LUKA 7 - Embimbiliya - Bíblia Sagrada em Umbundu

¹ Eci a mala oku yevisa komanu olondaka viaye viosi oco a iñila vo Kafarinau.

² Kesongo limue wa kala lukuenje waye wa soliwa ca lua, kuenje ukuenje waco wa vela ca lua okuti wa soka oku fa.

³ Eci kesongo a yeva oluhimo lua Yesu oco wo tumisa akulu va va Yudea oku u peya okuti iya, o popela ukuenje waye.

⁴ Kuenje eci veya ku Yesu vo lipilikila vati, Wa sungulukila oku u ci lingila.

⁵ Momo o sole epata lietu, kuenje eye muẽle wa tu tungila osunangonga.

⁶ Oco Yesu wa enda lavo. Eci eya ocipepi lonjo yaco oco kesongo wa tuma akamba vaye oku popia laye. Kuenje va popia laye vati, A Ñala, Kesongo hati, Ñala ka ka likavise ño, momo si sesamela okuti iñila vemi liolusoka luonjo yange,

⁷ haico sia sokele siti, Sesamela oku enda kokuaye, puãi a popie ño ondaka oco ukuenje wange a kaye.

⁸ Momo ame ndimunu ukuakupokola ku wa mbelapo, haime ñasi lasualali va pokola kokuange. Mopia lumue siti, Kuende, kuenje enda. Mopia lukuavo siti, Enju, kuenje iya. Mopia lukuenje wange siti, Linga eci, kuenje o ci linga.

⁹ Eci Yesu a yeva ovina evi, wo komoha, kuenda, oku pongolokela kowiñi wu kuãi, wa linga hati, Mopia lene siti, Ndaño ku Isareli sia sangeleko ekolelo ndeli.

¹⁰ Kuenje eci ava va tumiwa va tiukila konjo, va sanga ukuenje waco wa kaya.

¹¹ Oco noke yaco, eye wa enda kimbo limue, ko Naini. Olondonge viaye lowiñi wa lua womanu va enda laye.

¹² Eci a pitila ocipepi lombundi yimbo oco wa tokeka locivimbi ca tunda vimbo. Omunu waco omõla ongunga ku inaye, inaco ocimbumba, kuenje vakuimbo va lua va kala kumue laye.

¹³ Kuenje eci Ñala o mola, wo kuatela ohenda yu wa popia laye hati, Ku ka lile.

¹⁴ Oco oku amelako wa lamba kocikalavekua, kuenje vakuacikalavekua va talama, yu wa popia hati, Omalehe, mopia love siti, Pasuka.

¹⁵ Oco u wa file wa tumala, kuenje wa fetika oku popia. Yesu yu wo weca ku inaye.

¹⁶ Usumba wa va kuata vosi, kuenje va tumbangiya Suku vati, Uprofeto unene wa katukila pokati ketu; kuenda vali vati, Suku wa pasula omanu vaye.

¹⁷ Oluhimo olu lua sandokaila kuosi ko Yudea lo kofeka yosi yi sungueko.

¹⁸ Olondonge via Yoano vio sapuila ovina evi viosi.

¹⁹ Kuenje Yoano, oku pañinya olondonge viaye vimue vivali, wa vi tuma ku Ñala, hati, Ove hẽ, ove una iya ale, ele tu lavoka umue wiñi?

²⁰ Eci olondonge viaco vieya ku Yesu via popia laye, viti, Yoano Upapatisi wa tu tuma kokuove, hati, Ove hẽ, ove una iya ale, ele tu lavoka umue wiñi?

²¹ Ola yaco haiyo a sakula va lua okuvela kuavo, lovolema avo, laspiritu a vĩha, kuenda wa letulula olomeke via lua.

²² Yu wa va kumbulula hati, Kuendi, ka sapuili Yoano ovina wa moli levi wa yevi, okuti olomeke vi letuluka, oyilema vi enda, vakuavilundu va yelisua, ovisitatui vi yeva, lava va fa va pinduiwa, kuenje olosuke vi kundilua ondaka yiwa.

²³ Kuenje u ka natamisilua wa sumũlũha.

²⁴ Eci olomunga via Yoano via tundako Yesu wa fetika oku vangula Yoano lowiñi, hati, Wa endeleli oku ka tala nye vekalasoko? oluneva lua lituñunya lofela?

²⁵ Nda hacoko, wa endeleli oku ka tala nye? omunu wa wala uwalo wa fina? Tali, ava va wala uwalo wa fina kuenda va lia lia elau va kasi volonjo violosoma.

