LUKA 9 - Embimbiliya - Bíblia Sagrada em Umbundu

¹ Noke wongolola ekui liaco la vavali, yu wa va iha unene lomoko yoku tundisa ovilũlu viosi, leyi yoku sakula ovovei.

² Kuenje wa va tuma oku kunda usoma wa Suku loku sakula omanu va vela.

³ Kuenje wa popia lavo hati, Ungende wene ko ko wambateli cimue, ndaño ombueti, pamue ocipete, pamue okulia, pamue olombongo, pamue olombinja vivali.

⁴ Kuenda vali, vonjo yosi vu singa omo vu kala, haimo vu tunda.

⁵ Imbo liosi ka liu tambuli, eci vu tunda vimbo liaco, tutumuli oneketela polomãi viene ha ci lingi uvangi wepiso liavo.

⁶ Oco va enda kuenje va pita kovaimbo oku kunda ondaka yiwa loku sakula kuosi.

⁷ Oco ombiali Herode wa yeva cosi ca lingiwa, kuenje co puiya ca lua, momo vamue va popia vati, Yoano wa pinduiwa ku vakuavilangu;

⁸ vamue vati, Eliya wa tukuluka; vakuavo vati, Uprofeto umue wosiahũlu wa pinduka.

⁹ Kuenje Herode hati, Yoano ndo topola utue, puãi u njevitile ovina evi eye elie? Oco wa sanda oku u mola.

¹⁰ Eci ovapostolo va tiuka vo sapuila ovina viosi va linga. Oco wa va ambata kuenje wa enda lavo kimbo limue ha va kalako ulika. Onduko yimbo liaco Betesaita.

¹¹ Eci owiñi wa ci kũlĩha wo kuama. Eye wa va tambula lonjolela, wa vangula lavo ovina viusoma wa Suku, kuenje wa sakula ava va sukila oku sakuiwa.

¹² Eci ekumbi lia fetika oku enda oco ekui liaco la vavali veya kokuaye, va popia laye vati, Eca owiñi, oco va ende kovaimbo lo kovapia a lisungue oku landa okulia loku lala, momo mulo tu kasi vekalasoko.

¹³ Eye puãi wa popia lavo hati, Ene muẽle, va ihi okulia. Ovo vati, Ka tu kuete ca lua, te olombolo vitãlo lolosi vivali, te nda tu enda, ha tu ka landela omanu ava vosi okulia.

¹⁴ Momo va soka ndolohũlũkãi vitãlo kalume. Oco wa popia lolondonge viaye, hati, Va tumalisi ovisoko okuti ocisoko akui atãlo, ocisoko akui atãlo.

¹⁵ Oco va ci linga, kuenje va va tumalisa vosi.

¹⁶ Kuenje wa nyañula olombolo vitãlo lolosi vivali, oku imba ovaso vilu wa vi sumũlũisa, oku vi timbula wa vi eca kolondonge oku vi amuila owiñi.

¹⁷ Kuenje vosi va lia, ve kuta. Noke va nola ovimalañanya via supapo kuenje via soka lekui liovitenge kovitenge vivali.

¹⁸ Ca pita okuti osimbu a kala loku likutilila kulika olondonge via kala kumue laye, kuenje eye wa va pula, hati, Omanu hẽ, va nukola ndati?

¹⁹ Vo kumbulula vati, Yoano Upapatisi, puãi vamue vati, Eliya, kuenda vakuavo vati, Uprofeto umue wosiahũlu wa pinduka.

²⁰ Oco wa va pula, ovo, hati, Ene puãi vu nukula ndati? Kuenje Petulu wo kumbulula hati, Ove u Mesiya ya Suku.

²¹ Puãi eye wa va kandangiya, loku handeleka, hati, Ko ka ci popi lomunu.

²² Wa popia hati, Mõlomanu o laika oku yavala ovina via lua, loku takumuiwa lakulu lovitunda vinene la vakuavisonehua, kuenje ipaiwa kuenda o pinduiwa keteke liatatu.

²³ Kuenje wa popia la vosi, hati, Omunu nda o yongola oku ñuama, ka ka litende vali eye muẽle, a tikule ekulusu liaye eteke keteke, a ñuame.

²⁴ Momo u o yongola oku popela omuenyo waye, u pesela ño, puãi u o mesila omuenyo waye, u popela.

²⁵ Momo ci kuatisa ndati omunu nda o nganyala oluali luosi, kuenje o linyõla, pamue o takisa omuenyo waye?

²⁶ Momo u o ñuetele osõi kuenda o kuetele olondaka viange osõi Mõlomanu u kuatelavo osõi eci eya vulamba waye lu wa Isiaye lu wovangelo va kola.

²⁷ Ndu sapuili cocili siti, Vamue va tãi kulo ka va mahi kokufa te va mola usoma wa Suku.

²⁸ Eci a popia olondaka evi pa pita oloneke ecẽlãla oco noke wa enda la Petulu la Yoano la Tiago, kuenje va londa komunda oku ka likutilila.

²⁹ Eci a kala loku likutilila ocipala caye ca pongoloka, luwalo waye lawovo wa pongoloka, wa yela tue.

³⁰ Kuenje alume vavali, okuti Mose la Eliya, va vangula laye.

