MALAKIYA 4 - Embimbiliya - Bíblia Sagrada em Umbundu

¹ Momo, tala, kuiya eteke li taima ndofolono, kuenje vosi vakuakulipanda lava va linga lãvi va linga ndasila otiliku. Eteke liaco li kasi oku iya li va yoka, kuenje kokuavo ka ku siala ndaño olumbombo, ndaño ocanja. Oco ca popia Yehova Ukualohoka.

² Ene puãi wu sumbi onduko yange, Ekumbi liesunga liu tundili, lovolosongo vialio mu kala unene woku sakula. Lene wendi loku tomboaka ndolonãle via kunduluiwa vocunda.

³ Kuenje wu kosa olondingãivi, omo eteke ñatuka vi linga ndetiko polomãi viene. Oco ca popia Yehova Ukualohoka.

⁴ Ivaluki ocihandeleko cukuenje wange, Mose, cina ndo handelekele ko Horene, kumosi lovisila viaco lalungulo aco, okuti omãla vosi va Isareli va vi tata.

⁵ Tala! osimbu eteke liaco linene lia Yehova, hailio li linga usumba, ka lieyile, ndu tumisi uprofeto Eliya.

⁶ Kuenje eye inãlisa ovitima violonjali komãla, lovitima viomãla kolonjali viavo, sanga njiya mbeta ofeka lesiñalo.