MALAKIYA 3 - Embimbiliya - Bíblia Sagrada em Umbundu

¹ Tala! Ndi tuma omunga yange okuti o mongiyila onjila, kuenje Yehova, u wu sanda sanda, iya ocipikipiki konembele yaye. Ocili, una wa sanjukili, haeye omunga yocisila, iya muẽle. Oco ca popia Yehova Ukualohoka.

² Puãi helie o tẽla oku kala eteke Hokuiya kuaye? Helie o tẽla oku talama eci eye a tukuluka? Momo wa lisoka londalu yukuakuyelisa kuenda lonjapãu yonjelisi yovalatanya.

³ O tumãla ndu o setaika opalata ha yi yelisa, kuenje o yelisa omãla va Lewi. O va yelisa muẽle londalu ndeci va yelaisa ulu lopalata, oco va lumbe ocilumba ku Yehova lesunguluko.

⁴ Oco ovilumba via Yuda la Yerusalãi vi sanjuisa Yehova ndevi violoneke via pita kuenda ndevi vialima onahũlu.

⁵ Kuenje ndu wamẽli siu tetuluili lesunga. Ndinga ombangi yombili yoku pisa vakuakutãhã, lavakahonga, lava va lisila lesanda, kuenda ava va punda ofeto yolondingupange viavo, lava va punda kocimbumba losiwe, lava va linga cĩvi ukombe, kuenda ava ka va ñuetele usumba. Oco ca popia Yehova Ukualohoka.

⁶ Omo ame ndi Yehova si pongoloka, oco ene, amãlã va Yakoba, ka wa nyõlẽhẽlẽli.

⁷ Tunde koloneke violosekulu viene wa pambuki kovisila viange, kuenje ka wa vi tateli. Tiuki kokuange, kuenje ame niukila kokuene. Oco ca popia Yehova Ukualohoka. Puãi wu pula hoti, Tu tiuka ndati?

⁸ Omunu hẽ iva Suku? Haimo ene wu njiva, kuenje wu popia hoti, Tua ku iva ndati? Konepa yekũi kuenda kovilumba.

⁹ Wa siñalĩwi lesiñalo momo vu kasi loku njiva, ofeka yilo yosi muẽle.

¹⁰ Neni vosila yange ovilumba viosi vionepa yekũi okuti vonjo yange mu kala okulia. Seteki ondaka yange nda siu yikuluili olonjanela viokilu loku u sukumuĩli esumũlũho lia piãla enene, liokuti apa li selekiwa ka pa molẽha! Oco ca popia Yehova Ukualohoka.

¹¹ Kuenje ndu lemẽlẽli oluhuma lu lialia, okuti ka lu nyõli vali apako ovapia ene. Uyuva wene ko loluka vali apako awo osimbu otembo yoku pia ka yi pepi handi. Oco ca popia Yehova Ukualohoka.

¹² Kuenje vakualofeka viosi vo tukuli vati, Va sumũlũha, momo wu lingi ofeka yelau. Oco ca popia Yehova Ukualohoka.

¹³ Yehova wa popia hati, Olondaka viene wa popi lame viomanya. Puãi wu pula hoti, Tua ku popia ndati atonãi?

¹⁴ Wa popi hoti, Oku fendela Yehova Suku esanda. Ci silivila nye oku pokola kocihandeleko caye pamue oku endaenda kovaso a Yehova Ukualohoka loku likekemba?

¹⁵ Tunde cilo tu tukula ukuakulipanda tuti, Wa sumũlũha. Olondiugãivi ovio vi sumũlũha. Hacoko lika. Eci va seteka Suku va yovoka.

¹⁶ Oco, ava va sumba Yehova va livangola pokati, Yehova wa va yevelela, kuenje co lomboloka. Oco kuo sonehĩwĩla eliwulu lionjivaluko yava va sumba Yehova, haivo va sokolola onduko yaye.

¹⁷ Yehova Ukualohoka wa popia hati, Va linga vange, vange muẽle, eteke ñatuka. Ndi va popela ndeci onjali yi popela omõlãye u vumba.

¹⁸ Eteke liaco vu kũlĩha vali oku tepisa pokati keci ciwa leci cĩvi, loku tepisavo pokati ku o vumba Suku lu ko vumbi.