³¹ Va molehela vulamba, kuenje va vangula okufa kuaye, ndeci a laika oku fila ko Yerusalãi.

³² Petulu lava va kala laye va suñila, puãi eci va patuluka, va mola ulamba waye lalume vavali va tãi laye.

³³ Eci alume vaco va kala loku liusika laye, oco Petulu wa popia la Yesu, hati, A Ñala, ciwa omo tu kasi kulo. Tu tungi olosinge vitatu, yimue yove, yimue ya Mose, yimue ye Eliya, puãi ka kũlĩhile eci a popia.

³⁴ Osimbu a kala loku popia ovina evi oco kueya elende lia va sikĩlĩla, kuenje eci va iñila velende, va kala lusumba.

³⁵ Kuenje velende mua tunda ondaka yiti, U Omõlange haeye wange wa noliwa. U yeveleli.

³⁶ Kuenje eci ondaka ya pita va mola okuti Yesu wa siala lika liaye. Kuenje va ci uhila koloneke viaco, lomue wa sapuila cimue covina va mola.

³⁷ Kuenje hẽla, eci va loka komunda, owiñi wa lua wa ñualehela laye.

³⁸ Kuenje ulume umue wa kala vowiñi wa vilikiya, hati, Olongisi, hu pinga okuti o vanja omõlange ulume, momo eye omõlange wongunga.

³⁹ Kuenje ocilũlu cu kuata kuata, noke omõla o liyula, cu tanyisa toke o tutuma efelefele, kuenje cu kupula ndu cu nyanyõla, kuenje ka cu weci lombili.

⁴⁰ Nda pinga kolondonge viove oku ci tundisa, puãi ka via ci tẽlele.

⁴¹ Yesu wa kumbulula hati, Acitumbulukila hacekoleloko, haico ci sivuluka, ñala lene toke pi? Toke pi mandikisa lene? Nena omõlove.

⁴² Osimbu omõla a kala loku iya, ocilũlu co kupuila posi, yu co tanyisa. Puãi Yesu wa lemela ocilũlu ca vĩha, wa sakula umalehe kuenje wo weca ku isiaye.

⁴³ Kuenje vosi va komoha unene wa Suku. Puãi osimbu va kala loku komoha ovina viosi a linga, eye wa popia lolondonge viaye, hati,

⁴⁴ Olondaka evi viñile ocili vovatui ene, momo Mõlomanu o pakuiwa povaka omanu.

⁴⁵ Puãi ondaka yaco ka ya va lombolokele, ya va lingila elumbu okuti ka va yi limbukile, kuenje oku u pula ondaka yaco ca va linga ohele.

⁴⁶ Oco pokati kavo peya olonamãlãla, va lihoyela nda helie o linga fu pokati kavo.

⁴⁷ Puãi eci Yesu a limbuka ovisimilo viovitima viavo, oco wa nyañula okamõla kuenje wa ka tumbika ponele yaye.

⁴⁸ Yu wa popia lavo hati, U o hindikisa okamõla aka vonduko yange, ame a hindikisa, lu o hindikisa ame, o hindikisa u wa numa, momo u o sule pokati kene vosi, eye unene.

⁴⁹ Yoano wa kumbulula hati, A Ñala, tua mola umue wa kala loku tundisa ovilũlu vonduko yove, kuenje tuo tutuiya, momo hokuetuko.

⁵⁰ Puãi Yesu wa popia laye hati, Ko ko tutuiyi, momo u ko tamalaili wa wameli.

⁵¹ Eci oloneke viaye vioku tambuiwa kilu via kala ocipepi oco wa panga lutima waye wosi oku enda ko Yerusalãi.

⁵² Yu wa tuma olomunga kovaso yaye. Kuenje via enda, via iñila vimbo lia va Samária oku u angiliyila.

⁵³ Omanu vaco puãi ka va tavele oku u tambula momo wa lunga muele ko Yerusalãi.

⁵⁴ Kuenje eci olondonge viaye, Tiago la Yoano, via ci mola, via popia viti, A Ñala, o yongola okuti tu pañinya ondalu yi tunda kilu kuenje yi va lia ndeci ca lingile Eliya.

⁵⁵ Eye puãi wa ñualapo kuenje wa va lemela.

⁵⁶ Oco va enda kimbo likuavo.

⁵⁷ Kuenje eci va kala loku enda kungende wavo, omunu umue wa popia laye hati, Hu kuama kuosi wenda.

⁵⁸ Kuenje Yesu wa popia laye hati, Akẽle a kuete alungi, lolonjila viovusenge vi kasi lovianju, Mõlomanu puãi ka kuete apa a kunamisila utue waye.

⁵⁹ Wa popia lukuavo hati, Ñuame. Puãi eye hati, A Ñala, tava okuti tete ngenda si ka kenda tate.

⁶⁰ Puãi Yesu wo kumbulula hati, Ovivimbi vi kende ovivimbi viavio muẽle, puãi ove, kuende, ka longise ondaka yiwa yusoma wa Suku.

⁶¹ Ukuavo wa popiavo laye hati, A Ñala, hu kuama, puãi tava okuti tete ngenda hosika vakuanjo yange.

⁶² Puãi Yesu wa popia laye hati, Lomue wa sungulukila usoma wa Suku, nda, eci a kapa ale eka liaye kosaluwa, o vanja vali konyima.