LUKA 8 - Embimbiliya - Bíblia Sagrada em Umbundu

¹ Oco noke eye wa pita kovaimbo anene lo kovaimbo atito oku kunda, wa sapula ondaka yiwa yusoma wa Suku, kuenje ekui liaco la vavali va enda kumue laye.

² Kuenda akãi vamue va sakuiwa ovilũlu via vĩha lovovei, va endavo, ndeci Maria u wa tukuiwa u Magadala, una wa tundisua ilũlu epanduvali,

³ kuenda Yoana, ukãi wa Husa, kalei ka Herode, la Susuana, la va lua vakuavo. Akãi vaco ovo vo tekula lipako viavo.

⁴ Kuenje eci owiñi wa lua wongoloka, okuti omanu va tunda kovaimbo osi veya kokuaye, oco wa va tela olusapo, hati,

⁵ Uwayi umue wa tunda oku waya ombuto yaye. Eci a kala loku waya, yimue ya lokila kohulo yonjila, yu ya kosiwa lolomãi, kuenje olonjila viovusenge vieya, via yi lia.

⁶ Yikuavo ya lokila pocisokawe, tuli ya tunda ya kukuta, momo ka ya kaile lombuili.

⁷ Yikuavo ya lokila pocambanda, kuenje ocambanda, oku yovela kumue layo, ca yi totomisa.

⁸ Yikuavo ya lokila posi yiwa, ya yova kuenje ya licita, okuti onjongo yimosi ya ima ocita colonjongo. Eci a popia ovina evi wa vilikiya hati, U o kasi lovatui oku yeva a yeve.

⁹ Olondonge viaye vio pula olusapo luaco ndeci lua lomboloka.

¹⁰ Oco eye wa popia hati, Ene wa kundikiwi oku kũlĩha alumbu usoma wa Suku, puãi ku vakuavo alumbu aco a lomboluiwa lolosapo okuti oku vanja va vanja, puãi ka va moli, loku yeva va yeva, puãi ka va yevite.

¹¹ Olusapo luaco lua lomboloka ndomo, Ombuto yaco oyo ondaka ya Suku.

¹² Ava vokohulo yonjila, ovo ava va yeva, noke eliapu liya, li upa ondaka vovitima viavo okuti ka va tava, kuenje ka va popeliwa.

¹³ Ava vokohanda ovo ava okuti, eci va yeva ondaka, va yi tava lonjolela, puãi ka va kuete olombombo, oco va yi kolela ño okatembo katito, kuenje keteke lieyonjo va konyoha.

¹⁴ Ombuto ya lokila pocambanda ya lomboloka ava va yeva puãi va enda ño lonjila yavo, kuenje va totomisua lohele lukuasi lalau omuenyo okuti apako avo a siõsia.

¹⁵ Ombuto ya lokila posi yiwa ya lomboloka ava okuti, eci va yeva ondaka va yi seleka vovitima vie lipua haivio via sunguluka, kuenje va pandikisa loku ima apako.

¹⁶ Lomue o miha ondiyelo kuenje noke yi tuvika locikuata, pamue o yi kapa vemehi liula, puãi o yi kapa komesa okuti ava va iñilamo va mola ocinyi.

¹⁷ Momo lacimue ca sitikiwa okuti noke ka ci situluiwa, lacimue ca yombekiwa okuti noke ka ci kũlĩhiwa ha ciya kutanya.

¹⁸ Oco lunguki ndeci vu yeva, momo u o kuete o vokiyiwa, kuenje u ka kuete o nyehiwa ndaño eci a soka hati, Cange.

¹⁹ Kuenje inaye la vamanjaye veya kokuaye, puãi, mekonda liowiñi, ka va tẽlele oku pitila kokuaye.

²⁰ Oco vo sapuila vati, Nyõho la vamanjove va tãi posamua, va yongola oku ku pasula.

²¹ Puãi eye wa va kumbulula hati, Mai la vamanjange vava va yeva ondaka ya Suku kuenje va yi linga.

²² Eteke limue Yesu wa wila vowato, eye lolondonge viaye, yu wa popia lavo hati, Tu yokili kesinya liociva. Oco wa endela vowato,

²³ puãi, osimbu va kala loku enda, eye wa pekela kotulo. Ofela yonupi yeya, ya sika kociva, lowato wa kala loku yuka ovava, kuenje va soka oku vomba.

²⁴ Oco veya kokuaye, kuenje vo pasula, vati, A Ñala, a Ñala, tu kasi loku nyõleha. Oco wa pasuka, wa lemela ofela lokutema kuovava, kuenje a liweka, kueya etulumuho lia lua.

²⁵ Wa popia lavo hati, Ekolelo liene hẽ, li kasi pi? Va kala lusumba, kuenje va komoha. Va livangula pokati vati, U helie okuti o handeleka ndaño ofela lovava kuenje viu pokola?

²⁶ Oco va enda lowato toke va pitila kofeka ya va Gerasa, haiyo ya imba ovaso ko Galilea.

²⁷ Eci a kanduluka vowato oku enda kongongo, oco kua ñualehela laye omunu wa tunda vimbo, o kuetiwe lovilũlu. Osimbu ya lua ka walele uwalo, kuenje ka tumalele vonjo puãi wa kala kala ño-o volosonje.