²⁶ Oco hẽ, wa endeleli oku ka tala nye? uprofeto? Mopia lene siti, Ocili muẽle, wa ka taleli umue wa velapo, okuti uprofeto o sule.

²⁷ Eye, eye una co sonehelua, citi, Tala, numa omunga yange kovaso yove. Eye o pelela onjila yove kovaso yove.

²⁸ Ndu sapuili siti, Pokati kava va citiwa lakãi ka pali umue unene okuti Yoano o sule, puãi u o sule vusoma wa Suku, eye unene okuti Yoano o sule.

²⁹ Eci omanu vosi la vakuakutambula elisimu va yeva ondaka eyi oco va tava okuti ocipango ca Suku ca sunguluka, kuenje va ci lekisa poku papatisiwa la Yoano.

³⁰ Va Fariseo puãi lalongisi vovihandeleko va likala ocipango Suku a va yonguila omo ka va tavele oku papatisiwa la Yoano.

³¹ Oco omanu vocitumbulukila cilo ndi va sokisa le? Va lisoka la nye?

³² Va lisoka lomãla va tumala vocila kuenje va vilikiya vakuavo, vati, Tuo sikili olombendo, kuenje ka wa cilili. Tua litetela, kuenje ka wa lilili.

³³ Momo Yoano Upapatisi weya, ombolo ka li, ovinyu ka nyui, kuenje vu linga hoti, O kuete ondele.

³⁴ Mõlomanu weya, o lia lia, o nyua nyua, kuenje vu linga hoti, Tali ocisapanu haeye oholua, haeye ekamba lia vakuakutambula elisimu kuenda lia vakuakandu.

³⁵ Haimo Ndunge o tendiwa ndukuesunga mekonda liomãla vaye vosi.

³⁶ Kuenje umue ku va Fariseo wa laleka Yesu oku lia kumue laye. Oco Yesu wa iñila vonjo yu Fariseo, kuenje wa tumala komesa.

³⁷ Ukãi umue wovimbo, haeye ondingakandu, eci a yeva okuti wa tumala komesa vonjo yu Fariseo, oco weya lombutika yalabastro ye yuka onguendu.

³⁸ Wa talama konyima, kolomãi viaye, loku lila, kuenje wa fetika oku yulisa olomãi via Yesu lasuelela aye, yu wa vi puenya lesinga liaye, kuenje wa sipula olomãi viaye loku vi waveka onguendu.

³⁹ Eci u Fariseo, una wo laleka, a ci mola, wa popia lutima waye hati, Omunu u, nda wa kaile uprofeto, nda wa kũlĩhile ukãi u u kuete ndeti ndeci a tuwa, momo ukuakandu.

⁴⁰ Kuenje Yesu, oku u kumbulula, wa popia laye hati, A Simono, ñuete cimue oku popia love. Eye wa linga hati, Olongisi, va popie ño.

⁴¹ Yesu wa popia hati, Umue ondevalisi wa kaile lolondevali vivali, umue wa levala ovita vitãlo kolopalata, ukuavo akui atãlo.

⁴² Eci ka va kaile leci va feta, oco wa va ecela kavali kavo. Pokati kavio u u solepo ca lua helie?

⁴³ Simono wa kumbulula hati, Nda soka siti, Yu a ecela ca lua. Yu wa popia laye hati, Wa teta onimbu yiwa.

⁴⁴ Kuenje, oku pongolokela kukãi waco, Yesu wa popia la Simono hati, O lete ukãi u? Nda iñila vonjo yove, kua nyihile ovava okolomãi viange, puãi eye wa yulisa olomãi viange lasuelela aye kuenje wa vi puenya lesinga liaye.

⁴⁵ Ove kua sipuile, puãi eye, tunde apa nda ka iñila, ka liwekele oku sipula olomãi viange.

⁴⁶ Utue wange kuo wavekele ulela, puãi eye wa waveka olomãi viange longuendu.

⁴⁷ Oco mopia love siti, Akandu aye, ndaño a lua, a ecelua, momo o sole ca lua, puãi u wa ecelua citito o sole citito.

⁴⁸ Kuenje wa popia lukãi hati, Akandu ove a ecelua.

⁴⁹ Oco ava va tumala kumue laye kokulia va fetika oku livangula pokati vati, U helie okuti ndaño akandu ecela?

⁵⁰ Yu wa popia lukãi hati, Ekolelo liove lia ku popela kuende lombembua.