MARKO 1 - Embimbiliya - Bíblia Sagrada em Umbundu

¹ Efetikilo liondaka yiwa ya Yesu Kristu, Mõla a Suku:

² Ndeci ca sonehiwa velivulu liuprofeto Isaya, citi, Tala, numa omunga yange kovaso ove. O sokiya elila liove.

³ Ondaka yukuakuvilikiya vekalasoko yiti, Pemi elila lia Ñala. Suñamisi olonjila viaye.

⁴ Oco vekalasoko mua tukuluka Yoano ukuakupapatisa, kuenje wa kunda epapatiso lioku likekembela akandu loku ecelua.

⁵ Kuenje ofeka yosi ya Yudea ya tundila kokuaye, la va Yerusalãi vosi, kuenje oku likekembela akandu avo, va papatisiwa laye volui Yordão.

⁶ Yoano wa wala uwalo wovonya ongamelo kuenda uvia wombandua vombunda yaye. Okulia kuaye olohuma lowiki wombula.

⁷ Yu wa kunda hati, Vonyima yange mu ñuai u wa velapo, ame ndi sule, kuenje si sesamela oku petama si itula olunjita luolohaku viaye.

⁸ Ame ndo papatisi lovava, puãi eye u papatisi le Espiritu Sandu.

⁹ Oco oloneke viaco Yesu wa tunda ko Nasara ko vo Galilea, kuenje weya, yu wa papatisiwa la Yoano vo Yordão.

¹⁰ Kuenje eci a tunda vovava, haico a mola ilu lia toka, kuenje Espiritu lio lokila ndopomba.

¹¹ Kuenje ondaka ya tunda kilu yiti, Ove vumõlange wa soliwa. Nda ku sanjukila.

¹² Kuenje haico Espiritu wo tuala vekalasoko.

¹³ Yu wa kala vekalasoko akui akuãla koloneke oku yonjiwa la Satana. Wa kala kumue lovinyama viovusenge, kuenje ovangelo vo vumba.

¹⁴ Eci Yoano a kuatiwa, oco Yesu weya ko Galilea, yu wa kunda ondaka yiwa ya Suku,

¹⁵ hati, Kaliye otembo ya tẽlisua, usoma wa Suku u kasi ocipepi. Likekembeli akandu ene. Tavi kondaka yiwa.

¹⁶ Eci a vambala kokalunga ka Galilea, oco wa mola Simono la Andereu manja a Simono, va imba owanda vokalunga omo ayanga volosi.

¹⁷ Kuenje Yesu wa popia lavo hati, Ndo ñuami, oco ndu lingisi anyanga vomanu.

¹⁸ Haico va sia awanda kuenje vo kuama.

¹⁹ Oco, oku amako naito, wa mola Tiago, omõla a Sebedeo, la manjaye Yoano, va kala vowato oku pamela awanda.

²⁰ Kuenje haico a va kovonga, yu va sia isiavo Sebedeo vowato kumue lakuenje, keunje vo kuama.

²¹ Oco va iñila vo Kafarinau. Kesambata liosimanu yaco wa iñila vosunangonga kuenje wa longisa.

²² Va komoha okulongisa kuaye, momo wa va longisa ndu o kasi lomoko, handavakuavisonehuako.

²³ Vosunangonga mua katuka ocipikipiki omunu o kuetiwe locilũlu ca vĩha,

²⁴ kuenje wa vilikiya, hati, Tu likuetele nye love, a Yesu u Nasara? Weyilila oku tu nyola? Ndu kui, ove o kola ku Suku.

²⁵ Yesu wa ci tulumula hati, Uha, weca.

²⁶ Kuenje ocilũlu ca vĩha, oku u tanyisa loku liyula londaka ya lua, co weca.

²⁷ Oco va kala lusumba okuti va lipula pula, vati, Eci nye, okulonga kuokaliye ale? O handeleka ndaño ilulu via vĩha lomoko, kuenje viu pokola.

²⁸ Kuenje haico oluhimo luaye lua yevala kuosi, kofeka yosi yi lisungue la Galilea.

²⁹ Eci va tunda vosunangonga, haico va enda vonjo ya Simono la Andereu kumue la Tiago la Yoano.

³⁰ Kuenje ina yukãi wa Simono wa pekela pula lombambi, haico vo ci sapuila.

³¹ Kuenje Yesu weya, yu wo kuata peka, wo yelula, kuenje ombambi yo weca, yu wa va poka.

³² Koñolosi, eci ekumbi lia iñila, vo nenela vosi va vela lava va kuetiwe lovilũlu.

³³ Kuenje imbo liosi lia liongoluila puvelo.

³⁴ Yu wa sakula va lua va vela ovoveyi aiñi aiñi, kuenje wa tundisa ovilũlu via lua, oco ka tavele okuti ovilũlu vi popia omo vio kũliha.

³⁵ Omẽle ociteketeke osimbu ka kua cile, oco a pasuka, wa tunda, wa enda vekalasoko, kuenje omo a likutililila.

³⁶ Simono lava va kala kumue laye, vo landula,

³⁷ yu vo sanga, kuenje va popia laye, vati, Vosi va ku sanda.

³⁸ Eye wa popia lavo, hati, Tu endi kumue kuiñi kovaimbo a lisungue si ka kundilakovo, momo oco ndeyilila.

³⁹ Oco wa enda loku kundila volosunangonga viavo kuoha vo Galilea, yu wa tundisa ovilũlu.

⁴⁰ Kuenje umue ukuavilundu weya kokuaye, wo livondela loku kekama kolongolo, oco a popia laye hati, Nda o ci panga o tẽla oku ñayisa.

⁴¹ Kuenje Yesu wo kuatela ohenda, oku alũla eka liaye, wo lamba, wa popia laye hati, Nda ci panga, kaya.

⁴² Haico ovilundu vio tunda kuenje wa kaya.

⁴³ Haico Yesu a weca, oku u kundika wa popia laye, hati,

⁴⁴ Vanja, ku ka popie lomue cimue, puãi kuende, ka lilekise kocitunda, kuenje lumbila uvangi wokukaya kuove ovina Mose a handeleka.

⁴⁵ Puãi eye wa tunda kuenje wa fetika oku ci sapula ca lua, kuenje ondaka yaco ya sandoka ca lua, oco Yesu ka tẽlele oku iñila vimbo te uyombeki, puãi wa kala vekalasoko, kuenje omanu va tunda kolonele viosi veya kokuaye.