²⁸ Eci a mola Yesu, wa vilikiya, kuenje wa wila posi kovaso aye. Wa popia lolukandi hati, Tu likuetele nye love, a Yesu, a Mõla a Suku Tõlo? Hu pinga siti, Ku ka njambule.

²⁹ Momo Yesu wa kala ale loku handeleka ocilũlu ca vĩha okuti ci tunda vomunu waco. Momo olonjanja via lua co kuata kuata. Wa laviwa kuenje vo kuta kuta lalienge lovikumbi, puãi wa soyoyola ovikolo, kuenje wa sengelua vekalasoko locilũlu.

³⁰ Noke Yesu wo pula hati, Onduko yove ove elie? Eye wa kumbulula hati, Ame Lohoka, momo ovilũlu via lua viu kuete.

³¹ Kuenje vio livondela ca lua okuti ka vi handeleka oku enda vonjembo.

³² Oco kua kala ocunda colongulu via lua ca lila komunda, kuenje vio livondela okuti o tava okuti vi vi kuata, yu wa tava.

³³ Oco ovilũlu via tunda komunu, kuenje via iñila volongulu. Ocunda condumũhĩla vocingunguma ta vociva kuenje via taka.

³⁴ Eci angombo vaco va mola eci ca lingiwa va tila, kuenje va ci sapuila vimbo lo vofeka.

³⁵ Oco omanu va tunda vovaimbo, veya oku tala eci ca lingiwa. Veya ku Yesu, kuenje va sanga omunu wa tundisua ovilũlu, yu wa tumala kolomãi via Yesu, wa wala, wa kala vali lolondunge. Kuenje va kala lusumba.

³⁶ Kuenje omanu va ci mola va va sapuila ndeci u wa kuatiwile lovilũlu a sakuiwa.

³⁷ Oco omanu vosi vakuafeka yi lisungue la Gerasa va livondela Yesu oku tunda kokuavo momo va kala lusumba wa lua. Oco wa wila vowato kuenje wa tiukila.

³⁸ Puãi ulume wa tundisua ovilũlu wo pinga oku kala kumue laye. Puãi Yesu wo tiuwiya hati,

³⁹ Tiukila konjo yove. Ka sapule cosi Suku a ku lingila. Oco wa tunda, wa ka sapuila imbo liosi eci cinene Yesu o lingila.

⁴⁰ Eci Yesu a tiuka, owiñi wo yolela momo va kala loku u talamela.

⁴¹ Kuenje kueya ulume, onduko yaye Yairo, haeye ukulu wosunangonga, yu wa kekamela kolomãi via Yesu kuenje wo livondela oku iya vonjo yaye,

⁴² momo wa kala lomõla wongunga ukãi, ukuanyamo ekui la avali, wa soka oku fa. Osimbu a enda owiñi wo sinda.

⁴³ Kuenje ukãi umue wa pita osonde ekui lianyamo kanyamo avali, yu wa pesela ovikuata viaye viosi kolondotolo, puãi lomue wa tẽla oku u sakula,

⁴⁴ weya konyima yaye, kuenje wa lamba olunjenje luwalo waye, kuenje haico okupita kuosonde yaye kua imuha.

⁴⁵ Kuenje Yesu hati, U wa ndamba helie? Eci vosi va likala, Petulu lava va kala kumue laye vati, A Ñala, owiñi wa ku ñuala, kuenje u ku sinda.

⁴⁶ Puãi Yesu hati, Umue wa ndamba, momo nda limbuka okuti unene wa nunda.

⁴⁷ Kuenje eci ukãi a mola okuti oku wunda vali ka ci tava, oco weya loku luluma, kuenje wo kekamela, yu wa lomboluila kovaso omanu vosi eci o lambela, kuenda ndomo a kaya tuli o lamba.

⁴⁸ Oco Yesu wa popia laye hati, Amõlange, ekolelo liove lia ku kayisa. Kuende lombembua.

⁴⁹ Osimbu a kala loku popia, kueya umue wa tunda konjo yukulu wosunangonga hati, Omõlove wa fa. Ku ka sakalaise vali Ulongisi.

⁵⁰ Puãi, eci Yesu a ci yeva, wo kumbulula hati, Ku ka kuate ohele. Kolela ño kuenje ufeko o sakuiwa.

⁵¹ Eci eya konjo, ka tavele okuti umue iñila kumue laye, te Petulu la Yoano la Tiago la isia yufeko kuenda inaco.

⁵² Vosi va kala loku lila kuenda oku sinumula omõla. Yesu puãi wa linga hati, Ko ka lili, momo ka file, wa pekela ño otulo.

⁵³ Kuenje vo yola epembe, momo va kũlĩha okuti omõla wa fa.

⁵⁴ Puãi Yesu, oku u kuata peka, wa vilikiya hati, Amõla, pasuka.

⁵⁵ Oco omuenyo womõla wa tiuka kuenje eye wa votoka. Oco Yesu wa sapula hati, Va wihe okulia.

⁵⁶ Olonjali viaye via komoha, puãi Yesu wa va lemela okuti ka va sapuila umue eci ca lingiwa.