MALAKIYA 2 - Embimbiliya - Bíblia Sagrada em Umbundu

¹ Cilo, avitunda, ondaka eyi ya loña kokuene.

² Nda ko yevi pamue ko pangi vitima viene oku kemainya onduko yange, ndu siñali, kuenje mongolola asumũlũho ene okuti a linga asumuo. Nda a pongolola ale muẽle momo ka wa ci kapeliko.

³ Tala! ndi pisa ombuto yene kuenje ñapa aniña kovipala viene, okuti aniña ovinyama viene vioku lumba, kuenje ndu tundisi.

⁴ Wu kũlĩha okuti ame nda eca ocihandeleko eci kokuene kuenje ocisila nda lisila la Lewi ci tãi. Oco ca popia Yehova Ukualohoka.

⁵ Ocisila cange nda lisila laye ocisila comuenyo lombembua, kuenje nda ci lisila laye okuti o sumbila. Kuenje wa sumbila muẽle, wa sumbila ocili onduko yange.

⁶ Ocihandeleko cesunga ca kala vomẽla waye, kuenje eci ca penga ka ca sangiwile kelimi liaye. Wa endaenda lame lombembua lesunguluko, kuenje wa tindula va lua kuevi via penga.

⁷ Momo vomela wocitunda mua sesamẽla okutata ukũlĩhĩso. Omanu va sesamẽla oku sanda ocihandeleko cange ci tunda vomẽla waye, momo eye omunga ya Yehova Ukualohoka.

⁸ Ene puãi wa pambuki vonjila. Wa tatamisi va lua lokulongisa kuene, kuenje ocihandeleko ca va lingila ocilondokua. Wa liweki oku tata ocisila ca Lewi. Oco ca popia Yehova Ukualohoka.

⁹ Oco ndo sepuisili kovaso omanu, loku u muisi epembe. Momo ka wa endeleli volonjila viange, puãi kokutetulula kuene wa kaili locame lomanu.

¹⁰ Isietu vosi humosiko hẽ? Suku wa tu lulika, siti, umuamue? Nye puãi tu lilingaila usuanji, omunu lokuavo, omunu lokuavo, loku nyõla ocisila colosekulu vietu?

¹¹ Yuda wa linga usuanji, leci ci koka onyanya ca lingaiwa vo Isareli lo vo Yerusalãi. Momo Yuda wa vĩhĩsa onjo yi kola ya Yehova, eyi a sola, yu wa kuela omõla ukuasuku yiñi.

¹² U o ci linga Yehova o tepe kepata lia Yakoba, loku u tundisa kolombalaka viaye. O pumbise ava vo vanguilako, lava vo lumbila ku Yehova ocilumba caye.

¹³ Wa lingi vali eci, cokuti, vu yukisa utala wa Yehova lasuẽlẽla, loku lila, kuenda oku leña leña, momo eye ka vanji vali kocilumba cene, ndaño oku ci tambula lesanju Povaka ene.

¹⁴ Ene vu pula hoti, Nye ka ci tambuila? Momo Yehova wa linga ombangi yocisila wa lisili, ove lukãi wove wombutulua. Cilo ove wa kemba ukãi wombutulua, ndaño eye ukuẽle, haeye ukãi wove wohuminyo.

¹⁵ Ha Suku yimosiko wa tu sovola? Wa tu sovuila nye? Ka tu sovuilile hẽ oku amisa epata liaye li kola? Ka yongola hẽ okuti ku kala omãla va tuwa evi via Suku? Oco lunguki litima viene. Lomue ka ka lingile usuanji ukãi waye wombutulua poku enda kukãi ukuavo.

¹⁶ Momo Yehova, Suku ya Isareli, wa popia hati, Ndi suvuka oku nyãla. Suvukavo ulume oku linga cĩvi ukãi waye. Oco, lunguki lovitima viene, ko ka lingi usuanji waco.

¹⁷ Wa kavisi Yehova lolondaka viene. Haimo wu pula hoti, Tuo kavisa ndati? Momo wu popia hoti, U wosi o linga ekandu wa sunguluka ku Yehova, kuenje Yehova o va sanjukila. Kuenda vali momo wu popi hoti, Suku ukuakutetulula lesunga o kasi pi?