MARKO 10 - Embimbiliya - Bíblia Sagrada em Umbundu

¹ Kuenje Yesu wa tundako, weya kofeka ya Yudea kuenda kesinya lia Yordão. Kuenje owiñi wo liongoluila vali yu wa va longisa ndeci a tuwa.

² Kueya va Fariseo, kuenje oku u nyika vo pula vati, Ci tava okuti ulume o nyala ukãi waye?

³ Eye wa va kumbulula, hati, Mose wo handeleki ndati?

⁴ Ovo va linga vati, Mose wa tava oku eca ukanda woku nyala loku u tundisa.

⁵ Puãi Yesu wa popia lavo hati, Omo ovitima viene via tĩla, oco Mose o soneheleli ocihandeleko eci.

⁶ Puãi tunde kefetikilo lioku lulika, Suku wa lulika ulume lukãi.

⁷ Oco ulume o sia isiaye la inaye ha likakatela lukãi waye,

⁸ kuenje kavali kavo va linga etimba limuamue. Oco ka va lingi vali vavali, te etimba limuamue.

⁹ Eci Suku a tokekisa, omunu ka ka ci tepise.

¹⁰ Kuenje eci va kala vonjo oco olondonge vio ci pula vali.

¹¹ Yu wa popia lavo hati, U o nyala ukãi waye kuenje o kuela ukuavo o lueyela ukãi waye lukahonga waco,

¹² kuenje ukãi nda o nyala veyaye okuti o kueliwa lukuavo, layevo o pia ekandu liukahonga.

¹³ Oco vamue vo nenela otumãla ha tu lambi kuenje olondonge via va lemela.

¹⁴ Puãi eci Yesu a ci mola oco wa tema, kuenje wa popia lavo hati, Omãla veye ño kokuange, ko ka va tutuiyi, momo usoma wa Suku wava va linga ndava.

¹⁵ Mopia lene siti, Ocili, u ka tambula usoma wa Suku ndokamõla ka iñilamo.

¹⁶ Oco wa va angata, kuenje oku va kapa ovaka aye, wa va sumũlũisa.

¹⁷ Eci a wila vali vonjila oco umue o lupukila, kuenje oku u kekamela wo pula hati, Olongisi, vukuesunga, ndinga nye okuti ñuata omuenyo ko pui?

¹⁸ Kuenje Yesu wo kumbulula hati, Nye wa nukuila ukuesunga? Lomue ukuesunga, te umuamue lika, Suku.

¹⁹ Wa kũlĩha ovihandeleko, Ku ka ipe; Ku ka pekelise; Ku ka ive; Ku ka linge ombangi yuhembi; Ku ka liañe; Sumba so la nyoho.

²⁰ Ukuenje wa popia laye hati, Olongisi, ovina evi viosi nda vi linga tunde kutila wange.

²¹ Kuenje Yesu oku u vanja wo sola, yu wa popia laye hati, Wa kamba cimue cimuamue, kuende, ka landise cosi o kuete, ci avela olosuke, kuenje o kala lipako kilu; oco wiye o ñuame.

²² Puãi, oku yeva ondaka yaco, ocipala caye ca nyumala, kuenje wa tundako loku sumua momo wa kala lovipako via lua.

²³ Kuenje Yesu oku pukukako wa popia lolondonge viaye hati, Ca tila ca lua ohuasi oku iñila vusoma wa Suku.

²⁴ Oco olondonge via komoha olondaka viaye, puãi Yesu wa popia vali lavio hati, Amãla, ka wa kũlĩhili ndomo ca tĩla oku iñila vusoma wa Suku.

²⁵ Ongamelo oku pita venyulu lionguya hise, ohuasi oku iñila vusoma wa Suku, upange!

²⁶ Kuenje via komoha ca lua, vio pula viti, Nda oco, elie o tẽla oku popeliwa?

²⁷ Yesu wa va vanja kuenje wa va kumbulula, hati, Komanu ka ci tẽliwa puãi ku Suku ci tẽliwa, momo ovina viosi vi tẽliwa la Suku.

²⁸ Petulu wa fetika oku popia laye, hati, Tala, tua sia ovina viosi kuenje tua ku kuama.

