endelako handi. Ka kutululi, enjui lako.

³ Nda umue wo puli hati, Vu ci lingila nye? oco kumbululi, hoti, Ñala o ka yongola kuenje ndopo o ka tiula vali.

⁴ Kuenje va enda yu va sanga okacimbulu ka pandekiwa puvelo, posamua, voluwa, kuenje va ka pandulula.

⁵ Kuenje vamue va kalako va va pula vati, Nye vu panduluila okacimbulu?

⁶ Ovo va kumbulula ndeci Yesu a va sapuila kuenje va tava okuti va enda.

⁷ Oco va tuala okacimbulu ku Yesu, va yalako olonanga viavo, kuenje Yesu wa endelako.

⁸ Va lua va yala olonanga viavo vonjila, vakuavo va yalamo ovisapa va teta vusenge.

⁹ Kuenje ava va pita kovaso lava vokinyima va vilikiya vati, Hosana. U iyilila onduko ya Ñala a sivayiwe!

¹⁰ Usoma wa isietu Daviti wiya ndeti u sivayiwe! Kilu va vilikiye vati, Hosana.

¹¹ Oco wa pitila ko Yerusalãi kuenje wa iñila vonembele. Eci a vanja ovina via kalamo oco wa tundamo omo ekumbi lia enda. Wa enda ko Betánia kumue lekui liaco la vavali.

¹² Hẽla yaco eci va tunda ko Betánia, eye wa kala lonjala.

¹³ Oco eci a muila kupãla ukuyu wa pulika amela, oco weya oku kũlihisa nda hẽ o sangako epako limue. Eci eyako ka sangeleko cimue, te amela lika, momo hawoko uvo wakuyu.

¹⁴ Kuenje wa popia lawo hati, Lomue ka ka lie vali epako liove. Kuenje olondonge viaye via ci yeva.

¹⁵ Kuenje veya ko Yerusalãi. Eye wa iñila vonembele, kuenje wa fetika oku tundisa vonembele vakuakulandisa la vakuakutolokala olombongo kuenda olomangu via vakuakulandisa olopomba.

¹⁶ Kuenje ka tavele okuti umue ambata ocikuata o pita vonembele.

¹⁷ Yu oku longisa wa popia lavo hati, Ka ca sonehiwile citi, Onjo yange yi tukuiwa onjo yolofeka viosi yoku likutilila? Puãi ene wa yi lingisi ocilala covingumba.

¹⁸ Kuenje ovitunda vinene la vakuavisonehua va ci yeva, oco va sanda ndomo va tẽla oku u nyõla. Momo vo kuatela ohele omo owiñi wosi wa komoha okulongisa kuaye.

¹⁹ Kuenje oñolosi va tunda vo Yerusalãi.

²⁰ Omele eci va pitako va mola ukuyu wa kukuta toke kolombombo.

²¹ Kuenje Petulu oku ci ivaluka, wa popia laye hati, A Rambei, tala, uti wa siñala wa kukuta.

²² Yesu oku kumbulula wa popia lavo hati, Koleli Suku.

²³ Mopia lene siti, Ocili u o popia lomunda eyi hati, Veyuka, limba vokalunga, kuenje ka suma suma vutima waye, puãi o kolela okuti eci a popia ci lingiwa, oco cu lingiwila.

²⁴ Oco mopia lene siti, Ovina viosi vu likutilila loku vi pinga, koleli okuti vu vi mola kuenje vu vi mola muẽle.

²⁵ Kuenje eci vu tãi oku likutilila, nda vu kuetele umue cimue, u weceli, oco Isiene o kasi kilu a wecelivo ahuku ene.

²⁶ Puãi nda ka vu ecela omanu oco Isiene o kasi kilu ka wecela akandu ene.

²⁷ Veya vali ko Yerusalãi. Eci a kala loku ñuala ñuala vonembele oco ovitunda vinene, la vakuavisonehua, lakulu, veya kokuaye.

²⁸ Vo pula vati, Ovina evi o vi lingainga lomoko ye? Wa ku iha omoko yoku lingainga ovina evi elie?

²⁹ Yesu wa va kumbulula hati, Ndu pulivo ondaka yimuamue, nda vu yi ñumbulula, oco ndu sapuilivo omoko ndingainga layo ovina evi.

³⁰ Epapatiso lia Yoano, he, liokilu ale, ele liomanu? Ñumbululi.

³¹ Va ci lipulapula pokati vati, Nda tu popia tuti, Liokilu, o linga hati, Nda oco, nye ka wo taveleli?

³² Puãi tu popia hẽ tuti, Liomanu? Va kala lusumba womanu, momo vosi va soka vati, Yoano uprofeto muẽle.

³³ Oco va kumbulula Yesu vati, Ka tu ci. Yu Yesu wa popia lavo hati, Lamevo si vu sapuila omoko ndinga layo ovina evi.