²⁹ Yesu wa kumbulula hati, Mopia lene siti, Ocili ka kuli u o sia onjo, pamue vamanjaye, pamue vamukãi vaye, pamue inaye, pamue isiaye, pamue omãla, pamue ovapia, okuti o vi sia mekonda liange kuenda mekonda liondaka yiwa,

³⁰ yu ka moli cilo eci ca soka locita colonjanja, ci kale olonjo pamue vamanjaye, ci kale vamukãi vaye, la vainaye, lomãla, pamue ovapia. Komuenyo ulo o vi mola kumue lakangiso, kuenje komuenyo wiyako o mola omuenyo ko pui.

³¹ Puãi va lua va kasi kovaso va kala konyima, kuenje vokonyima va kala kovaso.

³² Va kala vonjila yoku lamana ko Yerusalãi. Yesu wa va pitila kovaso, yu va saluka, kuenje ava vo kuama va kala lusumba. Oco wa enda vali kulika lekui liaco la vavali, kuenje wa fetika oku va sapuila ovina viu lingiwa,

³³ hati, Tali, tu lamana ko Yerusalãi kuenje Mõlomanu o pakuiwa kovitunda vinene lo ku vakuavisonehua. Ovo vo pisa okuti o fa kuenje vo weca ku vakualofeka.

³⁴ Vakualofeka vaco vo fuanguila, vo siyila ovate, vo tipula kuenda vo wipaya. Kovaso yoloneke vitatu o pinduka.

³⁵ Oco Tiago la Yoano, omãla va Sebedeo, veya kokuaye kuenje va popia laye vati, Olongisi, tu yongola okuti o tu lingila cosi tu ku pinga.

³⁶ Oco eye wa va pula hati, Nye vu yongola okuti ndu ci lingila?

³⁷ Vo kumbulula vati, Tava okuti tu tumala kumue love vulamba wove, ukuavo kondio, ukuavo kepĩli.

³⁸ Puãi Yesu wa popia lavo hati, Ka wa kũlĩhili eci vu pinga. Vu tẽla oku nyua okopo ame ndi nyua, pamue oku papatisiwa lepapatiso mapatisiwa lalio?

³⁹ Vo kumbulula vati, Tu ci tẽla. Oco Yesu wa popia lavo hati, Okopo ndi nyua vu yi nyuavo, epapatiso mapatisiwa lalio hailio vu papatisiwa lalio,

⁴⁰ puãi oku tumala kondio yange pamue kepĩli liange hacangeko oku ci eca. Olomangu viaco vi tiama kuava via vangiliyiwila.

⁴¹ Ekui liaco eci va ci yeva, oco va fetika oku funguila Tiago la Yoano.

⁴² Kuenje Yesu wa va pañinya, yu wa popia lavo hati, Wa ci kũlĩhi okuti ava va sokailua okuti va viala vakualofeka ovo va va kangisa, lava vavo vanene va va vumbisa.

⁴³ Puãi ka ci kala ndomo pokati kene; puãi u o yongola oku linga unene pokati kene a linge ombumba yene.

⁴⁴ U o yongola oku linga fu pokati kene a linge ukuenje wa vosi.

⁴⁵ Momo Mõlomanu layevo keyilile oku vumbiwa, te oku vumba kuenda oku eca omuenyo waye ndocimuenyo coku yovola va lua.

⁴⁶ Kuenje veya ko Yeriko. Eci a tunda ko Yeriko kumue lolondonge viaye a lowiñi wa lua, oco omõla a Timeo, Bartimeo, ongeyi, haeye omeke, wa tumala konele yonjila.

⁴⁷ Eci a yeva okuti Yesu u Nasara o kasi loku pita oco a fetika oku vilikiya, kuenje hati, A Yesu, a Mõla a Daviti, ndinge ohenda.

⁴⁸ Kuenje va lua vo lemela vati, Uha, puãi eye wa vilikiya vali ca lua hati, A Mõla a Daviti, ndinge ohenda.

⁴⁹ Yu Yesu wa talama, kuenje, hati, U kovongi. Oco va kovonga omeke, va popia laye vati, Kolisako, votoka, o kasi loku ku kovonga.

⁵⁰ Kuenje eye, oku takumula onanga yaye yoku livatula, wa votoka lonjanga, yu weya ku Yesu.

⁵¹ Yesu oku popia laye hati, Nye o yongola okuti hu ci lingila? Omeke yo kumbulula yiti, A Rambei, njongola okuti o ndetuluisa.

⁵² Kuenje Yesu wa popia laye hati, Kuende, ekolelo liove lia ku veluisa. Haico a letuluka kuenje wo kuama vonjila.